UMWENE luñenyenye lweñenya lufunka yeu muntu? Luno luñenyenye lwadi lubamweka pobadi abatambe mu Yelusalema. Bano bantu i ba Kutunduka, kadi befundanga ñenyenye. Bakulupile’mba luñenyenye’lu lukebafikija kudi muntu mulēme.

Bano bantu pa kufika mu Yelusalema, abaipangula’mba: ‘I kwepi kudi mwana ukekala mulopwe wa Bayuda?’ “Bayuda” i mutelelo mukwabo wa Bene Isalela. Bano bantu abanena’mba: ‘Twamwene luñenyenye lwa mwana batwe tukidi Kutunduka, pano tubaiya kumutōta.’

Heloda mulopwe wa mu Yelusalema pa kwivwana uno mwanda, wavutakanibwa ñeni. Kasakilepo mulopwe mukwabo wa kumupingakena. Penepo Heloda waite babitobo bakulu kaebepangula’mba: ‘Mulopwe ulailwe ukabutwilwa kwepi?’ Abalondolola’mba: ‘Bible unene ku Betelema.’

Penepo Heloda waite bantu ba Kutunduka’ba, kaebanena’mba: ‘Endai mukakimbe uno mwana. Shi mubamumone, mundyukije. Nsakanga nami ñende nkamutōte.’ Inoko, na bubine, Heloda usaka kukamwipaya!

Kupwa luñenyenye lubatangidila bano bantu kufika ne ku Betelema, kupwa lubaimana padi mwana. Bano bantu pa kutwela mu njibo, abatana Madia ne mwanuke Yesu. Abalupula byabuntu ne kupa’byo Yesu. Kupwa Yehova wadyumuna bano bantu mu kilotwa baleke kujokela kudi Heloda. Ebiya abajokela kwabo mu dishinda dingi.

Heloda pa kuyuka’mba bantu ba Kutunduka abajokela kwabo, wakalabala. Penepo wanena kwipaya bana bana-balume bonso ba mu Betelema ba tamba myaka ibidi ke kutūka. Ino Yehova wadi ke mudyumune kala Yosefa mu kilotwa, penepo Yosefa wanyemena na kisaka kyandi mu Edipito. Kupwa, Yosefa waivwana’mba Heloda wafu, penepo wasela Madia ne Yesu, abajokela mu Nazala. Penepo Yesu watamina konka.

Molangila, i ani wākelemeje luno luñenyenye? Vuluka’mba bantu bāendele dibajinji ku Yelusalema pa kupwa kumona luñenyenye. Satana Dyabola wādi usaka kwipaya Mwanā Leza, kadi wāyukile’mba Mulopwe wa mu Yelusalema Heloda usakanga kumwipaya. Nanshi Satana ye wādi ukokeja kukelemeja luno luñenyenye.