TALA uno nkasampe mwana-mulume wisamba na banunu. I bafundiji ba mu tempelo ya Leza ya mu Yelusalema. Mwanuke’u i Yesu. Pano kemutamunuke’ko. Kadi na myaka 12.

Bafundiji abatulumuka bininge pa kumona Yesu uyukile myanda mivule itala padi Leza ne pa bintu bilembelwe mu Bible. Mwanda waka Yosefa ne Madia kebadipo’po? Lelo badi kwepi? Tutalei.

Mwaka ne mwaka Yosefa wendanga na kisaka kyandi mu Yelusalema ku masobo a pa bula etwa bu Pashika. I lwendo lulampe lwa tamba Nazala kufika Yelusalema. I kutupu udi na motoka, nansha na kudiye mwine. Kebyaikele’ko mu mene mafuku’a. Bantu bavule bendanga lwa nshi kubwipi kwa mafuku asatu pa kufika mu Yelusalema.

Pano Yosefa kadi na kisaka kikatampe. Kudi ne bankasandya Yesu bana-balume ne bana-bakaji bafwaninwe kulama. Bine, uno mwaka ba Yosefa ne Madia abataluka na babo bana kebenda lwendo lulampe lwa kujokela ku Nazala. Abalanga’mba Yesu wisobele mu mulongo wa bantu bobenda nabo. Abo pa kwimana kyolwa, kebamwenepo Yesu. Abamutale mu bobabutulwa nabo ne mu balunda nandi mutupu’ye! Penepo abajoka kukamukimba mu Yelusalema.

Ku mfulo abatana Yesu pamo na bafundiji. Papo wibateja ne kwibepangula bipangujo. Bantu bonso abatendela ñeni ya Yesu. Ino Madia wanena’mba: ‘Abe mwana, lelo i kika kyowetulongela namino? Ami ne shobe tubakambe na kukukimba.’

Yesu walondolola’mba: ‘Kyomunkimbila i kika le? Lelo kemuyukilepo’mba mfwaninwe kwikala mu njibo ya Tata?’

Bine, Yesu uswele kutanwa kokwa kwifundwa myanda ya Leza. Mwene netu ye motufwaninwe kwikadila? Pa kujokela mu Nazala, Yesu wādi wenda ku kupwila mwanda wa kutōta yenga ne yenga. Wēfundile myanda mivule ya mu Bible mwanda wādi utele’ko mutyima. Twikalei pamo bwa Yesu ne kulonda kimfwa kyandi.