TALA! kyombo kibalobela! Kibabesuka bibesebibese! Mwene umwene bantu beelele pa mema? Bamo ke babukile ku mbadi. Le yewa i Polo’ni? Tutalei bidi byamufikila.

Vuluka’mba Polo wadi mukutwe myaka ibidi mu Kesalea. Kupwa aye ne babuloko bakwabo abaomekwa mu kyombo kebenda ku Loma. Abo pa kupita kubwipi na kisanga kya Kelete, abatanwa na luvula lukatampe. Luvula pa kupukuma bininge, bantu abakomenwa kōba kyombo. Abakomenwa kumona dyuba mwinya-mutete nansha ñenyenye bufuku. Ku mfulo, mafuku mavule pa kupita’po, bantu badi mu kyombo abamone’tu amba basa kufwa.

Penepo Polo waimana kanena’mba: ‘I kutupu ufwa nansha umo; ino’nka kyombo kikajimina. Mwanda mwikeulu wa Leza waile bufuku kaunena’mba, “Kokikwatwa moyo Polo! Abe ukemana ku meso a Kesala mbikavu wa Loma. Kadi Leza usa kupandija bonso boenda nabo.”’

Ke kubwipi na midi ya bufuku mu difuku dya 14 tamba luvula lushilula, bantu badi mu kyombo abamone amba mema ke mēpi! Pa kutyina kwikonga mu mabwe mwanda wa fukutu, abaela mañanga abo pa mema. Bufuku pa kukya, abamone nkula. Kebalanga kukashika’mo kyombo.

Ino yō, abo bafika kubwipi na kwabuka, kyombo kibekonge mu musenga kibaimana. Penepo mantanki abaanza kwikikuma, kupwa kibabesuka. Mudyavita wibalama wanena’mba: ‘Bonso bayukile kusumba babadikile kwiela pa mema bende pa ntanda. Bakwabo bebalonde, bakande pa mpalwa ya kyombo babuke.’ Nabo abalongela monka. Ebiya bantu bonso 276 badi mu kyombo abaabuka bakomo enka na mwalaile mwikeulu.

Kisanga kitwanga bu Medita. Bantu badi biyampe, kadi abakwasha bantu badi mu kyombo. Luvula pa kutalala, abaikija Polo ku kyombo kikwabo abakamutwala ku Loma.