Ino mwanda waka Satana ne bandemona bandi bengilanga na bukomo bonso mwanda wa kongola bantu? Mwanda basakanga twilunge ku butomboki bwabo. Betusakilanga twibatōte. Betusakilanga twitabije myanda yabo yabubela ne kulonga bintu bipelele Yehova. Pavule mu bino bintu mudi bisela bitala pa bafu.

Lufu lwa mukena wetu i kintu kiteneka bininge ku mutyima, ne i kyendele’mo ne kifwaninwe kulombola bulanda bwa bushiyena. Kupwa kwa lufu lwa mulunda nandi Lazalasa, Yesu wātapilwe ku mutyima bininge “ne impolo yamusuma.”​—Yoano 11:35.

Kudi bisela bivule bitala pa lufu, ne i bīshileshile kujokoloka ntanda yonso. Bivule kebipatanyangapo na misoñanya ya mu Bible. Inoko, bilongwa bikwabo i bimanine pa mulangwe wa’mba bafu badi na būmi ne bakokeja kumona bōmi. Kulāla ntānda, madilo makomokomo ne kulangula kisau, ne bilongwalongwa bya pa kitatyi kya kujika mufu, byonso bimanine pa moyo wa kutyina kusanshija mishipiditu ya bafu. Bafu byo “kebayukilepo [kintu] nansha kimo kine,” boba balonga bino bintu basambakanyanga bubela bwa Satana.​—Musapudi 9:5.

 Bisela bikwabo ne milongelo ya kishīla bilupukanga ku lufundijo lunena’mba bafu basakanga kukwashibwa na bōmi ne bakokeja kwibasusula shi kebebatalejepo mutyima. Mu matanda makwabo masobo ne bitapwa bilongibwanga mafuku 40 nansha mwaka umo kunyuma kwa lufu lwa muntu. Baloñanga uno muswelo na kufwatakanya’mba bakwashanga mufu ‘atundulukile’ mu kikalo kya mishipiditu. Kisela kikwabo kilongwa mu bifuko bivule i kulambula byakudya ne malwa ku bafu.

Bino bintu i byabubela mwanda biningishanga bubela bwa Satana butala pa bafu. Lelo Yehova witabije tukwatañane na bisela bimanine pa mfundijo ya bandemona? Nansha dimo!​—2 Kodinda 6:14-18.

Bengidi ba Leza wabine kebakwatañenepo na bisela biningisha bubela bwa Satana. Ino baputuminanga na buswe mu kukwasha bōmi ne kwibatalaja pa mutyima. Bayukile’mba shi muntu wāfu, enka Yehova kete ye ukokeja kumukwasha.​—Yoba 14:14, 15.

Bantu bakwabo besambanga na bandemona abo bene nansha kupityila ku bilumbu. Kino kitelwanga bu kutōta mishipiditu imbi. Kutōta mikalayi, kupaka-manga ne butyi, majende, kubuka, ne kwipangula bafu, byonso bino i miswelo mishileshile ya kutōta mishipiditu imbi.

Bible upelejanga bino bintu, amba: “Kekukatanwapo mobe, nansha umo, . . . ubuka lubuko, ulonga byamwiko, nansha uloañana, nansha wamajende, nansha mfwityi, nansha wipangula bibanda, nansha wamaleñanya, nansha wipangula bafu. Mwanda enselele ulonga bine bino bintu bino’bi, i wamunyanji kudi Yehova.”​—Kupituluka 18:10-12.

Mwanda waka Yehova witudyumuna na bukomo bonso ku bino bilongwa?

Pamwanda wa kamweno ketu batwe bene, Yehova witudyumunanga ku miswelo yonso ya  majende. Usenswe bantu ne wibakwatakanyanga, ne uyukile’mba boba badi mu kipwano na bandemona ibetule abo-bene mu masusu.

Umo wa mu bano bantu wādi Nilda, kilumbu kya mu Brezile. Bandemona bamumwesheshe malwa. Ufumika’mba: “Nātumbilwe na mishipiditu . . . yāshilula kuludika būmi bwami. Kitatyi kyonso nādi nketa muya kupwa kadi napumputumuka, bāuntwejeje ne mu lupitalo pamwanda wa misongo ya kuputukwa dityima. Bandemona bāunsuswile mpata nafula ne kukubela luba lwa bulubi. Nadi ntoma bwanga bwa kutalaja mijilo, nashilula kutoma mfwaka ne malwa kitatyi ne kitatyi. Naikēle mu ino ngikadilo umbula bwa myaka mivule.”

Kupwa, na bukwashi bwa Yehova ne bwa Batumoni bandi panopantanda, Nilda wānyongolwelwe mu bupika bwa bandemona, pano udi umbwanapabo ne udi na būmi bulumbuluke, ne bubwaninine. Unena’mba: “Nemukankamika banwe bonso kemukisambai nansha dimo kipwano na mishipiditu imbi.”