1, 2. Mwanda waka usenswe Yehova Leza?

LELO usenswe Leza? Padi kumusanswa bininge ko kwakulengeje wipāne kwadi. Padi ye uno umumona bu Mulunda nobe muyampe. Inoko ne powadi kwasenswe Yehova pene, aye wadi ukusenswe. Tutanga mu Bible amba: “Batwe tusenswe, mwanda aye wetusenswe dibajinji.”—1 Yoano 4:19.

² Langulukila’po bidi pa miswelo ilombwele’mo Yehova buswe bwandi kotudi. I mwitupe ntanda bu kīkalo kilumbuluke ne bintu byonso byotusakilwa mwanda wa tusangele būmi. (Mateo 5:43-48; Kusokwelwa 4:11) Usakanga tupwane nandi, o mwanda i mwitukwashe tupēlelwe kumuyuka. Potutanga Bible, tutejanga Yehova. Kitatyi kyotulombela, nandi witutejanga. (Ñimbo ya Mitōto 65:2) Wituludikanga ne kwitukomeja na mushipiditu wandi ujila wa bukomo. (Luka 11:13) Wātumine’nka ne wandi Mwana mulēme pano pa ntanda mwanda wa kwitunyongolola ku bubi ne ku lufu.—Tanga Yoano 3:16; Loma 5:8.

3. I muswelo’ka otulamanga kipwano kiyampe na Yehova?

³ Langulukila’po bidi pa mulunda nobe umo wa pa  mutyima, wadi nobe mu bitatyi bya nsangaji ne bya bulanda. Bilombanga bukomo pa kulama kipwano kikomo bwa kino. Mo mwikadile ne kipwano kyetu na Yehova, Mulunda netu wa pa mutyima mupite bonso. Bulunda bwetu nandi bubwanya kwikala bwa nyeke. O mwanda Bible witulombola’mba: ‘Mwilamei mu buswe bwa Leza.’ (Yude 21) Le tukelama’mo namani? Bible ulondolola’mba: “Buno namino bo buswe bwa Leza, amba tulame mbila yandi; kadi mbila yandi keilēmangapo.”—1 Yoano 5:3.

4, 5. (a) Lelo “buswe bwa Leza” bushintulula bika? (b) Le i muswelo’ka owashilwile kusanswa Yehova?

⁴ Le Bible ukimba kunena bika panena’mba “buswe bwa Leza”? Kino kekifunkilapo pa buswe bwitusenswe Leza, ino i pa buswe botumusenswe. Lelo ukivulukile kitatyi kyowashilwile kusanswa Yehova?

⁵ Vuluka moweivwanine powayukile dibajinji amba Yehova usakanga wikale’ko mūmi nyeke mu yandi ntanda mipya. Wayukile byonso byaalongele mwanda wa kufikidija kino, kadi wajingulwile amba Yehova wetupele kyabuntu kilēme paatumine wandi Mwana pano pa ntanda. (Mateo 20:28; Yoano 8:29; Loma 5:12, 18) Powayukile’tu amba Yehova ukusenswe bininge, byakukunkile ku mutyima, nobe washilula kumusanswa.—Tanga 1 Yoano 4:9, 10.

6. Le shi tubasanswa muntu tuloñanga bika? Le buswe bosenswe Leza bwakulengeje ulonge bika?

⁶ Inoko uno mwiivwanino wa kusanswa Leza i ngalwilo’tu. Kimfwa, shi tubasanswa muntu, tuloñanga bivule kupita’ko’tu kumusapwila’mba, “Nkusenswe.” Buswe bwitutononanga tulonge bintu  bisangaja muntu otusenswe’wa. Ne buswe bosenswe Yehova nabo mo monka, bwakulengeje wiendeje mu muswelo umusangaja. Patamine buno buswe, padi wepēne kwadi ne kubatyijibwa. Powalongele namino, walaile Yehova amba ukamwingidila nyeke. (Tanga Loma 14:7, 8.) Le i muswelo’ka obwanya kufikidija uno mulao?

7. Shi tusenswe Yehova, i bika byotukalonga? Le i mbila’ka yandi imoimo?

⁷ Byotusenswe Yehova, ‘tulamanga mbila yandi.’ Le tulamanga’yo namani? I na kumukōkela. Twifundanga mu Bible muswelo usaka Yehova twiendeje. Kimfwa, witusapwila’mba i bibi kukolwa, kwiba nansha kubepa, kusambakena pamo na muntu oketwisongelepo nandi, nansha kutōta kintu kyo-kyonso nansha muntu ye-yense pa kyaba kya kumutōta Aye.—1 Kodinda 5:11; 6:18; 10:14; Efisesa 4:28; Kolose 3:9.

8, 9. Le tuyukanga namani byobya bitusakila Yehova kulonga mu myanda kemudipo kijila kya patōkelela kya mu Bible? Leta kimfwa.

⁸ Inoko pa kusangaja Yehova, ketufwaninwepo’tu’nka kukōkela mbila yandi kete. Ketupēlepo mulongo wa bijila byotufwaninwe kulonda mu kamwanda ko-konso mu būmi. O mwanda kukekala kitatyi kyotukatanwa na mwanda keudipo na kijila kya patōkelela mu Bible kitulombola bya kulonga. Le tukakwata butyibi buyampe namani? (Efisesa 5:17) Mu Bible mudi misoñanya, ko kunena’mba bubine bwa kyalwilo bwitufundija muswelo umona Yehova bintu. Kadi potutanga Bible, tuyukanga Yehova bu Muntu  udi’ko bine. Tuyukanga mwalangila, kubadila’mo ne bintu byasenswe ne byashikilwe.—Tanga Ñimbo ya Mitōto 97:10; Nkindi 6:16-19; tala Bilembwa bya ku Mfulo 1.

⁹ Kimfwa, i muswelo’ka otutoñanga bya kutala ku televijo nansha pa Entelenete? Yehova ketulombwelepo bine byotufwaninwe kulonga. Inoko misoñanya yaetupele iketukwasha tukwate butyibi buyampe. Mu myanda mivule ya kwipwija nayo mukose dyalelo i muyule lūma ne busekese. Yehova witulombola mu Bible amba “ushikilwe yewa ense usenswe bya lūma” ne amba “ukatyibilanga ba busekese” mambo. (Ñimbo ya Mitōto 11:5; Bahebelu 13:4) Le ino misoñanya ibwanya kwitukwasha namani tukwate butyibi buyampe? Shi tubayuka’tu amba Yehova ushikilwe kintu kampanda nansha’mba wikimonanga bu kyamunyanji, tufwaninwe kwikyepuka.

10, 11. Mwanda waka tukōkelanga Yehova?

¹⁰ Mwanda waka tukōkelanga Yehova? Ke mwandapo’tu wa kutyina kupebwa mfuto nansha kufikilwa na makambakano alupuka ku butyibi bubi. (Ngalatea 6:7) Na bubine, tukōkelanga Yehova mwanda tumusenswe. Pamo’nka bwa bana mobasakilanga kusangaja shabo, netu tusakanga kusangaja Tata wetu wa mūlu. Kekudipo kintu kilumbuluke pamo bwa kuyuka’mba Yehova witusangedile!—Ñimbo ya Mitōto 5:12; Nkindi 12:2; tala Bilembwa bya ku Mfulo 2.

¹¹ Ketukōkelangapo Yehova enka pobitupēlela nansha mwanda wa kufudilwa. Kadi ketutoñengapo bijila ne mbila ya kulonda ne ya kuleka kulonda. (Kupituluka 12:32) Ino, tumukōkelanga mu byonso, pamo  bwa kaimba wa mitōto wānenene amba: “Nsenswe bikatampe mbila yobe, bine, neisenswe.” (Ñimbo ya Mitōto 119:47; Loma 6:17) Tusakanga kwikala pamo bwa Noa, mwine wālombwele amba usenswe Yehova na kulonga byonso byāmusoñenye Yehova kulonga. Bible unena’mba Noa “wālonga enka nabya.” (Ngalwilo 6:22) Lelo nobe usaka Yehova akunene namino?

12. Le i muswelo’ka otubwanya kusangaja Yehova?

¹² Lelo Yehova wiivwananga namani kitatyi kyotumukōkela? Tusangajanga “mutyima wandi.” (Nkindi 11:20; 27:11) Langa’po bidi! Tusangajanga Umpangi wa diulu ne ntanda kitatyi kyotumukōkela. Inoko ketuningilangapo nansha dimo. I mwitupe bwanapabo bwa kwitongela. Ko kunena’mba tudi na bwanapabo bwa kutonga kulonga kiyampe nansha kibi. Yehova usakanga buswe botumusenswe bwitutonone tukwate butyibi buyampe mwanda wa twikale na būmi bulumbuluke’po kashā.—Kupituluka 30:15, 16, 19, 20; tala Bilembwa bya ku Mfulo 3.

13, 14. Le tubayuka namani amba mbila ya Leza ke mikomopo kukōkela? Leta kimfwa.

¹³ Le bikekala namani shi tulanga’mba mbila ya Yehova i mikomo bininge kukōkela nansha’mba ituyatanga bwanapabo bwetu? Bible unena’tu patōka’mba: “Mbila yandi keilēmangapo.” (1 Yoano 5:3) Mu bisonekwa bikwabo, kino kishima i kingidijibwe pa kwisambila pa bijila byampikwa kwendela’mo nansha pa bantu bakimba kutādila ne kususula bakwabo. (Mateo 23:4; Bilongwa 20:29, 30) Bible Myanda  Miyampe i munene’po amba: “Binenwa byandi kebyakwitulemenapo.” Mbila ya Yehova “keilēmangapo,” ko kunena’mba, ke mikomopo bininge kukōkela. Yehova wikalanga nyeke na bujalale mu byaetulomba kulonga.

¹⁴ Kimfwa, fwatakanya ukwasha mulunda nobe uvilukila mu njibo mipya. Wakute bitundu byandi byonso. Bimo bipēla kutekuna, bikwabo nabyo bilēma bininge, bilomba bantu babidi pa kwibitekuna. Le mulunda nobe ukakunena utekune bunka kitundu kilēma bininge? Aa, kebibwanikapo! Mwanda waka? Mwanda kasakengapo wisanshije. Pamo bwa uno mulunda, Yehova ketulombengapo nansha dimo bintu bikomo bininge. (Kupituluka 30:11-14) Yehova uyukile senene motwikadile. “Uyukile biyampe motubumbīlwe, uvulukanga’mba twi luvumbi.”—Ñimbo ya Mitōto 103:14.

15. Mwanda waka tubwanya kukulupila’mba mbila ya Yehova idi’ko mwanda wa twikale biyampe?

¹⁵ Mosesa wālombwele muzo wa Isalela amba mbila ya Yehova idi’ko mwanda wa “bekale biyampe myaka na myaka” ne amba kikōkeji kyabo kikebakwasha bekale “nyeke bōmi.” (Kupituluka 5:28-33; 6:24) Mo mobikadile ne dyalelo. Byonso bitulomba Yehova kulonga bilumbululanga būmi bwetu. (Tanga Isaya 48:17.) Yehova, Tata wetu, uyukile nyeke byobya biyampe kotudi. (Loma 11:33) Bible witusapwila’mba: “Leza i buswe.” (1 Yoano 4:8) Kino kishintulula’mba byonso binena Yehova ne byalonga, uloñanga’byo na buswe.

16. Le tubayuka namani amba tubwanya kwikala na kikōkeji nansha byotudi bampikwa kubwaninina kadi mu ntanda mibi?

 ¹⁶ Kebitupēlelangapo nyeke kukōkela Leza. Tudi mu ntanda mibi iludikwa na Dyabola. Ukimbanga kutonona bantu balonge bibi. (1 Yoano 5:19) Kadi tulwanga na milangwe ne mwiivwanino wetu wa kubulwa kubwaninina, bine bibwanya kwitulengeja tuleke kukōkela Leza. (Loma 7:21-25) Inoko buswe botusenswe Yehova bwitupanga bukomo bwa kulonga byoloke. Nandi umonanga bukomo botulonga bwa kumukōkela, kadi witukwashanga na kwitupa mushipiditu wandi ujila wa bukomo. (1 Samwele 15:22, 23; Bilongwa 5:32) Mushipiditu ujila witukwashanga tutamije ngikadila itukwasha tupēlelwe kumukōkela.—Ngalatea 5:22, 23.

17, 18. (a) I myanda’ka yotusa kwifunda mu kino kitabo? (b) I bika byotukesambila’po mu shapita ulonda’ko?

¹⁷ Mu kino kitabo, tusa kwifunda’mo mwa kwikadila na būmi busangaja Yehova. Kadi tusa kwifunda’mo mwa kwingidijija mu būmi bwetu misoñanya ne mbila yandi ya mu mwikadilo. Vuluka’mba Yehova ketuningilangapo tumukōkele. Shi tutonge kumukōkela, būmi bwetu bukalumbuluka kadi mu mafuku a kumeso tukekala na būmi buyampe. Kya mvubu nakampata, kikōkeji kyetu kikalombola Leza amba tumusenswe bininge.—Tala Bilembwa bya ku Mfulo 4.

¹⁸ Pa kwitukwasha tuyuke kiyampe ne kibi, Yehova i mwitupe batwe bonso mutyima wa mundamunda. Shi tufundije mutyima wetu wa mundamunda, uketukwasha “tulame mbila yandi.” Le penepo, mutyima wetu wa mundamunda i bika, ne tukeufundija namani? Tutalei.