1, 2. Le i bika byotufwaninwe kulonga pa kwikala nyeke mu buswe bwa Leza?

BATWE bonso tusakanga kwikala bakomo ne na bukomo bwa ngitu buyampe. O mwanda tukimbanga kudya byakudya biyampe, kwitamuna ngitu kyaba ne kyaba, ne kulela umbidi wetu. Nansha kulonga namino byokulombanga bukomo, tusangelanga bipa bilupuka’ko, o mwanda ketukōkangapo. Inoko kadi tufwaninwe kwikala bakomo ne na bukomo bwa ngitu buyampe mu muswelo mukwabo.

² Nansha byotwashilwile biyampe kwifunda kuyuka Yehova, tufwaninwe kwendelela kuningija kipwano kyetu nandi. Yude paākankamikile bene Kidishitu amba, “Mwilame mu buswe bwa Leza,” wāshintulwile muswelo obādi ba kwilama’mo. Wēbalombwele amba: “Mwitamijei banwe bene mu lwitabijo lwenu lujila nakampata.” (Yude 20, 21) Le penepo i muswelo’ka otubwanya kutamija lwitabijo lukomo?

3-5. (a) Le Satana usakanga umone mbila ya Yehova namani? (b) Le nobe umonanga namani bijila ne misoñanya ya Yehova?

³ I kya mvubu ukulupile abe mwine amba mashinda  a Yehova i malumbuluke. Satana usakanga ulange amba mbila ya Leza i mikomo bininge kulonda ne amba ukekala na nsangaji shi witongela abe mwine kiyampe ne kibi. Tamba mu budimi bwa Edena, Satana uloñanga bukomo bwa kulengeja bantu balange uno muswelo. (Ngalwilo 3:1-6) Kadi ukiloñanga bukomo ne dyalelo.

⁴ Le Satana udi na bubinga? Le mbila ya Yehova i mitutyinye bininge? Aa. Tulete kimfwa: Langa’po bidi wenda mu kiwanza kilumbuluke kya mityi. Amba utale, ubamone lupango lulampe lujikakanye kifuko kampanda. Padi ubwanya kulanga’mba, ‘Mwanda waka luno lupango lubanjike kumeso?’ Ino kepejije, ubaivwana ntambo ubuluma bukila bukwabo bwa lupango. Le pano ukamona namani lupango’lwa? Ukafwija’ko bininge amba lubakukinge ku kudibwa na ntambo! Misoñanya ya Yehova idi pamo bwa luno lupango, kadi Dyabola nandi udi pamo bwa uno ntambo. Kinenwa kya Leza kitudyumuna’mba: “Lamai ñeni yenu mibwane, tadijai! Walwana nenu, Dyabola, unangakananga koku ne koku pamo bwa ntambo ubuluma, ukimba wa kubokota.”—1 Petelo 5:8.

⁵ Bine, Yehova usakanga twikale na būmi bulumbuluke. Kasakengapo tongolwe na Satana. Kyo kyaetupedile bijila ne misoñanya mwanda wa twikale na nsangaji. (Efisesa 6:11) Yakoba wālembele amba: “Yewa utadija mu kijila kibwaninine kya bwanapabo ne kutakamena’mo, kakidipo muntu uteja’tu wailwa’ko, aa, ino ke wa kulonga mwingilo; kadi ukasangela byobya byalonga.”—Yakoba 1:25.

6. Le i muswelo’ka otubwanya kukulupila’mba mashinda a Yehova i malumbuluke?

⁶ Kitatyi kyotulonda buludiki bwa Yehova, būmi bwetu bulumbulukanga kadi kipwano kyetu nandi kiningilanga’ko. Kimfwa, tumwenanga’mo kitatyi  kyotwitabija lwito lwaetwityile lwa kulombela kwadi kyaba ne kyaba. (Mateo 6:5-8; 1 Tesalonika 5:17) Twikalanga na nsangaji kitatyi kyotukōkela bulombodi bwandi bwa kwibungila pamo mwanda wa kumutōta ne kwikankamika batwe bene na bene ne kitatyi kyotwingila bininge mwingilo wa kusapula ne kufundija. (Mateo 28:19, 20; Ngalatea 6:2; Bahebelu 10:24, 25) Kitatyi kyotulangulukila pa muswelo witukwasha bino bintu tulame nyeke lwitabijo lukomo, tukulupilanga bininge amba mashinda a Yehova i malumbuluke.

7, 8. Le i bika biketukwasha tuleke kuzumbija mutyima pa matompo abwanya kuketutana mu mafuku a kumeso?

⁷ Tubwanya kuzumbija mutyima’mba mu mafuku a kumeso tukatanwa na matompo makomo mu lwitabijo lwetu. Shi ye mowiivwaninanga, vuluka binenwa bya Yehova bya amba: “Ami Yehova, ne Leza obe, Mwine  ukufundija mwanda wa kamweno kobe, Mwine ukwendeja mu dishinda dyofwaninwe kwenda. Yō, shi watele’tu mutyima ku mbila yami! Longa ndoe yobe yadi ya kwikala pamo bwa munonga ne boloke bobe pamo bwa mantanki a dijiba.”—Isaya 48:17, 18.

⁸ Shi tukōkele Yehova, ndoe yetu ikekala pamo bwa munonga keumepo, kadi boloke bwetu bukekala pamo bwa mantanki a dijiba ekalanga akenda nyeke kyabu. Nansha tutanwe na myanda’ka mu bwetu būmi, tubwanya kwikala na kikōkeji. Bible i mulaye amba: “Ela kiselwa kyobe kilēma padi Yehova, nandi ukakukwasha. Kakalekapo nansha dimo moloke apone.”—Ñimbo ya Mitōto 55:22.

9, 10. Lelo kwikala mutame kushintulula bika?

⁹ Poenda uningija kipwano kyobe na Yehova, ‘ukeelela’ko bininge kufikila pa butame.’ (Bahebelu 6:1) Lelo kwikala mutame kushintulula bika?

¹⁰ Kwikala bene Kidishitu batame ke kwikalapo’tu na myaka mivule. Pa kwikala batame, tufwaninwe kupwana bininge na Yehova ne kumona bintu mwaebimwena. (Yoano 4:23) Polo wālembele amba: “Boba beendeja mwendele ngitu batanga mityima yabo ku bintu bya ngitu, ino boba beendeja mwendele mushipiditu, ku bintu bya mushipiditu.” (Loma 8:5) Muntu mutame katengapo mutyima bininge ku kwisangaja nansha ku bintu bya ku ngitu. Inoko, utanga mutyima bininge ku kwingidila Yehova kadi ukwatanga butyibi buyampe mu būmi. (Nkindi 27:11; tanga Yakoba 1:2, 3.) Ketabijangapo kulonga bibi. Muntu mutame uyukile kyokya kiyampe kadi usumininwe kwikilonga.

11, 12. (a) Le Polo wānenene bika pa ‘ñeni ya kujingulula bintu’ ya mwine Kidishitu? (b) Le kwikala mwine Kidishitu mutame kwiifwene namani na kwikala mukayi?

 ¹¹ Bilombanga bukomo pa kwikala batame. Mutumibwa Polo wālembele amba: “Byakudya bikomo i bya bantu batame, boba bebidije kala ñeni yabo ya kujingulula bintu na kwingidija’yo, mwa kushiañenya ne kiyampe ne kibi.” (Bahebelu 5:14) Kishima “bebidije” kibwanya kwitupa mulangwe wa kwiibidija kwa mukayi.

¹² Potumonanga mukayi wa bwino ukaya, tujingululanga’mba byamulombele kitatyi ne kwiibidija pa kutamija bwino bwandi. Kabutwilwepo mukayi. Kitatyi kibutulwa mwana, kayukangapo ne mwine mwa kwingidijija makasa andi ne maulu. Inoko mwenda mafuku, wefunda muswelo wa kukwata bintu ne muswelo wa kwenda. Na kwiibidija, ubwanya kwikala mukayi. Muswelo umo onka, bitulombanga kitatyi ne kwiibidija pa kwikala bene Kidishitu batame.

13. Le i bika biketukwasha twikale na mulangilo wa Yehova?

¹³ Mu kino kitabo, tubefunde’mo muswelo otubwanya kulanga mulangila Yehova ne kumona bintu mwaebimwena. Tubefunde’mo kusangela ne kusanswa mbila ya Yehova. Shi kokwata butyibi, wiipangule’mba: ‘Le i misoñanya’ka nansha bijila’ka bya mu Bible bitala pa uno mwanda? Le mbwanya kwibingidija namani? Le i bika binsakila Yehova kulonga?’—Tanga Nkindi 3:5, 6; Yakoba 1:5.

14. Le i bika byotufwaninwe kulonga shi tusaka kutamija lwitabijo lwetu?

¹⁴ Ketulekangapo nansha dimo kutamija lwitabijo lwetu mudi Yehova. Monka mwitukwashishanga kudya byakudya bya bumeni pa kutamija imbidi ikale mikomo, kwifunda kuyuka Yehova nako kwitukwashanga tutamije lwitabijo lukomo. Potwashilwile kwifunda Bible, twefundile bubine bwa kyalwilo butala padi Yehova ne mashinda  andi. Inoko kitatyi pokyenda kipita, tufwaninwe kwivwanija bintu bya mushike. Byo byādi bisaka kunena Polo paānenene amba: “Byakudya bikomo i bya bantu batame.” Kitatyi kyotwingidija bintu byotwifunda, tumwenanga’mo tunangu. Bible witusapwila’mba: “Tunangu kyo kintu kya mvubu kutabuka.”—Nkindi 4:5-7; 1 Petelo 2:2.

15. Mwanda waka i kya mvubu tusanswe bya binebine Yehova ne batutu ne bakaka?

¹⁵ Muntu ubwanya kwikala mukomo ne na bukomo bwa ngitu buyampe, inoko pa kushala nyeke namino, uyukile’mba ufwaninwe kwendelela kwikwatakanya aye mwine. Muswelo umo onka, muntu mutame uyukile amba ufwaninwe kulonga bukomo pa kulama nyeke kipwano kyandi kikomo na Yehova. Polo wituvuluja’mba: “Mwitompei nyeke shi mudi mu lwitabijo; jingululai nyeke momwikadile banwe bene.” (2 Kodinda 13:5) Shako, ketusakilwapo’nka kwikala na lwitabijo lukomo kete. Tufwaninwe kutamija nyeke ne buswe botusenswe Yehova ne batutu ne bakaka. Polo wānenene amba: “Shi ngidi na . . . buyuki . . . kadi shi ngidi na lwitabijo lonso lutundulula ngulu, ino kwikala na buswe mpika, nabya ami ne wa bitupu.”—1 Kodinda 13:1-3.

16. Lelo Satana usakanga twiivwane namani?

¹⁶ Satana usakanga tulange’mba ketubwanyapo nansha dimo kusangaja Yehova. Usakanga tutyumukwe mutyima ne kulanga’mba kekudipo kikapwija makambakano etu. Kasakengapo tukulupile banabetu bene Kidishitu, kadi kasakengapo twikale na nsangaji. (Efisesa 2:2) Satana uyukile’mba milangwe mibi ibwanya kwituzozeja ne kona kipwano kyetu na Leza. Inoko Yehova i mwitupe kintu kya kwitukwasha tulwe na milangwe mibi. I mwitupe lukulupilo.

17. Le lukulupilo ludi na kamweno’ka?

 ¹⁷ Mu 1 Tesalonika 5:8, Bible udingakanya lukulupilo lwetu na kilama-mutwe kikiñanga mutwe wa sola mu bulwi, na kutela kino kilama-mutwe bu “lukulupilo lwa lupandilo.” Kukulupila mu milao ya Yehova kubwanya kukinga ñeni yetu ne kwitukwasha tukomene milangwe mibi.

18, 19. Le lukulupilo lwākomeje Yesu namani?

¹⁸ Lukulupilo lwādi na Yesu lwāmukomeje. Mu bufuku bwa mfulo bwa būmi bwandi pano pa ntanda, wēkondele na makambakano makomo, kwadi aa ke aa. Mulunda nandi wa pabwipi wāmwaba. Mukwabo nandi wāmutuna’mba kamuyukilepo. Bakwabo nabo bamushiya ne kunyema. Bantu ba mu yabo ntanda bo bāmwimanine midindi ibidi, na kulomba epaibwe ku mutyi wa masusu. Le i bika byāmukweshe ominine bino bintu bisansa bininge? “Pa mwanda wa nsangaji yādi  imutūdilwe kumeso waūminine mutyi wa masusu, ne kubanga bumvu mpika, washikata ku lundyo lwa lupona lwa Leza.”—Bahebelu 12:2.

¹⁹ Yesu wādi uyukile’mba shi alame kikōkeji, ukatumbija Shandi ne kulombola’mba Satana i mbepai. Luno lukulupilo lwāmuletēle nsangaji mikatampe. Kadi wādi uyukile’mba panopano ponka ukekala monka na Shandi pamo momwa mūlu. Luno lukulupilo lwāmukweshe ominine. Pamo bwa Yesu, tufwaninwe kubambila sō pa lukulupilo lwetu. Luketukwasha tūminine nansha shi tubatanwa na bika.

20. I bika bikakukwasha wikale na milangwe miyampe?

²⁰ Yehova umonanga lwitabijo lobe ne kūminina koūminina. (Isaya 30:18; tanga Malaki 3:10.) I mulaye kukupa “bisakasaka mutyima obe.” (Ñimbo ya Mitōto 37:4) Nanshi bambila nyeke ñeni yobe pa lukulupilo lobe. Satana usakanga ujimije lukulupilo lobe ne  kumona’mba milao ya Yehova keikafikidilapo nansha dimo. Inoko kokekala na ino milangwe mibi! Shi kukimonepo lukulupilo lobe bu lwa bine, nankyo lomba Yehova akukwashe. Vuluka binenwa bidi mu Fidipai 4:6, 7 bya amba: “Kemwakizumbijai mityima pa kintu nansha kimo, inoko mu byonso, yukijai Leza byomulomba mu milombelo ne kuzenza pamo ne kufwija’ko; kadi ndoe ya Leza itabukile ñeni yonso ikalama mityima yenu ne mifwatakanyo yenu kupityila kudi Kidishitu Yesu.”

21, 22. (a) Le Yehova udi na mpango’ka pa ino ntanda? (b) Le ubasumininwa kulonga bika?

²¹ Witūdile’ko kyaba kyonso kitatyi kya kulangulukila pa bintu bisangaja bikutengele kumeso. Panopano ponka, bantu bonso bōmi basa kutōta Yehova. (Kusokwelwa 7:9, 14) Abe langulukila’tu pa būmi bwa mu ntanda mipya. Bukekala bulumbuluke kutabuka byonso byotufwatakanya! Satana, bandemona bandi, ne bibi byonso kebikekala’kopo monka. Kukabelapo nansha kufwa kwine. Inoko, ukabūka difuku dyonso na bukomo buvule ne na nsangaji ya kwikala mūmi. Bantu bonso bakengidila pamo mwanda wa kwalamuna ntanda ke paladisa. Bantu bonso bakekala na byakudya biyampe ne na bifuko biyampe mwa kushikata. Bantu kebakekalapo babipolapola nansha ba lūma, ino bakekala na kanye ka binebine umo ku mukwabo. Mwenda mafuku, bantu bonso pano pa ntanda bakekala na “bwanapabo bwa ntumbo budi na bana ba Leza.”—Loma 8:21.

²² Yehova usakanga wikale mulunda nandi wa pa mutyima. Nanshi longa byonso byobwanya mwanda wa kumukōkela ne kumufwena difuku ne difuku. Shi ke pano, batwe bonso twikalei nyeke ne nyeke mu buswe bwa Leza!—Yude 21.