Yesu Kidishitu i Mwanā Yehova, ye mulunda nandi wa pa mutyima, wandi muswedibwe. Yesu, kumeso kwa kwiya’ye pano pantanda bu muntu, wādi’ko kala mūlu bu kipangwa kya bukomokomo kya kumushipiditu. (Yoano 17:5) Kupwa wāiya pano pantanda kufundija bantu bubinebine butala padi Leza. (Yoano 18:37) Wāpāna ne būmi bwandi bwa bu muntu mwanda wa kukūla bantu bakikōkeji ku bubi ne ku lufu. (Loma 6:23) Yesu pano i Mulopwe wa Bulopwe bwa Leza, umbikalo wa mūlu ukaleta Paladisa pano pantanda.—Kusokwelwa 19:16.

Bamwikeulu nabo i balunda na Leza. Bamwikeulu kebāshilwilepo bidi būmi bwabo bu bantu pano pantanda. Bāpangilwe mūlu kumeso kwa Leza kulonga ino ntanda. (Yoba 38:4-7) Bamwikeulu i bavule, badi midiyo na midiyo. (Danyele 7:10) Bano balunda na Leza ba mūlu basakanga bantu bayuke bubinebine butala padi Yehova.—Kusokwelwa 14:6, 7.

Leza udi monka na balunda nandi pano pantanda; wibetanga bu batumoni bandi. Mu kidye, kamoni ye usapulanga myanda yayukile itala pa muntu kankenge nansha pa kintu kampanda. Batumoni ba Yehova basapwilanga bantu myanda yobayukile itala padi Yehova ne pa mpango yandi. (Isaya 43:10) Batumoni basakanga kukukwasha uyuke bubinebine butala padi Yehova, pamo na musakila bamwikeulu. Bakusakila nobe wikale mulunda na Leza.