Mwine mukatampe walwana na Leza i Satana Dyabola. I kipangwa kya kumushipiditu kyātombokēle Yehova. Ne pano Satana ukilwanga na Leza, koku kadi uletela bantu makambakano mavule. Satana i umbi wa nshikani. I mbepai, kadi i ntapañani.—Yoano 8:44.

Bipangwa bikwabo bya kumushipiditu byālondele Satana, nabyo byātombokela Leza. Bible wibitela bu bademona. Bademona i balwana na bantu pamo’nka bwa Satana. Baswele kususula bantu. (Mateo 9:32, 33; 12:22) Yehova ukonakanya Satana ne bademona bandi lonso jimejime. Kakitatyi kebashadila’ko ka kukambakanya bantu ke katyutyu.—Kusokwelwa 12:12.

Shi usaka kwikala mulunda na Leza, kokilonga bikusakila Satana. Satana ne bademona bashikilwe Yehova. I balwana na Leza, o mwanda basaka kukwalamuna ne abe nobe wikale walwana na Leza. Nanshi ufwaninwe kutonga okatōkeja pa mutyima—shi Satana, shi Yehova. Shi usaka būmi bwa nyeke, alwila’ko kutonga kulonga kiswa-mutyima kya Leza. Satana udi na makinga ne miswelo mivule yalubijanga nayo bantu. Bantu bavule bongolwanga nandi.—Kusokwelwa 12:9.