Shi usaka kwikala mulunda na Leza, funda bidi kumuyuka. Mwene balunda nobe bayukile dijina dyobe, bakwita’dyo ne kukwita? Bediyukile. Leza nandi ukusakila kuyuka dijina dyandi, mwa kumwityila. Dijina dya Leza i Yehova. (Mitōto 83:18; Mateo 6:9) Kadi ufwaninwe kuyuka ne bintu byasakanga ne byashikilwe. Bikusakila kuyuka balunda nandi i bāni ne balwana nandi i bāni. Kuyuka muntu kulombanga kitatyi kilampe. O mwanda Bible unena amba i biyampe kwitūdila’ko kitatyi kya kufunda kuyuka Yehova.—Efisesa 5:15, 16.

Balunda na Leza baloñanga bintu bimusangaja. Langa’po bidi balunda nobe. Shi wibaloñanga bibi, ulonga bintu byobashikilwe, ulanga bakekala nyeke balunda nobe? Mhm! Ne kwikala mulunda na Leza nako mo monka, kukusakila kulonga bintu bimusangaja.—Yoano 4:24.

Ke mitōtelo yonsopo ifikijanga bantu ku kusamba bulunda na Leza. Yesu, mulunda na Leza wa pa mutyima, wānene amba kudi mashinda abidi. Dimo dikatampe, diyule’mo bantu bā. Dine dishinda’dyo ditwalanga ku konakanibwa. Dikwabo dityetye, ne bantu bene benda’mo nabo batyetye. Dyo dishinda ditwala ku būmi bwa nyeke. Ko kunena’mba shi usaka kusamba bulunda na Leza, ufwaninwe kufunda kuyuka muswelo moloke wa kumutōta.—Mateo 7:13, 14.