Kusamba bulunda i kwielela’ko; ne kulama bulunda nako i kwielela’ko. Bukomo bolonga pa kwikala ne kushala nyeke mulunda na Leza bukakuletela madyese mavule. Yesu wānene bantu bāikele kumwitabija amba: ‘Bubinebine bukemupa bwanapabo.’ (Yoano 8:32) Lelo kino kishintulula namani?

Ubwanya kwikala na bwanapabo tamba pano. Ubwanya kukūlwa ku bufundiji bwa bubela ne ku bubela buzambaleje Satana pi na pi. Ubwanya ne kukūlwa ku kubulwa lukulupilo lubudilwe midiyo ne midiyo ya bantu bakubulwa kuyuka Yehova. (Loma 8:22) Balunda na Leza i bakūlwe ne ku “moyo wa lufu.”—Bahebelu 2:14, 15.

Ubwanya kukekala mu bwanapabo mu ntanda impya ya Leza. Bine, i bwanapabo bwabinebine bokekala nabo mu mafuku a kumeso! Mu Paladisa pano pantanda, bantu bakekala banapabo, bakūlwe ku mavita, ku misongo ne ku bupolapola. Banapabo bampikwa bulanda nansha nzala. Banapabo bampikwa kununupa nansha kufwa. Banapabo bakūlwe ku moyo, ku kasusu ne ku mboloji. Bible wisambila padi Leza amba: “Ubalanga kuboko kobe, wikutyija mityima ya bintu byonso byumi.”—Mitōto 145:16.

 Balunda na Leza bakekalanga’ko nyeke ne nyekeke. Būmi bwa nyeke i kyabuntu kilēme kikapāna Leza ku boba bonso basaka kusamba nandi bulunda. (Loma 6:23) Langa’po bidi mokekadila mu būmi bwampikwa mfulo!

Ukekala na kitatyi kya kulonga bintu bivule. Kekubulwe padi usakanga kwifunda komba kyombanwa kampanda. Padi usakanga kwifunda kufwatula bifwatulo nansha kwikala mukōdi wa mbao. Padi kadi usakanga kwifunda myanda ya banyema ne mityi. Pakwabo kadi usakanga kwenda ñendo ya kwenda kuyuka matanda meshileshile ne bantu pala pala. Kwikala na būmi bwa nyeke kukakupa kyaba kilampe kya kubwanya bino byonso!

Ukekala na kitatyi kya kusamba bulunda na bantu bavule. Kwikala na būmi bwa nyeke kukakupa muswelo wa kuyuka bantu bavule balunda na Leza. Ukayuka byabuntu bya mingilo byobapelwe ne ngikadilo yabo milumbuluke, nabo bakekala balunda nobe. Ukebaswa, nabo bakakuswa. (1 Kodinda 13:8) Kwikala na būmi bwampikwa mfulo kukakupa kyaba kilampe kya kusamba bulunda na muntu ye-yense pano pantanda! Ino kiyampe kupityidila kine i kino, ato tutwa na tutwa twa myaka tupwa tupunguluka, bulunda bosambile na Yehova nabo bwenda buloa. Bine nobe ikala mulunda na Leza nyeke ne nyekeke!