Shi udi na mulunda owitembanga, olēmekele, nobe kubulwepo kwielela’ko kwikala mwaikadile. “Yehova i muyampe, moloke swā,” mo munenena Bible. (Mitōto 25:8) Netu pa kwikala balunda na Leza, tufwaninwe kwikala bayampe, boloke swā. Bible unena’mba: ‘Ikalai beudi ba Leza, bu bana baswedibwe, ne kadi endelelai na kunangila mu buswe.’ (Efisesa 5:1, 2) Ivwana miswelo imoimo ya kumwiula:

Kwasha bakwenu. “Tulonge biyampe ku bakwetu bonso.”—Ngalatea 6:10.

Putumina mu mingilo. “Wakwiba nandi ebuleke bwivi bwandi; nanshi aputumine mu mīngilo ya kwingila ne makasa andi kyokya kilumbuluke.”—Efisesa 4:28.

Ikala utōka, ku ngitu ne mu mwikadilo. “Twioīje bātwe bene ku bubi bonso bwa ku ngitu, ne bwa ku mushipiditu, ne kufikijija bupandulwemo kutyina Leza moyo.”—2 Kodinda 7:1.

 Kwata ba mu kisaka kyenu na buswe ne na bulēme. “Bonso bēkale kusanswa bakaji babo pamo bwa abo bene; . . . mukaji nandi alemeke mulumyandi. . . . Bānwe bāna, kōkelai bakwimubutula.”—Efisesa 5:33–6:1.

Sanswa bakwenu. “Twisanswei batwe bene na bene, ku mwanda buswe butamba kudi Leza.”—1 Yoano 4:7, BB.

Kōkela ku bijila bya ntanda yoshikete’mo. “Bantu bonso bēkale kukōkela [umbikalo] . . . Lambulai kudi abo bonso mo kyendelemo, musonko wende ku bamusonko.”—Loma 13:1, 7.