Paladisa keikekalapo mwikadile ino ntanda yotudi’mo dyalelo. Leza kāsakilepo nansha dimo ntanda ikale miyule makambakano ne bulanda, misongo ne masusu. Kumeso kotwenda’ku, Leza ukalongolola ntanda ke paladisa. Paladisa mine ikekala namani? Twivwanei munenena’po Bible:

Bantu bayampe. Paladisa ikekala kikalo kya balunda na Leza. Bakelongela biyampe abo bonso. Būmi bwabo bukakwatañana na mashinda moloke a Leza.—Nkindi 2:21.

Bidibwa milwi na milwi. Mu Paladisa kemukekalapo nzala. Bible unena’mba: “Kukēkalanga bungibungi bwa mebele [bidibwa] panopantanda.”—Mitōto 72:16.

Mobo malumbuluke ne mingilo ileta nsangaji. Mu Paladisa ikekala’ko pano panshi, kisaka ne kisaka kikekala na lubanza lwakyo. Muntu ne muntu ukengila mingilo imupa nsangaji.—Isaya 65:21-23.

 Ndoe pano pantanda ponso. Bantu kebakikelupo dikwabo, nansha kufwa mu mavita. Kinenwa kya Leza kinena’mba: “[Leza] watukija mavita.”—Mitōto 46:8, 9.

Bukomo bwa ngitu buyampe. Bible ulaya’mba: “Mwikadi [wa mu Paladisa] kakanenapo’mba: Nabela.” (Isaya 33:24) Kadi kemukekalapo mulemane, mpofu, wa matwi majike nansha kamama.—Isaya 35:5, 6.

Misongo, bulanda, ne lufu bikapwa. Kinenwa kya Leza kinena’mba: “Lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 21:4.

Babi bonso bakatukila. Yehova ulaile amba: “Bapupakane bakatyibibwa ku ntanda’ya, kadi banzazangi bakatukunwamo.”—Nkindi 2:22.

Bantu bakeswa ne kwilēmeka abo bonso. Mboloji, kususujañana, lwiso ne mushikwa kebikekala’kopo dikwabo. Bantu bakekala umbumo, kadi būmi bwabo bukakwatañana na mashinda moloke a Leza.—Isaya 26:9.