Leza ukusakila wikale mulunda nandi. Lelo kasha kodi kala mulange amba ubwanya kwikala mulunda na Muntu mukatakata kupita bonso mūlu ne pano panshi? Abalahama, muntu wādi’ko kalā, wātelelwe bu mulunda na Leza. (Yakoba 2:23) Kudi bantu bakwabo ba mu Bible bādi basambile bulunda na Leza, bāeselwa madyese makatampe. Ne dyalelo nadyo mo monka, kudi bantu ba mu bifuko byonso bya ntanda bekele balunda na Leza. Nobe ubwanya kwikala mulunda nandi.

Kwikala mulunda na Leza i kutabuke buya kwikala mulunda wa muntu ye-yense. Leza kafwijangapo balunda nandi bumvu nansha dimo. (Mitōto 18:25) Kwikala mulunda na Leza i kutabuke buya kwikala na bupeta. Shi mpeta wafu, lupeto lwandi lwendanga ku bantu bangi. Ino boba basambile bulunda na Leza badi na bupeta bokebanyongololwapo na muntu nansha umo.—Mateo 6:19.

Bantu bamobamo bakokeja kukukalakanya amba uleke kufunda kuyuka Leza. Pakwabo balunda nobe ne babutule bobe bamobamo nabo bakokeja kukukalakanya. (Mateo 10:36, 37) Shi bantu bakusepa nansha bakuzakaja, wiipangule amba, ‘Le mwine onsaka kusangaja i ani—i bantu’ni nansha i Leza?’ Langa kino: Shi muntu waiya kakunena amba leka kudya, lelo ukamukōkela? Mhm, kukamukōkelapo! Mwanda pa kwikala mūmi, ufwaninwe’nka kudya. Ino Leza aye ubwanya kukwikadija mūmi nyeke ne nyeke! Nanshi kokolwa kuleka muntu, shi ani shi ani, usaka kukubudija kufunda kuyuka muswelo obwanya kwikala mulunda na Leza.—Yoano 17:3.