Kwikala mulunda na Leza kyo kintu kilumbuluke kupita byonso. Leza ukakufundija mwa kwikadila na nsangaji ne na mutyima-ntenke; ukakulupula mu bupika bwa nkulupilo ya bubela ne milongelo ileta lufu. Ukevwana milombelo yobe. Ukakukwasha wikale na kikulupiji ne ndoe ku mutyima. (Mitōto 71:5; 73:28) Leza ukakukwatakanya mu bitatyi bya makambakano. (Mitōto 18:18) Kadi ukakupa kyabuntu kyandi kya būmi bwa nyeke.—Loma 6:23.

Shi wifwenye kudi Leza, ubefwenya ne kudi balunda nandi. Nabo bakekala ke balunda nobe. I kyabine, bakekala kodi pamo’nka bwa batutu ne bakaka. Bakasepelela kukufundija myanda itala padi Leza, bakakukwasha ne kukukankamika.

Ketudipo mu ludingo lumo na Leza. Shi usaka kusamba bulunda na Leza, ufwaninwe kwivwanija kino kintu kya mvubu. Bulunda na Leza i bwishile na bulunda bwa bantu ba ludingo lumo. Aye i mukulu wa kalā, wa tunangu tuvulevule, kadi mukomo mpata kwitupita batwe. Ye mwine udi na bubinga bwa kwikala Muludiki wetu. Nanshi shi tusaka kwikala balunda nandi, tufwaninwe kuteja byaetulombola ne kulonga byonso byaetunena. Shi tulonge namino, tukamona biyampe.—Isaya 48:18.