Ukokeja kufunda kuyuka Yehova na kutanga Bible. Mu myaka ya kala, Leza wātongele bantu ba kulemba milangwe yandi. Bino bilembwa bitelwanga bu Bible. Dyalelo twifundanga kuyuka Leza na kutanga Bible. Bible uselele kinenwa nansha musapu wa Yehova, o mwanda witwanga bu Kinenwa kya Leza. Twi bakulupile amba myanda inena Bible i yabine, mwanda Yehova kabepangapo nansha dimo. ‘Kebibwanikapo Leza kubepa.’ (Bahebelu 6:18) Mu Kinenwa kya Leza mo mudi bubinebine.—Yoano 17:17.

Bible i kimo kya mu byabuntu bilēme mpata bitupele Leza. Udi pamo bwa mukanda wa shabana wa buswe watumine kudi bandi bana. Witulombolanga mulao ulaile Leza wa kwalamuna ino ntanda ke kifuko kilumbuluke kwikala’po—ke paladisa kadi. Witulombolanga bintu byālongele Leza mu myaka ya kala, byalonga dyalelo, ne byakalongela bandi bana bakikōkeji mu myaka ya kumeso. Kadi witukwashanga tuyuke mwa kupwijija myanda yetu ne mwa kutanina nsangaji.—2 Temote 3:16, 17.

 Batumoni ba Yehova i balunda na Leza; bakakukwasha wivwanije myanda ifundija Bible. Abe wibasapwile’tu amba usaka kufunda Bible. Kebalombangapo lupeto pa kino. (Mateo 10:8) Kadi ukokeja ne kutanwa ku kupwila kwa bwine Kidishitu. Kupwidilwanga mu bifuko bya kutōtela’mo bitelwa bu Mobo a Bulopwe. Shi utanwa ku kupwila kwa bwine Kidishitu, ukatamija bukidibukidi buyuki bobe bwa kuyuka Leza.

Ukokeja kufunda kuyuka Leza kupityila ku bintu byalongele. Kifwa, Bible unena’mba: “Leza wapangile diulu ne ntanda.” (Ngalwilo 1:1) Yehova paāpangile “diulu,” wāpungile ne dyuba. Shi ke pano, bino byonso bitulombola amba Leza udi namani? Bitulombola amba Yehova udi na bukomo bukatampe mpata. O mwanda wābwenye kulonga dyuba, kintu kya bukomo bukatampe. Kadi bitulombola amba Yehova i muntu wa tunangu, mwanda kupanga dyuba ditupa kyanga ne kitōkeji, ino konga’dyo mpika, i kintu kilomba kwikala na tunangu.

Bupangi bwa Yehova bulombolanga amba wituswele. Langa’po bidi bipa bya miswelo ne miswelo bidi pano pantanda. Yehova wadi ubwanya kwitupa bipa bya muswelo umo—nansha kwitusuminwa byonso. Ino aye i mwitupe bipa bya misaka mivulevule, mishileshile ku miswelo yabyo, ku bukata, ku misombelo ne ku butobaji bwabyo. Bino byonso bilombola amba Yehova i Leza wa buswe, ino kadipo enka na buswe kete, ehe, i Leza wa buntu, ulangilañana, ne wa kanye.—Mitōto 104:24.