Bintu bibi bilongeka mu ino myaka pano pantanda bilombola amba Paladisa keidi pabwipi. Bible wānene amba tukekala mu myaka ya byamalwa kubwipi’tu na kwiya kwa Paladisa. Yo ino myaka yotudi’mo pano! Ivwana bintu bimobimo byālaile Bible amba bikekala’ko:

Mavita makatampe. “Muzo ukataluka kukatamba muzo mukwabo, ne bulopwe nabo monka.” (Mateo 24:7) Buno bupolofeto i bufikidile. Tamba mu mwaka wa 1914, kwaikele mavita abidi a ntanda, kadi kudi ne mavita matyematye mavule. Bantu midiyo ne midiyo bafwanga mu mene mavita’a.

Mba pi na pi. Kukēkalanga “kungi kungi konso . . . bipupo bya mbá.” (Luka 21:11) Mwene bino bipupo bya mba ke bimweke? Eyo, ke bimweke. Misongo ya dyaya, ya dityima, kikofolo kya mushinga, manzamba, SIDA, ne mba mikwabo, ipaya’nka kwipaya midiyo ne midiyo ya bantu.

Kubulwa bidibwa. Kujokoloka ntanda yonso kudi bantu babudilwe bidibwa bya kudya. Bantu midiyo ne midiyo bafwa nzala mwaka ne mwaka. Kino i kiyukeno kikwabo kilombola amba Paladisa isa kwiya panopano ponka. Bible unena’mba: “Bipupo bya nzala nabyo bi[k]afikanga.”—Mako 13:8.

 Bintenshi. “Kukēkalanga . . . bintenshi bya kutenkanya ntanda, kyadi koku, ke kidi koku.” (Mateo 24:7) Bino nabyo bimwekanga mu kino kyetu kitatyi. Tamba mu 1914, ke kufwe bantu mudiyo ne musubu ku bintenshi.

Bantu babi. Byālailwe kala amba kukekala bantu ‘bansanswa-lupeto’ kadi “bakēsanswa abo bene.” Kukekala “bakusanswa byamazua pakatampe kudi Leza mpika.” Bana bakekala “bampikwa kukōkela bakwibabutula.” (2 Temote 3:1-5) Mwene nobe umwene’tu amba bantu bavule ba uno muswelo badi’ko dyalelo? Kebalēmekelepo Leza, kadi bavutakanya ne boba bene basaka kufunda kuyuka Leza.

Bupolapola. Ne “bubi bwa kujilula bijila” nabo bwālailwe amba bukavula. (Mateo 24:12) Nalanga pano ubamone amba bupolapola bubabipa kupita myaka yonso ya kunyuma. Mu bifuko byonso, bantu badi mu kyaka kya kwibwa, kudimbwa, nansha kulongwa bisansa.

Bino byonso bilombola amba Bulopwe bwa Leza bubafwena. Bible unena’mba: “Po mukamona bino byonso’bi ke bifika, yukai’mba Bulopwe bwa Leza bubafwena.” (Luka 21:31, MB) Lelo Bulopwe bwa Leza bwine i kika? I umbikalo wa mūlu wa Leza ukaleta Paladisa pano pantanda. Bulopwe bwa Leza bo bukapingakena pa imbikalo ya bantu.—Danyele 2:44.