Yehova wādimine budimi mu kifuko kitwa bu Edena. Mu buno budimi mwādi maluba mavule, mityi mivule, ne banyema bavule. Kupwa, Leza wāpanga ku biloba mwana-mulume mubajinji, Adama, ne kumupūja mu myulu yandi. Le uyukile byālongekele? Mwana-mulume’wa wāikala ke muntu mūmi! Yehova wāpele Adama mwingilo wa kutala budimi, kadi Leza wāmulombwele enike banyema bonso majina.

Yehova wāpele Adama kijila kimo kya mvubu. Wālombwele Adama amba: ‘Ubwanya kudya bipa bya ku mityi yonso kutalula’mo’tu umo kete. Shi udye ku uno mutyi umo, ukafwa.’

Mwenda mafuku, Yehova wānena’mba: ‘Nkenongela Adama mukwashi.’ Wālādika Adama tulo tukatampe, kupwa Leza wāyata Adama lupamvu, wāmupungila nalo mukaji. Dyandi dijina i Eva. Ba Adama ne Eva bāikala ke kisaka kibajinji. Le Adama wēivwene namani pa kumona wandi mukaji?  Adama wāsangele bininge, wānena’mba: ‘Tala byalonga Yehova na lupamvu lwami! Uno’ko! Ye muntu ungifwene.’

Yehova wāsoñenye ba Adama ne Eva babutule bana ne kuyuja ntanda. Wādi usaka bengidile pamo mwanda wa kwalamuna ntanda yonso ikale ke paladisa, nansha’mba kifuko kilumbuluke, monka mwādi mwikadile budimi bwa Edena. Inoko kebyābwanikilepo. Mwanda waka? Tusa kuyuka myanda mivule mu shapita ulonda’ko.