KIFUNDWA 83
Yesu Wadisha Bantu Tununu ne Tununu
Kumeso’tu kwa Pashika ya mu mwaka wa 32 Y.M., batumibwa bājokele mu mwingilo wa busapudi. Bādi bakōke bininge, o mwanda Yesu wāendele nabo ku Betesaida lwa bwato mwanda wa bakakōkolokwe. Inoko pāfwenene bwato kubwipi na nkula, Yesu wāmona bantu tununu ne tununu bēbabadikidile kwine’kwa. Nansha Yesu byaādi usaka ekale pa aye mwine na batumibwa bandi kete, wātambwile bano bantu biyampe. Wābelwile bādi babela, wāanza kwibafundija. Yesu wēbafundije myanda ya Bulopwe bwa Leza difuku dyonso dituntulu. Ku kyolwa, batumibwa bandi bamufwena kebamunena’mba: ‘Bantu kebadi na nzala. Wibaleke bidi bende bakakimbe byakudya.’
Yesu wānena’mba: ‘Kebafwaninwepo kwenda. Mwibapei byakudya badye.’ Batumibwa bāmwipangula’mba: ‘Le usaka batwe twende tukebapotele mikate ya kudya?’ Mutumibwa umo witwa bu Fidipa, wānena’mba: ‘Nansha shi twadi na lupeto luvule namani, ketwadipo ba kubwanya kupota mikate ibwana kino kibumbo kyonso’ki.’
Yesu wāipangula’mba: ‘Le tudi na mikate inga?’ Andele wālondolola’mba: ‘Tudi na mikate itano ne twita twa lui tubidi. Kebabwanwa’topo nansha dimo.’ Yesu wānena’mba: ‘Ndetelei yayo mikate ne twita twa lui’to.’ Wānena bantu bashikate pa biyombo mu bisumpi bya bantu 50 ne bisumpi bya bantu 100. Yesu wātekuna mikate ne twita twa lui, wātala mūlu wālombela. Kupwa wāpa batumibwa byakudya, nabo kebabila’byo bantu. Bana-balume 5 000 ne bana-bakaji ne bana bonso bādya baikuta ne kwikuta. Kupwa, batumibwa bākongakanya byakudya byāshele’ko, kekwāonekelepo nansha kimo. Byakudya byāshele’ko byāyudile bilala 12! Mwene kino kyādi kingelengele kitulumukwa?
Bantu bātulumukile bininge kebasake kubikika Yesu bu mulopwe wabo. Inoko Yesu wādi uyukile amba kitatyi kimutungīle Yehova kwikala bu mulopwe kekyabwene. O mwanda wātumine bibumbo ne kusoñanya batumibwa bandi bende bobwa bukila bwa Dijiba dya Ngadilea. Bāikila mu bwato abo bonso, Yesu nandi wākanda ku lūlu bunka bwandi. Mwanda waka wākandile ku lūlu? Mwanda wādi ukimba kitatyi kya kulombela Shandi. Nansha Yesu byaādi na mingilo mivule, wādi nyeke witūdila’ko kitatyi kya kulombela.
“Kemwakingidilai byakudya byoneka, ino ingidilai byakudya bīja pa mwanda wa būmi bwa nyeke, bikemupa Mwanā muntu.”—Yoano 6:27
Tala'po Bidi ne Bino:
YESU—DISHINDA, BUBINE, NE BŪMI
Wadisha Tununu twa Bantu na Mikate Mityetye ne Twita
Kingelengele kya Yesu kidi na kamweno kakatampe mwanda Maevanjile onso i mesambile’po.
