Yesu wādi na balunda basatu ba pa mutyima bādi bekala mu Betani. Abo bene i ba Lazalasa ne bakaka wandi babidi, ba Madia ne Mata. Difuku dimo, Yesu paādi mutamba mukwabo wa Yodano, ba Madia ne Mata bāmutumīne musapu wa bukidibukidi amba: ‘Lazalasa i mubele bininge. Tubakwisāshila, iya bukidibukidi!’ Inoko, Yesu kāendele’kopo ponka na ponka. Wāilaije’ko mafuku abidi, kupwa wālombola bana bandi ba bwanga amba: ‘Twayai ku Betani. Lazalasa ulēle, kenkamulangula.’ Batumibwa bānena’mba: ‘Shi Lazalasa ulēle, bisa kumulengeja evwane biyampe.’ Penepo Yesu wēbasapwila patōkelela’mba: ‘Lazalasa wafu.’

Yesu pa kufika ku Betani, Lazalasa wādi ke mulonge mafuku aná mu kujīkwa. Bibumbo bya bantu byāile kudila kwa ba Mata ne Madia. Mata pa kwivwana’mba Yesu waiya, wākamutundaila bukidibukidi. Mata wāmunena’mba: “A Mfumwami, shi wadi kuno, longa mwanetu kafwilepo.” Yesu wāmunena’mba: ‘Mwanenu usa kwikala mūmi monka. A Mata, le ubaitabija’byo?’ Mata wānena’mba: ‘Ngitabije amba ukasangukanga mu difuku dya lusangukilo.’ Yesu wāmunena’mba: “Ami ne lusangukilo ne būmi.”

Penepo Mata wāenda kudi Madia wāmusapwila’mba: ‘Yesu waiya.’ Madia wāenda lubilo kudi Yesu, ne kibumbo kyāmulonda. Wāpona ku maulu a Yesu, kādila’nka kudila. Madia wāmunena’mba: ‘A Mfumwami, shi wadi kuno longa mwanetu ukidi mūmi!’ Yesu pa kumona mudidila Madia, nandi wāanza kudila. Bantu pa kumona impolo ya Yesu, kēbanena’mba: ‘Talai Yesu mwaadi usanshilwe Lazalasa.’ Ino bamo kēbeipangula’mba: ‘Mwanda waka kapandijepo mulunda nandi?’ Le Yesu wālongele’po namani?

Yesu wāendele ku kibundu, kwine kwādi kushitwe dibwe dikatampe. Yesu wānena’mba: ‘Kunkulumunai dibwe.’ Mata wānena’mba: ‘Inoko kepadi mafuku aná matuntulu! Usa kununka.’ Kupwa bākunkulumuna’ko dibwe, Yesu wālombela’mba: ‘A Tata, wafwa’ko ne kungivwana. Ndyukile’mba ungivwananga mafuku onso,  pano’ko, nanena na diwi ditunduke mwanda wa bano bantu bayuke’mba i abe wauntumine.’ Kupwa wāita na diwi dikatampe amba: “Lazalasa, tamba’mo!” Ponka’po kwālongeka mwanda ulenga luzakalo: Lazalasa wātamba mu kibundu, kashā ukakutwa bisandi bya bukonge. Yesu wānena’mba: “Mukutululei mumuleke ende.”

Bantu bavule bāmwene uno mwanda bāikele na lwitabijo mudi Yesu. Inoko bamo bāendele kukalombola’mo Bafadiseo. Yudasa Isakadiota, umo wa mu batumibwa 12, wāendele mu bufyafya kudi Bafadiseo, kāebepangula’mba: ‘Le musa kumpa inga shi nemusokwela Yesu?’ Abo pa kwitabija kumupa bibese 30 bya ndalama, Yudasa wāanza kukimba mukena wa kwaba Yesu mu makasa a Bafadiseo.