Bene Isalela bavule bādi kebatōta monka bilezaleza, o mwanda Yehova wālekele bene Fidishitia batādile ntanda yabo. Inoko kwādi bene Isalela bamo bādi basenswe Yehova. Kimfwa, mwana-mulume umo witwa bu Manoa. Aye ne wandi mukaji kebādipo na bana. Difuku dimo, Yehova wātuma mwikeulu kudi mukaja Manoa. Mwikeulu wāmusapwila’mba: ‘Usa kubutula mwana mwana-mulume. Uno mwana ukakūla Isalela ku bene Fidishitia. Ukekala mwine Nazila.’ Le uyukile bene Nazila? Bādi bengidi ba Yehova ba pa bula. Bene Nazila kebādipo batendeja nywene.

Mwenda mafuku, ba Manoa bābutula mwana mwana-mulume, bamwinika bu Samishoni. Samishoni pa kutama, Yehova wāmupele bukomo bukatampe. Wāipaile ntambo na makasa. Kadi difuku dimo, Samishoni wāipaile bene Fidishitia 30 aye bunka. Bene Fidishitia bāmushikilwe, kebakimbe mwa kumwipaila. Difuku dimo bufuku, Samishoni wāendele kukalāla mu Ngaza, bākamujikila ku kibelo kya kibundi mwanda wa bamwipaye lubanga pasa kutamba. Inoko Samishoni wālanguka pa bukata bwa bufuku wāenda ku kibelo kya kibundi, wāpomona mulango. Wēusela pa mapuji wākanda nao ku nsongo ya lūlu kubwipi na Hebelona!

Kupwa, bene Fidishitia bāenda kudi Dedila, abala wa Samishoni, bāmunena’mba: ‘Tusa kukupa bibese bya ndalama tununu ne tununu shi uyuke pafyeme bukomo bwa Samishoni. Tukimba kumukwata tumwele mu kifungo.’ Dedila byaādi usenswe lupeto, wāitabija. Dibajinji bidi, Samishoni wāpelele kusapwila Dedila pene pafyeme bukomo bwandi. Inoko Dedila wāmuningila’nka ne byaākōkele wāmulombola pene pafyeme bukomo bwandi. Wāmulombola’mba, ‘Nywene yami keyatendelwe nansha dimo, mwanda ne mwinē Nazila. Shi nywene yami itendwe, bukomo bonso busa kumpwa.’ Samishoni wālubile bininge kumulombola’byo, mwene?

 Ponka na ponka, Dedila wākasapwila bene Fidishitia amba: ‘Nayuka pafyeme bukomo bwandi!’ Wālādika Samishoni pa maulu, Samishoni wāpona mu tulo, ebiya Dedila wāita muntu wa kumutenda nywene. Dedila waela Samishoni lubila’mba: ‘Samishoni, bene Fidishitia badi podi!’ Samishoni wālanguka, papo bukomo ke bumupwe. Bene Fidishitia bāmukwata, bāmusaba meso, ne kumwela mu kifungo.

Difuku dimo, bene Fidishitia tununu ne tununu bebungile mu tempelo ya Dakona, leza wabo, kebela mabila’mba: ‘Wetu leza wetupe Samishoni! Lupulai Samishoni! Āye etupwije’ko mukose.’ Bāmwimika pa bukata bwa bikomo bibidi, kebamusepa. Samishoni wāela lubila’mba: ‘A Yehova, nakwisāshila nkomeje’po enka uno musunsa umo kete.’ Pano, nywene ya Samishoni yādi ke myanze kulepa monka. Wātonona bikomo bya tempelo na bukomo bwandi bonso. Kyūbakwa kyonso kyāpona panshi, bantu bonso bādi mu tempelo bāfwa, ne Samishoni mwine kumo.