Musapudi wa Bulopwe Muswedibwe:

Langa’po bidi shi wi mutumibwa wimene pa Lūlu lwa Impafu. Yesu wakumwekela. Aye kakanda’tu mūlu, wanena’mba: “Mukatambula bukomo pakāya mushipiditu ujila pomudi, kadi mukekala bami batumoni mu Yelusalema, mu Yudea ne mu Samadia monso, ne kulakula kwine kwa ntanda.” (Bil. 1:8) Wadi wa kulonga’po namani?

Padi wadi wa kutuyuka pa kumona mubaile mwingilo. Wadi wa kwiipangula’mba, ‘Batwe bano—bana ba bwanga batye’tu—tubwanya namani kusapula bukamoni “ne kulakula kwine kwa ntanda”?’ Pakwabo wadi wa kuvuluka kidyumu kyādyumwine Yesu bufuku bukya kafu amba: “Umpika katabukilepo mfumwandi bukatampe. Shi bampangilepangile amiwa, ne banwe nenu bakemupangapanga; shi balamine mwanda wami, bakalama ne wenu mwine. Ino bakemulonga bino byonso’bi pa mwanda wa dijina dyami, mwanda kebayukilepo Yewa wantumine.” (Yoa. 15:20, 21) Pa kulangulukila pa bino binenwa, padi ubeipangula’mba, ‘Le mbwanya namani kusapula bukamoni ne pa mfulo na luno lwana ne kupangwapangwa?’

Dyalelo nadyo, twiipangulanga bino bipangujo. Mwingilo otwingila batwe Batumoni ba Yehova ulomba kusapula bukamoni ne pa mfulo “ne kulakula kwine kwa ntanda,” ku “bantu ba ku mizo yonso.” (Mat. 28:19, 20) Tukavuija namani uno mwingilo, nakampata na luno lwana lwālailwe?

Mukanda wa Bilongwa bya Batumibwa usekununa senene mwāvuijije batumibwa ne banababo bene Kidishitu ba mu myaka katwa kabajinji Y.M. mwingilo wabo na bukwashi bwa Yehova. Kino kitabo kyotanga i kilupulwe mwanda wa kukukwasha ubandaule ino mānga ne kumona mu ñeni bino binkumenkume bitenga mutyima bilembelwe’mo. Ukasangela kumona kwiifwana kuvule kudi pa bukata bwa bengidi ba Yehova ba mu myaka katwa kabajinji na bantu bandi dyalelo. Ukamona amba kuno kwiifwana kekudipo’nka pa mwingilo otwingila, ino i ne pa muswelo otulongolwelwe mwa kwiwingidila. Kulangulukila pa kuno kwiifwana na bubine kukakulengeja ukomeje kikulupiji kyobe kya amba Yehova Leza uludikanga kipindi kya pano panshi kya bulongolodi bwandi.

Tukulupile kadi tulombela amba kwifunda mukanda wa Bilongwa kukomeje kikulupiji kyokulupile mudi Yehova amba ukakukwasha ne mushipiditu wandi ujila nao ukakukwatakanya. Ne kadi tukukankamika wendelele “kusapula ne pa mfulo bukamoni bwa Bulopwe bwa Leza” ne kukwasha bakwenu banangile mu dishinda dya lupandilo.—Bil. 28:23; 1 Tm. 4:16.