Pa Kwiula Yesu Ikala . . .
NA LUSA
Yesu muntu mubwaninine, kātenwepo na kuzumbija mutyima kuvule na kutananga bantu. Nansha nankyo wādi na kinyenye ku bantu. Wādi witabije kwenda kobadi, ne kwibalongela bintu bivule mpata bipite ne pa byobasakilwa. Bine, lusa lo lwādi lumutonona ebakwashe. Langulukila pa bimfwa bidi mu Shapita 32, 37, 57, 99.
ULUMBWA
Bantu ba myaka yonso—bakulu ne banuke—bādi bapēlelwa kulumba Yesu mwanda kādipo wimwekeja bu wa kubulwa kyaba nansha bu mupite bakwabo. Bantu byobādi bamona amba Yesu wibatele mutyima, o mwanda bādi bevwana biyampe kwikala nandi. Tala kino mu Shapita 25, 27, 95.
ULOMBELA NYEKE
Kitatyi kyonso, Yesu wādi ulombela na kininga kudi Shandi, pa bunka ne na batōtyi ba bine. Wādi ulombela kitatyi kivule, ke’nkapo pa kudya. Wādi ulombela Shandi mwanda wa kumufwija’ko, kumutendela, ne kukimba bwendeji bwandi kumeso kwa kukwata butyibi bukatampe. Ela diso mu bimfwa bidi mu Shapita 24, 34, 91, 122, 123.
WAMPIKWA MWINO
Divule Yesu, mu kitatyi kyandi kyaādi ufwaninwe kwitūkija ne kukōkolokwa, aye wādi upityija’kyo na bantu. Kādipo na mushipiditu wa kamikami. Mu uno mwanda namo i mwitushile kimfwa kya kulonda. Tala mulombwedilwe’kyo mu Shapita 19, 41, 52.
NA LULEKELO
Yesu kāimaninepo’tu enka pa kufundija lulekelo—ino wālombwele’lo mu muswelo waādi wikele ne bandi bana ba bwanga ne na bakwabo. Langulukila pa bimfwa bidi mu Shapita 26, 40, 64, 85, 131.
NA BUPYASAKANE
Kyālailwe amba Bayuda bavule bakapela kwitabija Meshiasa kadi balwana nandi bakamwipaya. Nanshi Yesu wādi wa kwepuka kulongela bantu bivule. Ino aye, wābingije na bupyasakane mutōtelo wa bine. I mushile balondi bandi bonso batanwa na lwana ne kupangwapangwa kimfwa kya bupyasakane. Tala Shapita 16, 72, 103.
MWITYEPEJE
Yesu i mutabuke bantu bampikwa kubwaninina mu miswelo mivule, kimfwa mu buyuki ne tunangu. Byaādi mubwaninine nanshi wādi mukomo mu ngitu ne mu ñeni kupita bantu bonso bobādi bashikete nabo. Nansha nankyo wādi wingidila bakwabo na kwityepeja. Ubwanya kuboila ñeni ku uno mwanda mu Shapita 10, 62, 66, 94, 116.
NA KITŪKIJETYIMA
Yesu wādi utūkijija nyeke mutyima bandi bana ba bwanga ne bakwabo shi abakomenwa kwiula kimfwa kyandi nansha kulonda binenwa byandi. Wādi wibapitulukila misunsa mivule bufundiji bobasakilwa amba bafwene bininge kudi Yehova. Langulukila pa kitūkijetyima kya Yesu mu Shapita 74, 98, 118, 135.
