SHAPITA 10
Yesu ne Kisaka Kyabo Abaenda ku Yelusalema
-
YESU NA MYAKA 12 WIPANGULA BAFUNDIJI
-
YESU UTELA YEHOVA BU “TATA”
I kubwipi na Kweji 4. Pano kisaka kya Yosefa, ne balunda ne babutule abaenda lwendo lwa pa mwaka pa mwaka lwa kwenda ku Yelusalema. Abaenda kukasoba masobo a Pashika, monka musoñaninye’kyo Bijila. (Kupituluka 16:16) Kutamba ku Nazala kufika ku Yelusalema i lwendo lwa makilometele kubwipi kwa 120. Bonso bavudilwe bya kulonga kadi basangale. Pano Yesu udi na myaka 12, usangela bininge kwenda ku masobo ne kwikala na mukenga wa kufwena monka ku tempelo.
Kudi Yesu ne kisaka kyabo, Pashika ke kinkumenkumepo kya difuku’tu dimo. Kupwa’tu Pashika, ke Masobo a mafuku 7 a Mikate Yampikwa Kiyujo. (Mako 14:1) Nao aloñwanga mu kitatyi kya Pashika. Kutamba kwabo, kwenda mu Yelusalema ne kujokela kwabo i kintu kya mayenga abidi. Ino pa mwanda wa Yesu, uno mwaka mafuku abebweja’ko. I mwanda utala kukimba Yesu pobajoka kutamba ku Yelusalema.
Pobenda, ba Yosefa ne Madia balanga’mba Yesu udi mu kisumpi kya balunda ne babutule benda dya kungala. Ino, abo pa kufika pa kulāla, kebamumwenepo. Abamukimbe mu bendi-nabo, ino kadi’mopo. Abakimbe mwana konso ino kumumona mpika! Ba Yosefa ne Madia abajokela monka ku Yelusalema kukamukimba.
Bamukimba difuku dituntulu kumumona mpika. Difuku dya bubidi nadyo kutupu kumumona. Ku mfulo, ke mu difuku dya busatu, abakasokola wabo mwana mu tempelo, mwadi byumba bingibingi. Abatana Yesu ushikete mu bukata mwa bafundiji Bayuda. Wibateja, wibepangula bipangujo, kadi webatulumuja na kwivwanija kwandi.
Madia wamwipangula’mba, “A mwana, i kika le kyowetulongela nenki? Tala shobe ne ami motuselele mutyima kūlu tukukimba.”—Luka 2:48.
Yesu nandi watulumuka mwanda waka kebayukilepo kwadi. Webepangula’mba: “Mwanda waka mwadi munkimba? Le kemwadipo muyukile amba mfwaninwe kwikala mu njibo ya Tata?”—Luka 2:49.
Pano byobetana bonso, Yesu wakajokela ku Nazala na ba Yosefa ne Madia kashā wibakōkele. Kaenda utama mu tunangu ne ku ngitu. Nansha pakidi mwanuke, i mutōkelwe mutyima na Leza ne na bantu bene. Bine, tamba ku bwanuke, Yesu i mushiye kimfwa kilumbuluke kya kukimba tumweno twa ku mushipiditu koku kadi ulēmekele bambutwile bandi.
