Yesu wafundije ne kubelula bantu mu Yudea ne mu Yelusalema. Kupwa waenda ku Munonga wa Yodano mwanda wa kufundija mu kibundi ne kibundi mu kipindi kya ntanda ya Pelea. Kupwa’tu papo wajokela ku Yelusalema.

Yesu paadi mu Pelea, muntu umo wamwipangula’mba: “A Mfumwami, le bakapanda i batyetye?” Padi uno muntu uyukile lupata lwadi mu bendeji ba bipwilo lwa amba, i bangi bakapanda, baba nabo’mba i batyetye. Yesu wapu mwanda wa kuyuka bungi bwa bantu bakapanda ne bintu bifwaninwe kulonga pa kupanda. Wanena’mba, “Mwielelei’ko bininge pa kutwelela pa kakibelo katyetye.” Bine bilomba bukomo ne kulwa. Mwanda waka? Yesu ushintulula’mba: “Nemulombola’mba bavule bakakimba kutwela ino kebakabwanyapo.”—Luka 13:23, 24.

Yesu pa kwelekeja amba bilomba kulonga bukomo bukatampe, wanena’mba: “Shi mwinē njibo waimana kadi washite ku kibelo, mukemana panja kemukokola ku kibelo amba, ‘A Mfumwetu, witushitwile.’ . . . Ino nandi ukemulondolola’mba, ‘Nkiyukilepo komutambile. Ntalukei papo, banwe bonso bengidi ba bukondame!’”—Luka 13:25-27.

Kino kyelekeja muntu watyelewa—padi wadi na bikwabo bya kulonga—ino watana kibelo kishite kala kwelwe ne loko. Wadi ufwaninwe kufika kumeso kwa kitatyi nansha shi bimulomba kwisuminwa. Ye mobyaikadile ku bavule badi bafwaninwe kumwena mu bufundiji bwadi bwibafundija Yesu. Bakomenwe kukwatakanya uno mukenga mwanda wa kutūla mutōtelo wa bine bu kitungo kyabo kikatampe mu būmi. Bavule mu boba bobatumīne Yesu kebaitabijepo mpango ya Leza ya lupandilo. Yesu wanena’mba ‘bakadila ne kwishenkenya meno pobakelwa panja.’ Ino bantu ba “kutunduka ne kushika, kungala ne kunshi,” eyo, ba mu mizo yonso, “bakashikata ku meza mu Bulopwe bwa Leza.”—Luka 13:28, 29.

Yesu washintulula’mba: “Kadi tala! kudi ba mfulo [kimfwa boba ke Bayudapo ne ba kuningilwa Buyuda] bakekala babajinji, kadi kudi babajinji bakekala ba mfulo.” (Luka 13:30) Kwikala “ba mfulo” kushintulula’mba bano bantu bampikwa mutyima wa kufwija’ko kebakekalapo mu Bulopwe bwa Leza nansha dimo.

Bafadiseo bamo abaiya kudi Yesu kebamunena’mba: “Tamba muno wende, mwanda Heloda [Antipese] usakanga kukwipaya.” Padi Mulopwe Heloda ye washilwile bino biñuniñuni mwanda wa Yesu anyeme mu ntanda’ya. Padi Heloda wakwetwe moyo wa kwipaija mupolofeto mukwabo, mwawaipaijije Yoano Mubatyiji. Ino Yesu wasapwila Bafadiseo amba: “Endai mukalombole yao mukenge amba, ‘Tala! Yeu mpanga bandemona ne kundapa bantu dyalelo ne kesha, kadi mu difuku dya busatu nkekalanga kendi mupwe.’” (Luka 13:31, 32) Yesu pa kwita Heloda bu “mukenge”  padi wavulukile budyumuku bwikalanga na mikenge. Ino, Yesu kabwanyapo kutononwa nansha kutambijibwa na Heloda nansha ke na muntu mukwabo. Usaka kuvuija mwingilo umupele Shandi, mungya mpangiko ya Leza ke ya muntupo.

Yesu waenda ku Yelusalema, mwanda aye mwine amba, “kekibwanikapo mupolofeto kwipaibwa panja pa Yelusalema.” (Luka 13:33) I kutupu bupolofeto bwa mu Bible bulombola’mba Meshiasa ufwaninwe kwipailwa mu kino kibundi, penepa mwanda waka Yesu wanena’mba ufwaninwe kwipailwa’mo? Mwanda Yelusalema i kibikelo, mwine mudi kidye kikatampe kya bantu 71 ba mu Sanedini, mwine musambijibwanga bapolofeto batopekwa amba i ba bubela. Ne kadi, mo amo mulambwilwanga bitapwa bya banyema. O mwanda, Yesu wamone amba ke biyampepo aye epaibwe mu kibundi kingi.

Yesu wadila’mba: “Yō, Yelusalema, Yelusalema, mwine wipayanga bapolofeto ne kwasa mabwe boba batumwa mwadi—i misunsa inga le yonadi nsaka kubungakanya bobe bana mubungakenyanga nzolo bandi bana mu mapapa andi! Ino banwe kemwasakilepo! Tala! njibo yenu ibemushilwa.” (Luka 13:34, 35) Bine uno muzo wapela Mwanā Leza ufwaninwe kususuka!

Kumeso kwa Yesu kwenda ku Yelusalema, mwendeji umo wa Bafadiseo wamwite kwandi byakudya mu dya Sabato. Boba betyilwe’ko kebatale Yesu shi usa kulonga kintu ku muntu umo ubela ngitu kuyula (misongo ya mema kuyula mu misunya, divule ku maulu ne ku binyantyilo). Yesu waipangula Bafadiseo ne boba bajingulwile Bijila amba: “Le kubelula muntu mu dya Sabato i kijila’ni ke kijilapo?”—Luka 14:3.

Kutupu walondolola. Yesu wabelula muntu’wa ne kwibepangula’mba: “I ani momudi’mo shi wandi mwana nansha ñombe waponena mu mushimwa kasapo kumwabula’mo ponka na ponka mu difuku dya Sabato?” (Luka 14:5) Ne pano pene abakomenwa kya kulondolola ku mulangilo wandi muluji.