Pa kuyuka’mba Bafadiseo ne kisumpi kya balondi ba Heloda bakutanga nkuku ya kumwipaya, Yesu ne bandi bana ba bwanga abekokela ku Dijiba dya Ngadilea. Bibumbo bikatampe bya bantu bya koku ne koku bibatutyikila kwadi​—bya ku Ngadilea, bya ku Tyila ne Shidona bidi ku nkunkujo, ne bya kutunduka kwa Munonga wa Yodano, ku Yelusalema, ne bya ku Idyumea enka ne kunshi kulampe. Yesu wabelula bantu bavule. Ku mfulo, boba badi na misongo mikomo kebafwena’nka kufwena. Pa kyaba kya kwilaija aye ebatenge, abo’ko bo ke bamutenga.​—Mako 3:9, 10.

Bibumbo bibavula bininge, Yesu wanena bandi bana ba bwanga bamuletele kabwato amba asonsoloke ku nkula kudi bibumbo bimutyinya. Namino, ubwanya kwibafundija biyampe aye mu bwato ne kwenda ku nkula mikwabo mwanda wa kukakwasha’ko bantu bakwabo.

Mwanā bwanga Mateo wamone amba mwingilo wa Yesu ubafikidija “kyokya kyānenenwe kupityila kudi mupolofeto Isaya.” (Mateo 12:17) Le i bupolofeto’ka bwafikidija Yesu pano?

“Tala! Mwingidi wami onatongele, muswedibwe wami, ondoelelwe! Nkatūla mushipiditu wami padi, kadi ukalombola patōka mwikadile boloke ku mizo. Kakepotomejapo na bantu, nansha kwela lubila, kadi i kutupu nansha umo ukevwana diwi dyandi mu mashinda makatampe. I kutupu dibungu difyotoke dyakatyumuna, nansha lukamba lwa kinanu lufituka mwishi lwakabula, enka ne byafikija boloke ku kunekenya. Bine, mizo ikakulupilanga mu dijina dyandi.”​—Mateo 12:18-21; Isaya 42:1-4.

Na bubine, Yesu i mwingidi muswedibwe na Leza. Yesu walombola patōka mwikadile boloke bwa bine, bwine bunyantyilwe panshi na bisela bya bipwilo bya bubela. Bafadiseo byobalonda mobasakila Bijila bya Leza na bukondame, kebabwanyapo kukwasha mu dya Sabato muntu ubela! Yesu pa kulombola patōka boloke bwa Leza ne amba mushipiditu wa Leza udi padi, wapēlejeja’ko bantu kiselwa kya bisela byampikwa koloka. Kyo kine kikimbila kumwipaila bendeji ba bipwilo. I kya bulanda’po kashā!

Lelo kunena’mba, “Kakepotomejapo na bantu, nansha kwela lubila, kadi i kutupu nansha umo ukevwana diwi dyandi mu mashinda makatampe” kushintulula bika? Yesu pabelula bantu, upelejanga bandemona​—mishipiditu mibi​—amba “keyakimuyukanya ku bantu.” (Mako 3:12) Kasakilepo bantu bamuyukile kupityila ku mabila obamwelela  nansha ku myanda minyengakanibwe na nsapu-nsapujana.

Kadi Yesu udi na musapu usenga boba badi bwa dibungu difyotoke, disendame nansha dityumuke. Badi bwa lukamba lwa kinanu lufituka mwishi ludi pabwipi na kubula. Yesu katyumunangapo dibungu nansha kubula lukamba kwa kinanu lufituka. Ino wimikanga na kanye, buswe ne na bunwa boba betyepeje. Bine, mizo ibwanya kukulupila Yesu!