Yesu wape batumibwa bandi bulombodi bulumbuluke bwa mwa kuvuijija mwingilo wa busapudi pobenda babidi babidi. Kemaninepo’nka papo. Webadyumuna na kanye pa balwana amba: “Talai! Nemutume pamo bwa mikōko umbukata mwa bampumpi . . . Dyumukai bantu, mwanda bakemufikija ku bidye bya kwenu kadi bakemukupila nsonde mu mashinankonka abo. Pakwabo kadi, bakemutwala ku bambikavu ne balopwe pa mwanda wa amiwa.”​—Mateo 10:16-18.

Eyo, balondi ba Yesu basa kupangwapangwa bininge, nansha nankyo webakulupija na kwibalaya amba: “Shi abemufikija’ko, kemwakizumbijai mityima pa muswelo omukanena nansha pa byomukanena, mwanda bya kunena bikemupebwa’nka mu mine nsá’ya; mwanda bakanena ke banwepo bonka kete, mhm, ino i mushipiditu wa Shenu unenena momudi.” Kadi Yesu wabweja’ko amba: “Muntu ukaba mwanabo amba epaibwe, shamuntu nandi wandi mwana, ne bana nabo bakatombokela bambutwile ne kwibepaija. Kadi mukashikibwa na bantu bonso pa mwanda wa dijina dyami, ino yewa wa kūminina kufika ne ku mfulo kwine ukapandanga.”​—Mateo 10:19-22.

Mwingilo wa busapudi byoudi na mvubu mikatampe, o mwanda Yesu wakome balondi bandi bekale badyumuke amba bekale na bwanapabo mwa kuvuijija uno mwingilo. Wanena’mba: “Shi abemupangapanga mu kibundi kimo, nyemenai mu kikwabo; mwanda i bine nemulombola’mba, kemukapupo kujokoloka bibundi byonso bya Isalela aye Mwanā muntu kufika mpika.”​—Mateo 10:23.

Bine buno bulombodi, bidyumu, ne kukankamika kwakankamika Yesu batumibwa bandi 12 i kwa kutendelwa! Padi ubamone amba bino binenwa bikekala na mvubu ne ku boba bakengila mwingilo wa busapudi kupwa kwa Yesu kufwa ne kusangulwa. Kino kibamweka mu binenwa byandi byaanena bana bandi ba bwanga amba: “Mukashikibwa na bantu bonso,” kadi ke enkapo na boba bakasapwilwa na batumibwa. Ne kadi, ketwatangilepo amba batumibwa abaselelwa kumeso a bambikavu ne balopwe mu kano kakitatyi kepi ka kampanye ka busapudi mu Ngadilea nansha kwipaibwa na ba mu bisaka.

Na bubine, Yesu paasapwila batumibwa bandi bino bintu wisambilanga pa myanda ya kumeso. Langulukila pa musemwa wandi wa amba bandi bana ba bwanga kebakapupo kujokoloka bibundi na busapudi bwabo “Mwanā muntu kufika mpika.” Yesu walombola’mba, bana ba bwanga kebakapupo kusapula Bulopwe bwa Leza kumeso kwa Yesu Kidishitu, Mulopwe mutumbijibwe ntumbo kufika bu mutyibi wa Leza.

 Batumibwa kebafwaninwepo kutulumuka shi abatanwa na lwana pobavuija mwingilo wa busapudi, mwanda Yesu wanena’mba: “Mwanā bwanga katabukilepo mufundiji wandi.” Milangwe ya Yesu idi’tu patōka. Aye wasusulwa ne kupangwapangwa mu miswelo yonso mwanda wa kusapula Bulopwe bwa Leza, nanshi nabo bikebatana. Inoko wasoñanya’mba: “Kemwakityinai boba bepaya umbidi ino kebakokejapo kwipaya muya; ino, tyinai yewa ukokeja konakanya muya ne umbidi mwine mu Ngehena.”​—Mateo 10:24, 28.

Yesu i mushiye kimfwa mu uno mwanda. Wāūminine lufu pampikwa moyo pa kyaba kya kuleka kulamata yewa udi na bukomo bonso, ke Yehova kadi. I Leza Mwinē Bukomo Bonso ubwanya konakanya “muya” wa muntu (kyepelo kyandi kya būmi bwa kumeso) ne ubwanya kumusangula ekale na būmi bwa nyeke. Bine kino kibakulupija batumibwa!

Yesu waelekeja muswelo ulama Leza balondi bandi amba: “Lelo kebapotejangapo misolwe ibidi ku kityele kimo kya mvubu mityetye’ni, a? Inoko, i kutupu nansha umo ukapona pa nshi Shenu kuyuka mpika. . . . Nanshi kemwakityinai; mudi na bulēme kutabuka misolwe mingi.”​—Mateo 10:29, 31.

Musapu usapula bana ba bwanga ba Yesu ukakalañanya ba mu njibo, bantu bamo ba kisaka baketabija ino bakwabo bakapela’o. Yesu washintulula’mba, “Kemwakilangai amba naile kutūla ndoe pano pa ntanda.” Bine bilomba kulonga bukomo pa kusaka wa mu kisaka etabije bubine bwa mu Bible. Yesu wanena’mba: “Yewa usenswe bininge shandi nansha inandi kuntabuka kamfwaninwepo ami; kadi yewa usenswe bininge mwana mwana-mulume nansha mwana mwana-mukaji kuntabuka kamfwaninwepo ami.”​—Mateo 10:34, 37.

Ino kudi bamo bakatambula biyampe bana bandi ba bwanga. Wanena’mba: “Yewa ense upa umo wa mu bano batyetyetyetye nkopo umo’tu wa mema a kutoma atalala mwanda i mwanā bwanga, nemulombola na bubine amba, kakajimijapo mpalo yandi nansha dimo.”​—Mateo 10:42.

Batumibwa byo bapwa kuteakanibwa na bulombodi bwa Yesu, bidyumu, ne kukankamikwa, pano abai “mu ntanda’ya mu kibundi ne kibundi, basapula myanda miyampe ne kubelula bantu konsokonso.”​—Luka 9:6.