Yesu wadishishe tununu twa bantu bukila bwa kutunduka kwa Dijiba dya Ngadilea, kupwa wanyema pobadi basaka kumubikika bu mulopwe. Mu bufuku’bo walandele ne pa mema, wapandija Petelo walandele nandi pa mema ino washilula kushika pajinine lwitabijo lwandi. Kadi wataleje kivula, padi kyo kyapandije bandi bana ba bwanga ku kulobela.

Pano Yesu wajokela kushika kwa dijiba, mu ntanda ya Kapanama. Boba baadishije mu kingelengele abamutana ne kumwipangula’mba: “Le wafikile kuno kyaba’ka?” Yesu webafunina, webanena’mba bamukimbanga mwanda wa kudya monka. Webasoñanya’mba, “Kemwakingidilai byakudya byoneka, ino ingidilai byakudya bīja pa mwanda wa būmi bwa nyeke.” Nabo abamwipangula’mba: “Le tulonge bika pa kuvuija mingilo ya Leza?”​—Yoano 6:25-28.

Padi abalanga mingilo itelelwe mu Mukanda wa Bijila, ino aye Yesu wisambilanga pa mwingilo wa mvubu mikatampe amba: “Uno’u o mwingilo wa Leza, amba mulombole lwitabijo mudi yewa waatumine.” Inoko nansha byalonga Yesu bino byonso, bantu kebalombwelepo lwitabijo mwadi. Abamulombe alonge kiyukeno mwanda wa bamwitabije. Abamwipangula’mba: “Le i mwingilo’ka oingila? Bakulutuba betu bādile māna mu ntanda mutuputupu, monka mokilembelwe amba: ‘Wēbapele mukate wa mūlu badye.’”​—Yoano 6:29-31; Ñimbo ya Mitōto 78:24.

Byobalomba kiyukeno, Yesu aye wakokela milangwe yabo ku Nsulo mine ya bingelengele amba: “I binebine nemulombola’mba, Mosesa kēmupelepo mukate wa mūlu, aa, ino Tata ye wimupa mukate wa bine wa mūlu. Mwanda mukate wa Leza i yewa utūka mūlu ne kupa ino ntanda būmi.” Byokebevwanijepo mulangwe mwine, abamulombe amba: “A Mfumwetu, witupe kyaba kyonso wao mukate.” (Yoano 6:32-34) Ino le i ‘mukate’ka’ wisambila’po Yesu?

Wanena’mba: “Ami ne mukate wa būmi. Yewa ense wiya kondi kakevwanapo nzala nansha dimo, kadi yewa ense ulombola lwitabijo mudi ami kakevwanapo kyumwa nansha dimo. Inoko monka monemulombwedile, mubaumone ne kumona ino kemwitabijepo . . . natūkile mūlu naiya kulonga kiswa-mutyima kya yewa wantumine, ke kiswa-mutyima kyamipo, aa. Kino’ki kyo kiswa-mutyima kya yewa wantumine, amba nkyakijimija nansha muntu umo mu bonso baumpele, ino amba nkebasangule mu difuku dya mfulo. Mwanda kino’ki kyo kiswa-mutyima kya Tata, amba ense uyuka Mwana ne kulombola lwitabijo mudi aye akamone būmi bwa nyeke, kadi nkamusangulanga mu difuku dya mfulo.”​—Yoano 6:35-40.

Kino kibalobeja Bayuda kebamwiuningila. Le ubwanya kwitela namani amba, “Ami ne mukate utūkile mūlu”? (Yoano 6:41) Abo bayukile’tu amba aye i mwana udi na bambutwile bandi ku Ngadilea mu kibundi kya Nazala. Kebanena’mba: “Le uno’u ke ayepo Yesu mwanā Yosefa, otuyukile shandi ne inandi?”​—Yoano 6:42.

Yesu walondolola’mba: “Lekai kwiuninga banwe bene. I kutupu muntu ukokeja kwiya kondi, poso Tata untumine amukoke, kadi nkamusangulanga mu difuku dya mfulo. I kilembwe mu Bapolofeto amba: ‘Bakafundijibwa bonso na Yehova.’ Yewa ense waivwene Tata ne kufunda wiyanga kondi. Ke kunenapo amba kudi muntu ke mumone Tata, poso yewa utambile kudi Leza; uno’u ke mumone Tata. I binebine nemulombola’mba, yewa ense witabija udi na būmi bwa nyeke.”​—Yoano 6:43-47; Isaya 54:13.

Mafuku kunyuma pesambile Yesu na Nikodema, Yesu wakwatañenye būmi na lwitabijo mudi Mwanā Muntu, na kunena’mba: “Ense ulombola lwitabijo mudi aye [Mwana wa bunka] kakyonakanibwa,  ino amone būmi bwa nyeke.” (Yoano 3:15, 16) Ino pano wasapwila kibumbo kikatampe, na kwibalombola amba babwanya kumona būmi bwa nyeke kupityila kwadi, būmi kebubwanyapo kumweka mu māna nansha ke mu mikate ipuñwanga mu Ngadilea. Penepa muntu ubwanya kumona namani būmi bwa nyeke? Yesu wapituluka monka mu binenwa byandi amba: “Ami ne mukate wa būmi.”​—Yoano 6:48.

Mīsambo itala pa mukate mutambe mūlu ikyendelela, kadi ibaningila’ko pafundija Yesu mu shinankonka ya Kapanama.