Yesu wapu kwita bana ba bwanga baná​—ba Petelo, Andele, Yakoba, ne Yoano​—bekale babibulwe ba bantu. Pano ke mu dya Sabato, bonso abaenda ku shinankonka ya mu kibundi kya Kapanama mobadi. Yesu wafundija’mo, kadi pano napo bantu abatendela mufundijijo wandi. Wafundija pamo bwa muntu wa lupusa, ke pamopo bwa basonekeji.

Mu dino dya Sabato kubaiya ne muntu mukwatwe na ndemona. Uno muntu waela lwanji enka mu shinankonka amba: “Le tudi nobe mwanda’ka, abe Yesu mwine Nazala? Lelo ubaiya kwitonakanya? Nkuyukile’tu biyampe abewa, wi Mwine Ujila wa Leza!” Yesu wafunina ndemona uludika uno muntu, kanena’mba: “Uba nyā, kadi mutambe’mo!”​—Mako 1:24, 25.

Ponka’pa, uno mushipiditu mubi ubatolwela muntu panshi ne kwela lwanji lukatampe. Ebiya ndemona watamba mu muntu’wa “pampikwa kumulonga kibi.” (Luka 4:35) Bantu badi mu shinankonka abatulumuka! Kebepangula’mba: “Le i kika kino? . . . Usoñanya na lupusa enka ne mishipiditu ya disubi, nayo imukōkela.” (Mako 1:27) Bine, nkuo ya uno mwanda utulumukwa ibasambakana ne mu Ngadilea.

Yesu pa kutamba mu shinankonka na bandi bana ba bwanga, baenda kwa Shimona, e enka Petelo. Kwine’kwa, inandi muko wa Petelo ubela bininge, ngitu mimukabe. Abazenze Yesu amukwashe. Penepa Yesu watwela, wamukwata ku kuboko ne kumwimika. Ponka na ponka wakoma kaingidila Yesu ne bana ba bwanga, padi na kwibatēkela byakudya.

Dyuba ke kupona, bantu ba koku ne koku abaiya ku njibo ya Petelo na bantu babela. Na pano kala byamweka bu kibundi kyonso kibebungila pa kibelo. Mwanda waka? Bakimba kubelulwa. Bine, “boba bonso badi na bantu babela misongo palapala bamuselela’bo. Nandi webatenteka bonso umo umo makasa, webabelula.” (Luka 4:40) Yesu webakwasha mu misongo ya miswelo ne miswelo, na mokyālailwe. (Isaya 53:4) Wanyongolola ne boba badi bakwetwe na bandemona. Mishipiditu mibi pa kutamba, yadi yela mabila amba: “Abe wi Mwanā Leza.” (Luka 4:41) Ino Yesu weifunina, kwiipa mpika lupusa lwa kwisamba monka. Yadi iyukile amba Yesu i Kidishitu, ino Yesu kasakilepo imweke bwa ayo ingidila Leza wa bine.