Yesu ukidi mu Yelusalema ku Masobo a Tabenakulo (a Bitanda), wendelela na kufundija bubine bwa kamweno. Bayuda bamo badi’po abatambe mu kumunena’mba: “Batwe twi lutundu lwa Abalahama kadi kashā ketwaikele bapika.” Yesu webalondolola’mba: “Ndyukile amba mwi lutundu lwa Abalahama. Inoko yao mukimba kungipaya, ke-pantu mwanda wami keutamangapo momudi. Nesambanga bintu byonamwene ponadi na Tata, ino banwe nenu muloñanga bintu byomwivwana kudi shenu.”​—Yoano 8:33, 37, 38.

Mulangwe wa Yesu udi padi tō, i wa amba: Shandi i mwishile na shabo. Bayuda byokebevwanijepo byanena Yesu abapituluka monka amba: “Tata wetu i Abalahama.” (Yoano 8:39; Isaya 41:8) Shako ku ngitu i lutundu lwandi. Abalanga’mba badi na lwitabijo na lwa Abalahama mulunda na Leza.

Ino Yesu webalondolola bintu byebatenga amba: “Shi mwadi bana ba Abalahama, mwadi ba kulonga mingilo ya Abalahama.” Na bubine mwana wa bine wiulanga shandi. Yesu wabweja’ko amba: “Ino pano yao mukimba kungipaya, ami muntu wimusapwila bubine bonaivwene kudi Leza. Abalahama kālongelepo nankyo.” Ebiya Yesu webabezemuna na kunena’mba: “Banwe muloñanga mingilo ya shenu.”​—Yoano 8:39-41.

Bayuda kebaivwanije bikimba kunena Yesu. Abakimbe kulombola’mba abo i bana benebene ne kunena’mba: “Batwe ketubutwilwepo mu busekese; tudi na Tata umo, Leza.” Le bine Leza ye Shabo? Yesu wanena’mba: “Shi Leza wadi Shenu, longa munsenswe, mwanda natambile kwa Leza ne byondi pano’bi. Nkiidilepo ami mwine, ino Aye ye wantumine.” Yesu waipangula kipangujo ne kwikilondolola aye mwine amba: “I kika le kyokemwivwaninapo byonena? Mwanda kemukokejapo kwivwana mwanda wami.”​—Yoano 8:41-43.

Yesu walombola bipa bibi bikalupuka’ko shi abamupele. Ino pano wanenenena patōka’mba: “Banwe mwi batambe kudi shenu Dyabola, kadi musakanga kulonga bisakasaka shenu.” Le shabo udi namani? Yesu washintulula’ye patōka’mba: “Aye wādi ntapañani paāshilwile, kadi kāimanijepo mu bubine.” Yesu wabweja’ko amba: “Yewa wa kwa Leza wivwananga binenwa bya Leza. Kine kyokemwivwaninapo, i mwanda kemudipo ba kwa Leza.”​—Yoano 8:44, 47.

Kuno kutopekwa kubalobeja Bayuda, nabo abanena’mba: “Mwene tudi na bubinga pa kunena’mba, ‘Abe wi mwine Samadia kadi udi na ndemona’?” Kumwita kobaita Yesu bu “mwine Samadia,” kulombola amba bamufutulwile. Ino Yesu wasūla kafutululo kabo, walondolola’mba: “Ami nkidipo na ndemona, ino ndēmekanga Tata, banwe’ko mumfutulula.” Yesu pa kulombola’mba kumwivwana i mwanda musumininwe, webalaya’mba: “Shi muntu alame mwanda wami, kakamonepo lufu nansha dimo.” Yesu kasakengapo kunena’mba batumibwa ne bakwabo bamulonda kebakafupo, mhm. Inoko abo kebakamonepo lufu lwa lonso, “lufu lwa bubidi,” lwine lwa kubulwa lukulupilo lwa kusangulwa.​—Yoano 8:48-51; Kusokwelwa 21:8.

Bayuda abasela binenwa bya Yesu kishima pa kishima, kebanena’mba: “Pano’ko tubayuka’mba udi na ndemona. Abalahama wāfwile, ne bapolofeto bene, ino abe konena’mba, ‘Shi muntu alame mwanda wami kakafupo nansha dimo.’ Le abe wi mukatampe kutabuka tata wetu Abalahama wāfwile’ni? . . . Le abe wimwene bu ani?”​—Yoano 8:52, 53.

Yesu wanenenena patōka’mba aye ye Meshiasa. Pa kyaba kya kulondolwedidila ku kipangujo kya kwatambile, wanena’mba: “Shi netumbije ami mwine, nankyo ntumbo yami i ya bitupu. Tata ye untumbija, mwine omunena’mba i Leza wenu’o. Nansha byokemumuyukilepo, inoko ami muyukile. Kadi shi nanena’mba nkimuyukilepo, nabya naikala mbepai pamo bwa banwe.”​—Yoano 8:54, 55.

 Pano Yesu wajokela ku kimfwa kya mukulutuba wabo wa kikōkeji, amba: “Shenu Abalahama wāsangele bikatampe pa kutengela kumona difuku dyami.” I bine, Abalahama byaādi ukulupile mu milao ya Leza, wādi utengele kwiya kwa Meshiasa. Bayuda abalondolola na kumupatanya’mba: “Kwabwenye nansha myaka 50 mine, kodi mumone Abalahama?” Yesu webalondolola’mba: “I binebine nemulombola’mba, Abalahama paādi kaikele’ko, ami nādi’ko.” Wisambilanga pa būmi bwaādi nabo momwa mūlu bu kipangwa kya bukomo kya ku mushipiditu.​—Yoano 8:56-58.

Bayuda abalobe panena Yesu amba wādi’ko Abalahama kaikele’ko, kebakimbe kumwasa mabwe. Ino Yesu watambe’po pampikwa kusanshijibwa.