Yesu pa kupwa mafuku 40 mu ntanda mutuputupu ne kumeso kwa kwenda ku Ngadilea, wajokela bidi kudi Yoano wamubatyije. Yesu paenda ufwena, Yoano wamufunka na kutulumuka ku boba badi’po amba: “Talai, Kana ka Mukōko ka Leza katalula bubi bwa ino ntanda! Uno’u ye onadi nena’mba: ‘Kunyuma kwami kwiyanga muntu umpityile kumeso, mwanda wāikele’ko kumeso kwami.’” (Yoano 1:29, 30) Nansha Yoano byakudile’ko Yesu bityetye, ino uyukile amba Yesu wāikele’ko kumeso andi bu muntu wa ku mushipiditu momwa mūlu.

Nansha Yesu byaile mayenga matyetye kunyuma kubatyijibwa, bimweka’mba Yoano kadipo ukulupile amba Yesu ye wa kwikala Meshiasa. Yoano mwine unena’mba: “Ne ami mwine nkyadipo muyukile, ino kine kyonaidile mbatyija mu mema i mwanda wa amwekejibwe kudi Isalela.”​—Yoano 1:31.

Yoano wasapwila boba badi bamwivwana byalongekele paabatyije Yesu amba: “Namwene mushipiditu utūka pamo bwa nkunda utamba mūlu, kadi waikala padi. Ne ami mwine nkyadipo muyukile, ino Yewa mwine wantumine kubatyija mu mema wanombwele amba: ‘Ense owakamona mushipiditu umutūkila ne kwikala padi, ye aye ubatyija mu mushipiditu ujila.’ Nami namwene’kyo, kadi nasapula bukamoni amba uno’u i Mwanā Leza.”​—Yoano 1:32-34.

Difuku dilonda’ko Yesu waiya monka, papo Yoano udi na bana bandi ba bwanga babidi. Yoano wanena’mba: “Talai, Kana ka Mukōko ka Leza!” (Yoano 1:36) Ponka’po, bano bana ba bwanga babidi ba Yoano ke balonda Yesu. Umo bidi i Andele. Ne mukwabo nandi, padi i mwine ulembele ino myanda waityilwe ne bu Yoano. Uno Yoano i mwanabo na Yesu mwanā Salome mwanabo na inandi. Bimweka bu Salome i mwanabo na Madia, kadi wandi mulume i Zebede.

Yesu pa kwalamuka wamone Andele ne Yoano bamulonda, webepangula amba: “I kika kyomukimba?”

Abamwipangula’mba, “A Labi le wikalanga kwepi?”

Yesu webalondolola’mba “Iyai’tu, musa kumona.”​—Yoano 1:37-39.

Yadi ke nsá ya 4 ya kyolwa, ba Andele ne Yoano abashikata na Yesu difuku’dya. Andele wadi musangale, ko kwenda kutala mwanabo Shimona, witwa ne bu Petelo, wamulombola’mba: “Tubatana Meshiasa.” (Yoano 1:41) Andele waenda na Petelo kudi Yesu. Myanda ilombola’mba Yoano nanshi wakatene mwanabo Yakoba wamuleta kudi Yesu; inoko Yoano katwejejepo ino myanda yandi mu byalembele.

Difuku dilonda’ko, Yesu wakatana Fidipa wa ku Betesaida. Kibundi kidi kubwipi na ku nkula ya kungala kwa Dijiba dya Ngadilea kadi kyo kibundi  kya ba Andele ne Petelo. Yesu waite Fidipa amba: “Ikala mulondi wami.”​—Yoano 1:43.

Kupwa Fidipa nandi wakatana Natanela, witwa ne bu Balatelemi, kanena’mba: “Tubatana yewa wālembelwe na Mosesa mu Bijila ne na Bapolofeto: Yesu, mwanā Yosefa, wa ku Nazala.” Natanela watatana kanena Fidipa amba: “Lelo ku Nazala kukokeja kutamba kintu kiyampe?”

Fidipa wamuzenze amba, “Iya umone.” Yesu pa kumona Natanela ufwena wanena’mba: “Talai, mwine Isalela wa bine wampikwa bongojani nansha dimo munda mwandi.”

Natanela wamwipangula’mba, “Le ubandyuka namani?”

Yesu wamulondolola amba: “Fidipa paadi kakwityile, powadi munshi mwa kikuyu, nadi nakumone.”

Natanela watulumuka kanena’mba: “A Labi, wi Mwanā Leza, wi Mulopwe wa Isalela.”

Yesu wamwipangula’mba, “Ubaitabija mwanda nakulombola’mba nadi nakumone munshi mwa kikuyu? Usa kumona bintu bikatampe kutabuka bino’bi.” Ebiya Yesu walaya’mba: “I binebine nemulombola’mba, mukamona diulu dishituka ne bamwikeulu ba Leza bakanda batūka padi Mwanā muntu.”​—Yoano 1:45-51.

Kitatyi kityetye pa kupita’po, Yesu pamo ne bana bandi ba bwanga bapya, abataluka mu Dilungu dya Yodano ke benda ku Ngadilea.