DIFUKU dikwabo, uno mwana-mukaji wamufunina monka Toñi na bulobo. Le nandi walongele’po namani? Unena’mba “uno mwanda wadi mukomo bininge. Wadi’tu umfunina pampikwa mwanda.” Pano napo kadi, Toñi walombe lusa monka ne kusapwila mwana-mukaji’wa amba waivwanija makambakano andi.

Shi wadi Toñi, le wadi wa kulonga’po namani? Lelo wadi wa kulombola ngikadila ya kutalala? Le byadi bya kukukomena kulombola ngikadila ya kutalala? Na bubine, kebipelangapo kwīfula mu myanda pamo na yanenwa kūlu’ku. Shi tudi na njia nansha tubasombibwa, na bubine bikalanga bikomo kulombola ngikadila ya kutalala.

Inoko Bible ukankamika bene Kidishitu balombole ngikadila ya kutalala. Kadi Kinenwa kya Leza kikwatañanya ino ngikadilo na tunangu. Yakoba wipangula’mba, “Lelo wa tunangu ne wa ñeni umbukata mwenu i ani le? Nankyo kupityila ku mwiendelejo wandi mulumbuluke alombole mingilo ingilwa na kutalala kutamba ku tunangu.” (Yakoba 3:13) Lelo kutalala i kilomboji kya tunangu tutūka  mūlu muswelo’ka? Ne i bika bibwanya kwitukwasha tutamije ino ngikadilo ya bwine Leza?

Kutalala kubwanya kutalaja bukalabale. “Kulondolola kwa kikōkeji kutalaja bukalabale: Ino kinenwa kya kasusu kikolomona bulobo.”​—Nkindi 15:1.

Bukalabale bubwanya kubipija myanda bininge mwanda budi pamo bwa kwela esanshi pa mudilo. (Nkindi 26:21) Inoko, kulondolola kwa kikōkeji kutalajanga myanda. Kadi kubwanya’nka ne kutalaja bukalabale bwa muntu wa bulobo bupite.

Toñi wemwenine uno mwanda. Mwana-mukaji’wa pamwene amba Toñi wamulondolola na kikōkeji, impolo ya musuma. Wamusapwila’mba wadi mulēmenenwe na makambakano andi ne a kisaka. Toñi wasapwile na kimfwa kyandi kiyampe, na pano kala kifundwa kya Bible kyashilula​—pa mwanda wa mwikadilo wandi wa kutalala ne wa kusaka ndoe.

Kutalala kubwanya kwituletela nsangaji. “Ba katōkwe i ba ngikadila italala, mwanda bakapyananga ntanda.”​—Mateo 5:5.

Mwanda waka bantu ba ngikadila ya kutalala badi na nsangaji? Bantu bavule badi na bulobo bupite pano badi na nsangaji kupityila ku ngikadila ya kutalala. I balumbulule būmi bwabo, ne kuyuka’mba kudi bintu bya kutendelwa bibatengele kumeso. (Kolose 3:12) Adolfo, mutadi wa kipindi wa mu Eshipanye, unena’mba, mo mwadi mwikadile ne būmi bwandi kumeso kwa kutwela mu bubine.

Adolfo unena’mba, “Būmi bwami kebwadipo na kitungo. Kyaba kivule byadi binkomena kulombola ngikadila ya kutalala, enka ne balunda nami bamo badi bantyina bininge pa mwanda wa kibengo ne bukalabale bwami. Ku mfulo bintu byashinta. Mu luma lukatampe lotwekupile, bauntapile’mo bilonda bisamba, nasa’nka ne kufwa.”

Inoko pano, kupityila ku binenwa ne na kimfwa kyandi, Adolfo ufundijanga bantu bakwabo bekale na ngikadila ya kutalala. Bantu bavule bakokwanga na buzanzamuke bwandi ne mwikadilo wandi muyampe. Adolfo unena’mba udi na nsangaji pa kushinta kwaabwenye kushinta. Kadi ufwijanga’ko Yehova pa kumukwasha atamije ngikadila ya kutalala.

Kutalala kusangajanga Yehova. “Wami mwana, wikale wañeni ne kusangaja mutyima wami, amba nondolole yewa umpunika.”​—Nkindi 27:11.

Yehova upunikwanga na walwana nandi mubi, Dyabola. Leza udi na bubinga bwendele’mo bwa kukalabala pa kano kapuni, inoko Bible unena’mba Yehova wijanga “pakufuna bulobo.” (Divilu 34:6) Shi tulonga bukomo bwa kwiula ngikadilo ya Leza ya kwija pa kufuna bulobo ne ya kutalala, nabya tulondanga dishinda dya tunangu dine disangaja mpata Yehova.​—Efisesa 5:1.

Ntanda ya dyalelo i kifuko kibi. O mwanda tubwanya kwitana na bantu “ba kwitumbika, ba kwizunzula, batuka Leza, . . . bavubavuba, ba kubulwa kwīfula, ba bukalabale bwa malwa.” (2 Temote 3:2, 3) Nansha nankyo, kino kekifwaninwepo kukankaja bene Kidishitu kutamija ngikadila ya kutalala. Kinenwa kya Leza kituvuluja’mba “tunangu tutūka mūlu . . . i twa ndoe, twa mutyima unekena.” (Yakoba 3:17) Shi tukimba ndoe ne kwikala na mutyima unekena, nabya tukalombola’mba tudi na tunangu tutamba kudi Leza. Tuno tunangu tuketutonona tulondolole na kikōkeji pobetukolomona kadi tuketufwenya bininge pabwipi na Yehova, Nsulo ya tunangu ketudi mpwilo.