1. I kintu’ka kimwekele mu mingilo ya Leza tamba ku ngalwilo?

YEHOVA ne Yesu badi umbumo tamba ku ngalwilo kwa bupangi. Yehova wāpangile bidi Yesu kumeso kwa kupanga bintu bikwabo byonso. Kupwa, Yesu wāingila pamo nandi bu “sendwe mwine mukata.” (Nkindi 8:30) Bengidi ba Yehova nabo bengilanga umbumo mwingilo obanenwe kwingila. Kimfwa, Noa ne kisaka kyandi baūbakile safini pamo. Mwenda mafuku, bene Isalela bāingile pamo pa kūbaka tabenakulo, kwiipandula, ne kwiisela yadi koku keidi koku. Ku tempelo nako, bādi bemba ne komba byombanwa pamo mwanda wa kutendela Yehova na minjiki mileululwe. Shi bantu ba Yehova bābwenye kulonga bino byonso, i mwanda bādi bengidila kya pamo.—Ngalwilo 6:14-16, 22; Umbadilo 4:4-32; 1 Bilongwa 25:1-8.

2. (a) I mwanda’ka utendelwa wāmwekele mu kipwilo kya bene Kidishitu babajinji? (b) I bipangujo’ka byotusa kwisambila’po?

 ² Bene Kidishitu ba mu myaka katwa kabajinji nabo bādi bengidila umbumo. Mutumibwa Polo i munene amba nansha byobādi na bwino ne mingilo mishileshile, inoko bādi umbumo. Bonso bādi balonda Mwendeji wabo, ke Yesu Kidishitu kadi. Polo wēbadingakenye na umbidi udi na bipindi palapala bingidila byonso pamo. (Tanga 1 Kodinda 12:4-6, 12.) Ino le batwe netu dyalelo? Le tubwanya namani kwingidila pamo mu mwingilo wetu wa kusapula, mu kipwilo, ne mu kisaka?

3. Le mutumibwa Yoano wāmwene kimonwa’ka?

³ Mu myaka katwa kabajinji, mutumibwa Yoano wāmwene kimonwa kya bamwikeulu 7 bavumija bimpungidi. Pāvumije mwikeulu wa butano kimpungidi, Yoano wāmona “luñenyenye lumo lwatamba mūlu lwapona panshi.” Luno “luñenyenye” lwādi na lufungulo lwa kushitula nalo mu kina kya lupongo lulampe mudi fututu. Mwishi mwine wao keufituka mu kina, kadi ne njie keitambe’mo. Pa kyaba kya kulonga mityi ne munamuna kibi, ino njie ayo yakatamba bantu “bampikwa kiyukeno kya Leza pa mapala abo.” (Kusokwelwa 9:1-4) Yoano wādi uyukile amba njie ibwanya kuleta musala; ye moyālongele ne mu Edipito mu mafuku a Mosesa. (Divilu 10:12-15) Ino njie yāmwene Yoano yelekeja bene Kidishitu bashingwe māni basapula musapu wa bukomo utuluja bipwilo bya bubela. Kadi bantu bavule bene basaka kwikala na būmi pano pa ntanda i belunge kobadi. Abo bonso, basapulanga kyapamo. Buno busapudi i bukwashe bavule banyeme mu kipwilo kya bubela ne kwinyongolola mu lupusa lwa Satana.

4. I mwingilo’ka udi na bantu ba Leza, ne i muswelo’ka umo kete obabwanya kwiuvuija?

⁴ Tudi na mwingilo wa kusapula “myanda miyampe” ku bantu ba ntanda yonso kumeso kwa mfulo kufika. Uno bine i mwingilo mukatampe! (Mateo 24:14; 28:19, 20) Twitanga bonso badi ne “kyumwa” bāye batome “mema a būmi,” nanshi, tufwaninwe kufundija bubine bwa mu Bible ku boba bonso basaka kwibwimvwanija. (Kusokwelwa 22:17) Tubwanya kulonga namino enka shi ‘twi babambakanibwe pamo’ ne kwingila umbumo na banabetu mu kipwilo.—Efisesa 4:16.

5, 6. Le twikalanga namani umbumo potusapula myanda miyampe?

⁵ Pa kufikila bantu bavule, bilomba kwikale ndudi miyampe ya mwa kusapwila. Bulombodi botutambula ku kipwilo bwitukwashanga tusapule mu ndudi. Shi tubapu kupwila kwa kwenda mu busapudi, twendanga kukasapwila  bantu myanda miyampe ya Bulopwe. Kadi twibapanga mabuku esambila pa Bible. Bine pano ke tudi beapāne mavule mpata ntanda yonso. Kyaba kimo betulombanga kwenda mu tumpanye twa pa bula twa busapudi. Poingila uno mwingilo, udi umbumo na bantu midiyo basapula musapu wa muswelo umo ntanda yonso! Kadi wingidilanga pamo na bamwikeulu bakwasha bantu ba Leza kusapula myanda miyampe.—Kusokwelwa 14:6.

⁶ Tusangalanga bine kwimvwana myanda ya mu Annuaire ilombola bilupuka ku mwingilo wa kusapula ntanda yonso! Langa bidi motwilungile umbumo ntanda yonso potwita bantu ku bitango. Kwine’kwa, ye kotwimvwananga myanda ya muswelo umo. Mashikulu, madrame, ne bya kumwena’ko bitukankamika tupe Yehova byobya bitabukile kunengela. Kadi twiluñanga pamo na batutu ne bakaka ba ntanda yonso potutanwa ku Kivulukilo mwaka ne mwaka. (1 Kodinda 11:23-26) Tuloñanga’kyo mu difuku dimo dyonka dya 14 Kweji wa Nisane, pa kupwa kupona kwa dyuba, mwanda wa kufwija’ko Yehova pa byobya byaetulongēle ne kukōkela musoñanya wa Yesu. Kadi mayenga abala-anga kumeso kwa Kivulukilo, twingilanga pamo mwingilo wa kwita bantu bavule belunge netu ku kino kinkumenkume.

7. Le i bika byotubwenye kulonga mwanda wa kwingila kotwingidila umbumo?

⁷ Lujie lumo kelubwanyapo kulonga bivule. Netu bunka, ketubwanyapo kusapwila bantu bonso. Ino byotwingidila pamo, twi babwanye kusapwila midiyo ya bantu myanda ya Yehova ne kwibakwasha bamulēmeke ne kumutendela.

8, 9. (a) Lelo i kyelekejo’ka kyāingidije Polo pa kufundija bene Kidishitu bekale umbumo? (b) I muswelo’ka otubwanya kwingidila pamo mu kipwilo? (Tala kifwatulo ku ngalwilo)

⁸ Polo wāshintulwidile bene Efisesa mulongolwedilwe kipwilo, ne kwibalombola’mba kipwilo kyonso kifwaninwe kutama “mu bintu byonso.” (Tanga Efisesa 4:15, 16.) Polo wāingidije kimfwa kya umbidi pa kulombola’mba mwine Kidishitu ense ubwanya kukwasha kipwilo kyonso kishale umbumo ne kulonda Yesu, Mwendeji wakyo. Wānene amba bipindi byonso bya ku umbidi bingidilanga pamo “kupityila ku nungilo ya mikupa yo-yonso ileta byobya bisakwa.” Penepo i bika byotufwaninwe kulonga batwe bonso, bankasampe ne banunu, bakomo ne babela?

⁹ Yesu i mutonge bakulumpe kutangidila kipwilo, kadi usaka twibalēmeke ne kulonda bulombodi bobetupa. (Bahebelu 13:7, 17) Ke ponsopo pokipēla. Ino tubwanya kulomba Yehova etukwashe. Mushipiditu wandi ujila ukokeja kwitukwasha tukōkele bulombodi bonso bwitupa bakulumpe. Langa kadi motubwanya kukwashisha bininge kipwilo shi twi betyepeje ne kwingidila pamo na bakulumpe. Kipwilo  kikekala umbumo, kadi tukesanswa batwe bene na bene bininge.

10. Lelo bengidi ba mingilo bakwashanga namani kipwilo kikale umbumo?

¹⁰ Bengidi ba mingilo nabo bakwashanga pa kulama bumo bwa kipwilo. Bengilanga bininge mu kukwasha bakulumpe, o mwanda twibafwija’ko pa byonso byobalonga. Kimfwa, bengidi ba mingilo batalanga shi kudi mabuku mabwane a kusapula nao, kadi batundailanga beni bāya ku kipwilo. Bengilanga bininge pa kulongolola Njibo ya Bulopwe ne kwiikundula. Shi twingidila pamo na bano batutu, tukekala umbumo ne kwingidila Yehova mu ndudi.—Dingakanya na Bilongwa 6:3-6.

11. Lelo bankasampe babwanya kulonga bika pa kukwasha kipiwlo kikale umbumo?

¹¹ Bakulumpe bamo ke bengile bininge mu kipwilo mu bula bwa myaka mivule. Inoko padi pano kebakikokejapo kulonga byobadi balonga, mwanda wa bununu. Batutu bankasampe babwanya kukwasha’ko. Shi abafundijibwa biyampe, bakokeja kuvuija mingilo mikatampe mu kipwilo. Kadi bengidi ba mingilo pobengila bininge, babwanya kukengila bu bakulumpe mwenda mafuku. (2 Temote 3:1, 10) Bakulumpe bamo bakidi bankasampe baikele kwendelela kumeso. Pano bengilanga bu batadi ba bipindi, bakwasha batutu ne bakaka mu bipwilo bivule. Tufwija’ko bano bankasampe badi na mutyima wa kwingidila batutu ne bakaka.—Tanga Ñimbo 110:3; Musapudi 12:1.

12, 13. I bika bikakwasha bonso mu kisaka bengidile umbumo?

¹² Le tukakwasha namani ba mu kyetu kisaka bengile umbumo? Butōtyi bwa kisaka bwa yenga ne yenga bubwanya kwitukwasha. Shi bambutwile ne bana befundila pamo myanda ya Yehova, buswe bobeswele bukaninga. Mu kino kitatyi, babwanya kwifunda myanda yo bakanena mu busapudi ikakwasha bonso beteakanye biyampe. Kadi shi bateja pesambila muntu ne muntu pa bubine ne kumona kisaka kyonso mokisanshilwe Yehova ne kusaka kumusangaja, bakapwana bininge.

¹³ Le ba mulume ne mukaji babwanya namani kwingidila umbumo? (Mateo 19:6) Shi abo bonso baswe Yehova ne kumwingidila pamo, bakekala umbumo ne na nsangaji mu busongi bwabo. Bafwaninwe kadi kwisanswa, na mwēsanshilwe ba Abalahama na Sala, ba Izake na Lebeka, ne ba Elekana na Hana. (Ngalwilo 26:8; 1 Samwele 1:5, 8; 1 Petelo 3:5, 6) Shi ba mulume ne mukaji abalonga namino, bakekala  umbumo ne kufwena pabwipi na Yehova.—Tanga Musapudi 4:12.

14. Shi mulume nansha mukaji kengidilangapo Yehova, le ukalonga bika pa kulama busongi bwenu bukomo?

¹⁴ Bible unena patōka’mba ketufwaninwepo kwisonga na muntu kengidilapo Yehova. (2 Kodinda 6:14) Ino, kudi batutu ne bakaka bamo besongele na muntu ke Kamonipo wa Yehova. Bamo befundile bubine papo ke besonge kala, ino mwinē pandi kwikala Kamoni mpika. Bakwabo badi bengidi ba Yehova pobesongele, ino kupwa mulume nansha mukaji wapaluka mu kipwilo. Mu ino ngikadilo, bene Kidishitu baloñanga bukomo bwa kulama busongi bwabo na kukōkela madingi a mu Bible. Ke ponsopo pobipēlanga. Kimfwa, Mary ne mulumyandi David, badi bengidila Yehova pamo. Kupwa, David waleka kupwila. Ino Mary waendelele kulonga bukomo bwa kwikala mukaji muyampe ne kulombola ngikadila ya bwine Kidishitu. Kadi wafundije bana bandi basamba myanda itala padi Yehova ne kwendelela kupwila ne kutanwa ku bitango. Myaka pa kupita’po, bana batama ne kutamba kwinjibo, Mary wadi’nka wingidila Yehova nansha byaadi mu ngikadilo mikomo mpata. Kupwa, David washilula monka kutanga mapepala adi amushila Mary. Mwenda mafuku, washilula kupwila dimodimo. Wandi munkana wa myaka isamba wadi umulamina nyeke pa kushikata, ino shi David kailepo, munkana wadi umunena’mba, “Nkambo, nakukimbanga dyalelo ku kupwila.” Myaka 25 pa kupita’po, David wajokela kudi Yehova, pano aye ne mukajandi badi na nsangaji ya kwingidila monka Yehova umbumo.

15. Lelo boba ke beje mu busongi babwanya namani kukwasha boba besongele panopano?

¹⁵ Satana utambanga bisaka dyalelo. O mwanda ba mulume ne mukaji batōta Yehova bafwaninwe kwingidila pamo. Nansha shi ke mudi beje  mu kwisonga, langulukilai nyeke pa byomunena ne byomulonga mwanda wa kukomeja busongi bwenu. Shi ke mudi beje mu busongi, mubwanya kwikala bu kimfwa kiyampe ku boba besongele panopano. Pamo mubwanya kwita boba besongele panopano batanwe ku butōtyi bwenu bwa kisaka. Bakamona’mba nanshi, nansha shi abaije namani mu busongi, babwanya kwiswa ne kwingidila pamo.—Tetusa 2:3-7.

16, 17. Le i bika bitengele bengidi ba Leza bengidila umbumo?

¹⁶ Bene Isalela bādi bengidila pamo pa kwenda ku masobo a mu Yelusalema. Bādi bateakanya bintu byonso bya mu lwendo. Bādi benda pamo ne kwikwasha. Ku tempelo nako, bādi batendela Yehova ne kumutōta kyapamo. (Luka 2:41-44) Dyalelo, pano potwiteakanya kwikala mu ntanda impya, tusakilwa kwikala umbumo ne kwingidila pamo. Lelo kudi miswelo yobwanya kwilumbulula mu uno mwanda?

¹⁷ Bantu ba mu ino ntanda kebomvwañanangapo kadi bēlwanga pa bintu bivule. Ino batwe tufwijanga’ko Yehova pa kwitukwasha twikale na ndoe ne kwimvwanija bubine! Bantu bandi ntanda yonso bamutōtanga mu muswelo wasaka. Kadi mu ano mafuku a mfulo mo mwine mwikutyile bantu ba Yehova umbumo. Enka mwālaile’kyo ba Isaya ne Mika mu bupolofeto, tukandanga “ku lūlu lwa Yehova” umbumo. (Isaya 2:2-4; tanga Mika 4:2-4.) Kumeso’ku, bine ikekala nsangajipo kashā pakekala bantu bonso pano pa ntanda ‘babambakanibwe pamo’ ne kutōta Yehova umbumo!