1-3. (a) Le bene Kidishitu balombolanga namani amba basangelanga kupwila? (Tala kifwatulo ku ngalwilo.) (b) I bika byotusa kwisambila’po mu kino kishinte?

CORINNA paadi na myaka 17, inandi wakwetwe ne kukakutwa kulampe mu komponi ka masusu. Kupwa, Corinna nandi waselelwa ku ntanda kalubwanga, ku Siberi. Kwine’kwa wadi wingila mu madimi, bamwingidija bwa umpika. Kyaba kimo wadi wingila panja padi mashika makamankate kwampikwa bivwalwa bya kumukinga. Nansha nabya, Corinna ne kaka mukwabo bakwete butyibi bwa kulonga bukomo bwa kutamba ku madimi mwanda wa kukatanwa ku kupwila.

² Corinna unena’mba: “Twatambile kyolwa kotwingila ne kulonga makilometele 25 pa kufika ku ngala ya kudiye. Kudiye yataluka na nsá ibidi ya bufuku, kadi twalonga mansá asamba ebiya twatūka ne kwenda monka makilometele dikumi pa kufika kwa kupwidila.” Corinna wadi musangale pa kwenda namino. Unena’mba: “Twefundile Kiteba  kya Mulami ku kupwila ne kwimba ñimbo ya Bulopwe. Bine twakankamikilwe ne kukomeja lwitabijo lwetu.” Bano bakaka babidi bajokēle ku madimi kupwa kwa mafuku asatu, mwinē madimi kadipo uyukile amba badi bende.

³ Bengidi ba Yehova batanga nyeke mutyima ku kwibungila pamo. Kimfwa, bene Kidishitu babajinji bādi basenswe kwibungila pamo mwanda wa kutōta Yehova ne kwifunda yandi myanda. (Bilongwa 2:42) Padi nobe usangelanga kwenda kukapwila. Ino padi bikukomenanga kutanwa kitatyi ne kitatyi ku kupwila pamo bwa batutu ne bakaka bakwabo. Padi bakulombanga kwingila mansá mavule nansha padi udi na twaji tuvule ne dimodimo i bukōke. Pene’pa, i bika biketukwasha tulonge bukomo bwa kutanwa ku kupwila? ^[1] (Tala bilembwa bya ku mfulo.) I muswelo’ka otukakankamika befundi ba Bible ne banabetu batanwe kitatyi ne kitatyi ku kupwila? Kino kishinte kisa kushintulula mwanda waka kupwila (1) i kwa kamweno kotudi, (2) kukankamikanga bakwabo, ne (3) kusangajanga Yehova. ^[2]​—Tala bilembwa bya ku mfulo.

4. Lelo kupwidila pamo kwitukwashanga namani twifunde myanda itala Yehova?

⁴ Kupwila kwitufundijanga. Kupwila konso kwitukwashanga twifunde bivule padi Yehova. Kimfwa, bipwilo bivule byefundile dibuku Fwena Kudi Yehova mu Kifundwa kya Bible kya Kipwilo. Lelo weimvwene namani pomwabandawile ngikadila ya Yehova ne mweivwanine banabetu padi? Bine kino kyakulengeje usanswe Yehova bininge. Kadi ku kupwila, twifundanga’ko bivule bitala pa Bible na kuteja na katentekeji mashikulu, bya kumwena’ko, ne butangi bwa Bible. (Nehemia 8:8) Kadi langulukila pa bintu bivule byotusokolanga yenga ne yenga potuteakanya butangi bwa Bible ne potuteja ñeni iboile’ko bakwetu.

5. Lelo kupwila i kukukwashe namani wingidije byobya byowifunda mu Bible ne kulumbulula musapwilo obe?

⁵ Kupwila kwitufundijanga mwa kwingidijija mu bwetu būmi byobya byotwifunda mu Bible. (1 Tesalonika 4:9, 10) Kimfwa, lelo kodi mutanwe ku Kifundwa kya Kiteba kya Mulami kyakulengeja wikale na mutyima wa kulonga bivule mu mwingilo wa Yehova, ulumbulule milombelo yobe, nansha kufwila tutu nansha kaka kampanda lusa? Kupwila kwa mu bukata bwa yenga kwitufundijanga mwa kusapwila myanda miyampe ne mwa kukwashisha bakwabo bemvwanije bubine bwa mu Bible.—Mateo 28:19, 20.

6. Kupwila kwitukankamikanga namani ne kwitukomeja?

⁶ Kupwila kwitukankamikanga. Ntanda ya Satana isakanga kuzozeja lwitabijo lwetu kadi ibwanya kwitulengeja tunyoñame pa mutyima. Ino kupwila kwitukankamikanga ne kwitupa  bukomo bwa kwingidila Yehova nyeke. (Tanga Bilongwa 15:30-32.) Divule, twisambilanga pa muswelo ufikidila bupolofeto bwa mu Bible. Kino kitukwashanga tukulupile bininge amba milao ya Yehova ya kumeso nayo ikafikidila. Batutu ne bakaka kebetukankamikangapo’tu enka na bipindi byobapityija, ino i ne pobaleta malondololo ne pobatendela Yehova mu ñimbo na mutyima umo. (1 Kodinda 14:26) Kadi potwisambanga nabo kumeso ne pa kupwa kwa kupwila, tutūkijibwanga mutyima mwanda tudi na balunda bavule betutele mutyima bya binebine.​—1 Kodinda 16:17, 18.

7. Mwanda waka i kya kamweno kutanwa ku kupwila?

⁷ Ku kupwila, ye kotutambula bukwashi bwa mushipiditu ujila wa Leza. Yesu wingidijanga mushipiditu ujila pa kuludika bipwilo. Ne kadi, i mwitusoñanye amba tufwaninwe kwimvwana “kinena mushipiditu ku bipwilo.” (Kusokwelwa 2:7) Mushipiditu ujila witukwashanga tukomene matompo ne kusapula pa kubulwa moyo. Kadi witukwashanga tukwate butyibi buyampe. O mwanda, tufwaninwe kulonga bukomo bwa kutanwa ku kupwila ne kutambula bukwashi bwa mushipiditu ujila wa Leza.

8. Lelo batōtyi-netu pobetumona ku kupwila, ne pobetwimvwana tulondolola’ko ne kwimba, le bino bibakwashanga namani? (Tala ne kapango “Wiimvwananga Nyeke Biyampe shi Wapu Kupwila.”)

⁸ Ku kupwila, tudi na mikenga ya kulombola batutu ne bakaka amba twibasenswe. Bavule mu kipwilo bōmininanga makambakano makomo. Mutumibwa Polo wāsonekele amba: “Twitei mityima batwe bene na bene.” (Bahebelu 10:24, 25) Tukalombola’mba tutele banabetu mutyima na kutanwa ne kwikankamika nabo ku kupwila. Potupwila, tulombolanga banabetu amba tusakanga kwikala nabo ne kwisamba nabo ne tutele mutyima ku byobalanga. Kadi twibakankamikanga  pobateja malondololo etu ne ñimbo yotwimba na mutyima umo.​—Kolose 3:16.

9, 10. (a) Shintulula mwitukwashisha binenwa bya Yesu bidi Yoano 10:16 twimvwanije mvubu ya kupwila na banabetu. (b) Shi tutanwa nyeke ku kupwila, le tukakankamika namani boba belelwe na ba mu kisaka kyabo?

⁹ Potupwila, tukwashanga kipwilo kikale umbumo. (Tanga Yoano 10:16.) Yesu wēdingakenye bu mukumbi ne balondi bandi bu luombe lwa mikōko. Langulukila pa kino: Shi mikōko ibidi idi pa mukuna, ibidi mikwabo nayo mu musanza, ou umo udi kungi, le ino mikōko itano i luombe lumo? Aa, mwanda luombe lwa mikōko lwikalanga pamo ne kulonda mukumbi. Mo monka, ketufwaninwepo kwitolwela kulampe na banabetu na kuleka kupwila. Tufwaninwe kupwidila pamo pa kwikala “luombe lumo” ne kulonda “mukumbi nandi umo.”

¹⁰ Kupwila kwetu kwitukwashanga twikale umbumo bu kisaka kya bantu besenswe. (Ñimbo 133:1) Bantu bamo mu kipwilo i belwe na ba mu kisaka kyabo, kimfwa bambutwile babo nansha batutu ne bakaka babo. Ino Yesu wālaile kwibapa kisaka kikebaswa ne kwibata mutyima. (Mako 10:29, 30) Shi upwilanga kitatyi ne kitatyi, ukekala bu tata, mama, tutu, nansha kaka wa muntu kampanda mu kipwilo. Shi tulangulukile pa kino, tukalonga bukomo bwetu bonso mwanda wa kutanwa ku kupwila konso.

11. Le kupwila kwitukwashanga namani tupe Yehova kyokya kyafwaninwe?

¹¹ Ku kupwila, tumupanga Yehova kyokya kyafwaninwe. Byadi Umpangi wetu, tufwaninwe kumufwija’ko, kumutumbija,  ne kumulēmeka. (Tanga Kusokwelwa 7:12.) Tuloñanga bino ku kupwila potumulomba, tumwimbila ne kwisambila padi. Bine, tudi na dyese’po kashā dya kutōta Yehova yenga ne yenga!

12. Le Yehova wiimvwananga namani potukōkela musoñanya wandi wa kutanwa ku kupwila?

¹² Yehova ye wētupangile, nanshi tufwaninwe kumukōkela. I mwitusoñanye twendelele kupwila, nakampata pano pafwena mfulo. Nanshi potukōkela uno musoñanya, tusangajanga Yehova. (1 Yoano 3:22) Ujingulwile amba tusakanga na bubine kupwila kadi ukwete na mutyika bukomo botulonga pa kutanwa’ko.​—Bahebelu 6:10.

13, 14. I muswelo’ka otufwenanga Yehova ne Yesu ku kupwila?

¹³ Potutanwa ku kupwila, tulombolanga Yehova amba tusakanga kumufwena aye ne wandi Mwana. Ku kupwila, twifundanga Bible ne kwifunda byobya bitusakila Yehova tulonge ne mwa kwikadila. (Isaya 30:20, 21) Nansha bantu bamo kebengidilangapo Yehova pobāyanga ku kupwila, bajingululanga amba Leza wituludikanga. (1 Kodinda 14:23-25) Yehova wendejanga kupwila kwetu na mushipiditu ujila kadi byobya byotufunda’ko bitambanga kwadi. Potwenda ku kupwila, tutejanga binena Yehova, twimwena mwaetuswelele, ebiya netu twamufwena.

¹⁴ Yesu, Mutwe wa kipwilo wānene’mba: “Popa padi babidi nansha basatu bebungile pamo mu dijina dyami, nami ngidi ponka umbukata mwabo.” (Mateo 18:20) Kadi Bible unena’mba Yesu “unañanga umbukata” mwa bipwilo. (Kusokwelwa 1:20–2:1) I kimweke patōka’mba, Yehova ne Yesu bekalanga netu ne kwitukomeja potupwila. Molangila, Yehova wiimvwananga namani pakumona ulonga bukomo bwa kumufwena aye ne wandi Mwana?

15. Potwenda ku kupwila, le tulombolanga namani amba tusakanga kukōkela Leza?

¹⁵ Potutanwa ku kupwila, tulombolanga Yehova amba tusakanga kumukōkela. Yehova ketuningilangapo kulonga byanena. (Isaya 43:23) Nanshi potutonga kukōkela musoñanya wandi wa kutanwa ku kupwila, tumulombolanga’mba tumuswele kadi twitabije’mba aye ye ufwaninwe kwitulombola bya kulonga. (Loma 6:17) Kimfwa, le tukalonga namani shi mukulumpe wa kaji wetunena kwingila bininge ke tukomenwa kutanwa ku kupwila kitatyi ne kitatyi? Padi Leta ukokeja kunena’mba ense upwila mwanda wa kutōta Yehova ukafuta amande, kukutwa, nansha kupebwa mfuto imo mikomo. Nansha padi tubwanya kutonga kulonga kintu kikwabo pa kyaba kya kwenda ku kupwila. Mu ino myanda yonso, tunenwe kutonga kya kulonga. (Bilongwa 5:29) Inoko ponso potutonga  kukōkela Yehova, tumusangajanga.​—Nkindi 27:11.

16, 17. (a) Le tubayuka namani amba kupwila kwādi na mvubu bininge ku bene Kidishitu ba mu myaka katwa kabajinji? (b) Le Tutu George Gangas wadi wiimvwana namani pa mwanda utala kupwila kwa bwine Kidishitu?

¹⁶ Pa kupwa kupwila kwa mu Pentekosa wa mwaka wa 33, bene Kidishitu bādi bapwila nyeke mwanda wa kutōta Yehova. “Badi batakamene nyeke mu lufundijo lwa batumibwa, mu kwiabila bya kwiabila abo bene na bene.” (Bilongwa 2:42) Nansha byobādi bapangwapangwa na Leta wa Loma ne na bendeji ba bipwilo bya bayuda kebālekele’byopo kupwila. Nansha byobyādi bikomo, abo bālongele nyeke buninge bwa kwibungila pamo.

¹⁷ Dyalelo nadyo, bantu ba Yehova badi na mutyima wa kufwija’ko pangala pa kupwila kadi basangelanga kutanwa’ko. Tutu George Gangas, waingile mu Kitango Kyendeji mu bula bwa myaka 22 wanene amba: “Kondi amiwa, kupwila pamo na banabetu kyo kintu kinsangaja kutabuka mu būmi, kadi yo nsulo ya kukankamikwa. Nsenswe kufika umbajinji ku Njibo ya Bulopwe, ne shi bikokejika kutaluka wa mfulo. Ngivwananga nsangaji keineneka ponesambanga na bantu ba Leza. Potudi nabo neivwananga bwa ami udi kwinjibo na kyami kisaka, mu paladisa ya ku mushipiditu.” Ubweja’ko amba: “Kyonsaka mu milangwe ne mu mutyima i kutanwa ku kupwila.”

18. Le wiimvwananga namani pa mwanda wa kupwila, ne ubasumininwa kulonga bika?

¹⁸ Nobe wiimvwananga uno muswelo pa mwanda utala kutōta Yehova? Shi i amo, nankyo longa nyeke bukomo bwa kupwila na banabetu, nansha ke pobimweka bu bikomo. Lombola Yehova amba wiimvwananga na bubine pamo bwa Mulopwe Davida, wānenene amba: “Abe Yehova, nswele mwikadilo wa munjibo mobe.”​—Ñimbo 26:8