Haykanush, musapudi wa kubulwa kubatyijibwa wa mu Armeni, waboile mukanda wa dishinda (passeport) kubwipi na kwashikatanga. Munda mwa uno mukanda mwadi kalata ka ku banki ne lupeto luvule. Wakasapwila’mo wandi mulume, nandi musapudi wampikwa kubatyijibwa.

Bano ba mulume ne mukaji kebadipo na lupeto kadi badi na ndeni. Inoko, bakwete butyibi bwa kukajokeja lupeto’lwa ku adelese yadi mu mukanda wa dishinda’wa. Muntu wajimije lupeto’wa ne kyandi kisaka batulumukile bininge. Haykanush ne wandi mulume bebashintulwidile amba ketudipo na budimbidimbi mwanda twifundanga Bible. Kupwa uno mukenga webalengeje basapwile kino kisaka myanda ya Batumoni ba Yehova ne kwibapa mabuku.

Kino kisaka kyasakile kufuta Haykanush lupeto ino wapela. Bukya lubanga mukaji wakapempula Haykanush ne wandi mulume ku njibo kwibafwija’ko monka bininge kadi wamuningila etabije kaninga-munwe ka diama.

Pamo bwa kino kisaka, bantu bavule badi ba kutulumuka pa kuno kubulwa budimbdimbi kwa Haykanush ne wandi mulume. Ino le Yehova nandi watulumukile? Le wamwene namani kuno kubulwa budimbidimbi kwabo? Le kubulwa budimbidimbi kwabo kwadi na kamweno?

Bino bipangujo ke bikomopo kulondolola. Mwanda waka? Mwanda bengidi ba Leza bayukile amba kwiula ngikadilo ya Yehova kyo kintu kya mvubu kwadi kupita ne diama, olo, ne bintu bikwabo bya ku ngitu. Eyo, byobya bimona Yehova bu bilēme i bishile na byobya bimona bantu bu bya mvubu. (Isaya 55:8, 9) Kadi bengidi ba Yehova bayukile amba kwiula ngikadilo yandi kudi na mvubu mpata.

Tubwanya kwikimona mu byobya binena Bible pa tunangu ne kwimvwanija. Nkindi 3:13-15 inena amba: “Keye wansangaji yewa muntu umona ñeni, kadi ne muntu wikala na kwivwanija. Mwanda kamweno kabyo katabukile būya kamweno ka ndalama, kabidi kadīlo kabyo katabukile būya nsahabu itōka. Bitabukile bulēme mabwe a lubi, kadi nansha kimo kyosaka kikōkeja kudingakanibwa nabyo.” Bine Yehova ukwete na mutyika ino ngikadilo kutabuka bintu bya ku ngitu.

Le kubulwa budimbidimbi nako le?

Yehova aye mwine kadipo na budimbidimbi. “Aye kabwanyapo kubepa.” (Tetusa 1:2) Wāpele mutumibwa Polo mushipiditu alembele bene Kidishitu Bahebelu ba mu myaka katwa kabajinji amba: “Mwitulombelelai’ko nyeke, mwanda tukulupile amba tudi na mutyima wa mundamunda wampikwa budimbidimbi, byotusaka kwiendeja kwampikwa budimbidimbi mu byonso.”​—Bahebelu 13:18.

Yesu Kidishitu i mushiye kimfwa kiyampe kya kubulwa budimbidimbi. Kimfwa, pāmunene Kitobo Mukatampe Kaifasa amba, “Ne Leza mūmi nakutyipija, witulombole shi abe ye Kidishitu Mwanā Leza!” Yesu wēyukenye pampikwa kafinda amba ye aye Meshiasa. Wānene bya bine nansha byaādi uyukile amba Sanhedrini isa kumutopeka amba utukanga Leza ne kumufikija ku lufu.​—Mateo 26:63-67.

Batwe netu le? Le tukashala bampikwa budimbidimbi shi tubatanwa mu ngikadilo itulomba kubepa nansha kunyengakanya myanda mwanda wa tumwene’mo kintu kampanda?

I bikomo kwikala wampikwa budimbidimbi mu ano mafuku a mfulo mudi bantu bavule ‘ba kwisanswa abo bene, ne ba kusanswa lupeto.’ (2 Temote 3:2) Shi misokwe ibakoma nansha kusokola kaji, bavule kebamonangapo amba, kwiba, kudimba, ne kulonga bilongwa bikwabo bya budimbidimbi i mwanda mukatampe. Uno mulangilo ke musambakane konso ne bavule i bamone’mba budimbidimbi o muswelo umo kete wa kusokola bintu bya ku ngitu. Enka ne bene Kidishitu bamo bakwete butyibi bubi bwa “kumwena mu bya budimbidimbi” bajimija ne bulēme bobadi nabo mu kipwilo.​—1 Temote 3:8; Tetusa 1:7.

Inoko, bene Kidishitu bavule beulanga Yesu. Bayukile amba kwiula ngikadilo ya Leza kudi na mvubu kupita bupeta bo-bonso nansha tumweno. Kino kyo kilengejanga bankasampe bene Kidishitu baleke kutentula ku masomo mwanda wa kubinga. (Nkindi 20:23) Shako kubulwa  budimbidimbi kekuletangapo nyeke mpalo na mwalongele’kyo Haykanush. Kwikala nyeke bampikwa budimbidimbi kudi na mvubu ku meso a Leza kadi kwitulengejanga twikale na mutyima wa mundamunda utōka kintu kya mvubu mpata.

Kimfwa kya Gagik kibingija uno mwanda. Unena’mba: “Ponadi nkyaikele mwine Kidishitu, nadi ñingila mu sosiete mikatampe, mukulumpe wa sosiete’ya wadi upela kufuta bitanshi ino wibatyiba’tu milomo na kalupeto katyetye. Byonadi kapita wa kaji, nadi nenwe ‘kwiivwana’ na yewa ufutyija bitanshi apute meso pa bilongwa bya budimbidimbi bilongwa mu sosiete yetu. Mfulo mfulō, natumba bu muntu wa budimbidimbi. Ponefundile bubine, nalekele kano kaji nansha byobadi bamfuta biyampe. Kupwa nashilula kwingila bya ami mwine. Tamba penepa, nalembeja sosiete yami ku leta ne kupota mikanda yonso.”​—2 Kodinda 8:21.

Gagik unena’mba: “Kamweno kami katyepele, natunya kuvuija bisakibwa byonso bya kisaka kyami. Inoko pano ngidi na nsangaji. Ngidi na mutyima wa mundamunda utōka ku meso a Yehova. Ndi kimfwa kiyampe ku bami bana babidi kadi nabwenye bisakibwa bya kwikala na madyese mu Kipwilo. Pano nayukana bu muntu wampikwa budimbidimbi ku boba bafutyija mikanda ne ku bo twingila nabo.”

Yehova usenswe boba bamutumbija na kwiula ngikadila yandi ya kutendelwa, kubadila’mo ne kubulwa budimbidimbi. (Tetusa 2:10) Kadi i mulaye kwitukwasha shi tumwiule. Wāpele Mulopwe Davida mushipiditu anene’mba: “Nadi mwanuke, pano nakule; nanshi nkyamwenepo moloke kulekelelwa, nansha lukunwa lwandi kulomba bidibwa.”​—Ñimbo ya Mitōto 37:25.

Byobya byēmwenine Luta muntu wa kikōkeji bibingija bino binenwa. Wālamete nyeke muko wandi Naomi, kāmunyemenepo pa mwanda wa bununu. Luta wāendele ku Isalela kwaādi ubwanya kutōta Leza wa bine. (Luta 1:16, 17) Wādi wampikwa budimbidimbi kadi wādi wingila mwingilo mukomo wa kukōkolola, kulondakana na mpangiko ya bijila yādi itudilwe’ko balanda. Yehova kaēlelepo ba Luta ne Naomi monka mwa kaēlelepo ne Davida mwenda mafuku. (Luta 2:2-18) Ino wākwatakenye Luta mu miswelo mivule ke enkapo’tu kumupa bintu bya ku ngitu. Wāmutonga ekale wa ku musuku wa Mulopwe Davida ne wa Meshiasa wālailwe!​—Luta 4:13-17; Mateo 1:5, 16.

Bengidi ba Yehova bamo bakokeja kukomenwa kusokola lupeto lwa kuvuija nalo bisakibwa byabo bya mvubu. Inoko bengilanga bininge ne na kininga pa kyaba kya kukimba twaji twa mfutwa miyampe ato’ko twa budimbidimbi. Pobalonga namino bayukanyanga ngikadilo ya kutendelwa ya Leza kubadila’mo ne kubulwa budimbidimbi, ino ngikadilo idi na mvubu bininge kobadi kutabuka bintu byo-byonso bya ku ngitu.​—Nkindi 12:24; Efisesa 4:28.

Pamo bwa Luta, bene Kidishitu kujokoloka ntanda yonso bakulupile amba Yehova udi na bukomo bwa kwibakwasha. Bakulupile na mutyima umo mudi Yewa wālaile’mba: “Nkikakushiyepo nansha dimo kadi nkikakwelapo nansha dimo.” (Bahebelu 13:5) Misunsa mivule Yehova wilombolanga’mba ubwanya kadi ukakwasha boba bampikwa budimbidimbi mu bitatyi byo-byonso. Ufikidijanga nyeke mulao wandi wa kuvuija bisakibwa bya mvubu bya bengidi bandi.​—Mateo 6:33.

Shako, bantu babwanya kukwata diama ne bintu bikwabo bya ku ngitu na bulēme. Inoko tukulupilei amba Tata wetu wa mūlu ukwete na bulēme mpata kubulwa budimbidimbi ne ngikadilo mikwabo miyampe kupita’ko mabwe a bulēme!