I kutupu dibuku dya bipwilo didi pamo bwa Bible. Kekudipo dibuku dikwabo dilamine nkulupilo ya bantu bavule mu kitatyi kilampe. Pakwabo kadi, kekudipo dibuku dikwabo dibandaulwa na kusumininwa ne kulwibwa.

Kimfwa, befundi bamo batatananga amba Mabible a dyalelo keatentwilwepo senene ku bilembwa bibajinjibajinji. Polofesele umo wa myanda ya bipwilo unena’mba, “Ketubwanyapo kukulupila’mba twi batentule ne kulama mulangwe mwinemwine wa mu bilembwa bibajinjibajinji. Tudi’tu enka na makopi mayule’mo bilubo, kadi makopi mavule ātentwilwe ke papite myaka tutwa na tutwa na pāsonekelwe bilembwa bibajinjibajinji, o mwanda i meshile mu miswelo mivule.”

Bakwabo batatananga bubinebine bwa Bible pa mwanda wa bipwilo byobatamine’mo. Kimfwa Faizal, wafundijibwe na kisaka kyabo kya bantu bampikwa kwikala bene Kidishitu amba Bible i dibuku dijila, inoko i dishintwe. Faizal unena’mba “Mfulo mfulō, bantu pobadi basaka kunsapwila myanda ya mu Bible, nkyadipo ngitabija. Mwanda, kebadipo na Bible wa bilembwa bibajinjibajinji. Wāshintyilwe!”

Lelo bidi na mwanda shi Bible wāshintyilwe nansha kāshintyilwepo? Langulukila bidi pa bino bipangujo: Le wadi ubwanya kukulupila milao ya mu Bible ileta busengi ya mu mafuku a kumeso shi kwadipo uyukile’mba yādi mu bilembwa bibajinjibajinji? (Loma 15:4) Le wadi wa kwingidija misoñanya ya mu Bible pa kukwata butyibi bwa mvubu butala pa kaji, kisaka nansha butōtyi shi kwadi amba Mabible a dyalelo i makopi a ñano bitupu ne mfumo ya bantu?

Nansha mikanda mibajinjibajinji ya Bible byokeikimwekangapo, tubwanya kubandaula makopi a kala​—mwine mubadilwa ne bilembwa tununu ne tununu bya ku makasa bya Bible. Le bino bilembwa byāpandile namani ku koneka, ku kutambwa, ne ku kushintwa? Le kupanda kwabyo kubwanya namani kuningija kikulupiji kyobe mu bubinebine bwa Bible odi nandi dyalelo? Tala malondololo a bino bipangujo mu mānga ya kupanda kwa Bible ilonda’ko.