1, 2. (a) Lelo Isaya 60:22 ufikidilanga namani mu kino kitatyi kya mfulo? (b) Lelo i bika bisakibwa mu kipindi kya pano panshi kya bulongolodi bwa Yehova?

“PENEPA kadi katyetye kakālamuka kanunu, kadi katyutyu’ka ke muzo mukomo.” (Isaya 60:22) Bino binenwa bifikidilanga mu kino kitatyi kya mfulo. I bine, mu 2015, kwadi bengidi ba Yehova 8 220 105 basapula myanda miyampe ya Bulopwe pano pa ntanda ponso! Leza wēsambīle pa kuno kuvula kwa bantu bandi amba: “Ami Yehova nkapelakanya’byo mu bitatyi byabyo.” Kitatyi kyenda kipita, mingilo nayo yotufwaninwe kwingila batwe bonso yenda ivudila’ko. Le tuloñanga byonso byotubwanya mwanda wa kusapula ne kufundija myanda miyampe? Batutu ne bakaka bavule bengilanga kala bu bapania bakwashi nansha ba lonso. Bamo i bavilukile ku bifuko bikwabo mwanda wa kukakwasha ku mwingilo wa busapudi, kadi bakwabo bengilanga bininge ku mwingilo wa kūbaka Mobo a Bulopwe.

² Mwaka ne mwaka, kubundwanga bipwilo bipya 2 000. Bino bipwilo bisakilwa bakulumpe ne bengidi ba mingilo.  Mwaka ne mwaka kusakibwanga bengidi ba mingilo tununu ne tununu ba kwingila bu bakulumpe ne batutu tununu ne tununu ba kwikala bu bengidi ba mingilo. I kimweke patōka’mba, kudi bivule “bya kulonga mu mwingilo wa Mfumwetu,” kadi ke’nkapo ku batutu kete i ne ku bakaka.​—1 Kodinda 15:58.

3, 4. Le kwendelela kumeso kukulomba bika ne bika?

³ Tanga 1 Temote 3:1. Mutumibwa Polo wāfwijije’ko batutu bādi ‘bakimba’ kwikala bu batadi. Pa kusaka’mba muntu obolole kintu kidi kulampe, bimulomba kulonga bukomo pakwabo i kutamuna kuboko pa kwikisela. Langa bidi ku tutu ukimba kubwanya bisakibwa bya bu mwingidi wa mingilo. Ufwaninwe kujingulula’mba bimulomba kulonga bukomo bwa kulumbulula ngikadilo yandi ya bwine Kidishitu. Shi waingila bu mwingidi wa mingilo, ukendelela kulonga bukomo bwa kubwanya bisakibwa bya kwikala bu mutadi.

⁴ Batutu ne bakaka bamo bashintanga būmi bwabo mwanda basakanga kulonga bivule mu mwingilo wa Yehova. Kimfwa, babwanya kulomba bupania, kwingila ku Betele, nansha kukwasha ku Lūbako lwa Mobo a Bulopwe. Tutalei mubwanya kwitukwashija Bible twendelele kumeso.

5. Le bankasampe babwanya namani kwingidija bukomo bwabo mu mwingilo wa Bulopwe?

⁵ Bankasampe babwanya kulonga bivule mu mwingilo wa Yehova mwanda bakidi na bukomo bwa ngitu ne lupaka. (Tanga Nkindi 20:29.) Batutu bamo bankasampe ku Betele batampanga ne kulamika bitabo ne Mabible. Kadi batutu ne bakaka bavule bankasampe bōbakanga Mobo a Bulopwe nansha kwialongolola. Banabetu bamo ba kwilanga bendanga kukakwasha kokwa kuponene kimpengele. Ino bapania bavule bankasampe befundanga ludimi lweni ne kwenda mu bifuko bikwabo kukasapula myanda miyampe.

6-8. (a) Lelo nkasampe umo mwana-mulume washintyile namani muswelo waadi umona mwingilo wa Leza, ne i bika byalupukile’ko? (b) I muswelo’ka otukokeja ‘kutompa ne kumona’mba Yehova i muyampe.’?

⁶ Tusenswe Yehova kadi tusakanga kumupa kyokya kitabukile kunengela. Nansha nankyo, tubwanya padi kwiimvwana na mweimvwanine tutu umo witwa bu Aaron. Wadi usaka kwingidila Leza, ino kadipo na nsangaji. Nansha Aaron byaashilwile kupwila ne kutambila mu busapudi ukidi mwanuke, wanenene amba, “kupwila ne kusapula kebyadipo bikinsangaja.” Penepo walongele’po namani?

⁷ Aaron walongele bukomo bwa kutanga Bible kyaba ne kyaba, kuteakanya kupwila, ne kulondolola’ko. Washilula ne kulombela kitatyi ne kitatyi. Bino byonso byamukweshe endelele ku mushipiditu. Wayukile Yehova senene ne kumusanswa bininge. Ku mfulo, Aaron waikala na nsangaji mpata. Waingila bupania, wakwasha bakwabo baponenwa na bimpengele bya kipangila, ne kukasapula mu ntanda ingi. Pano i mukulumpe kadi wingilanga ku Betele. Pano umonanga namani bwandi būmi? Aaron amba: “Natompele ‘ne kumona’mba Yehova i muyampe.’ Pa mwanda wa madyese  ampēle, monanga bu ndi na mapu andi ne kino kintononanga nonge bivule mu mwingilo wandi, kadi kindetelanga madyese mavule.”

⁸ Mulembi wa mitōto wānenene amba: “Tompai mumone’mba Yehova i muyampe.” Wābweja’ko kadi amba: “Ke-kuntu i kutupu kubulwa kwa boba bamwakaminwe, mhm.” (Tanga Ñimbo ya Mitōto 34:8-10.) Bine, shi tupe Yehova kyokya kitabukile kunengela, tukasangala binebine mwanda tuyukile amba tubamusangaja. Kadi ukafikidija mulao wandi wa kwitukwatakanya.

9, 10. Mwanda waka i biyampe kwikala na mushipiditu wa ‘kukungila’?

⁹ Tubwanya kwikala na mutyima wa kulonga bivule mu mwingilo wa Yehova. Ino le bikekala namani shi tubatengela kitatyi kilampe madyese kampanda mu kipwilo nansha kushinta kwa ngikadilo yetu? Tufwaninwe kwikala na kitūkijetyima. (Mika 7:7) Nansha Yehova byabwanya kuleka ngikadilo yotudi’mo yendelele, tubwanya’ko kukulupila amba uketukwatakanya nyeke. Tubwanya kuboila ñeni ku kimfwa kya Abalahama. Yehova wāmulaile amba ukabutulanga mwana, ino wādi ufwaninwe kukungila myaka mivule kufika’nka ne bikabutuka Izake. Mu bula bwa kino kitatyi, Abalahama wādi utūkije mutyima kadi kājimijepo nansha dimo lwitabijo lwandi mudi Yehova.​—Ngalwilo 15:3, 4; 21:5; Bahebelu 6:12-15.

¹⁰ Shako, kukungila ke kupēlangapo. (Nkindi 13:12) Ino shi twendelele kulangulukila pa ngikadilo yotudi’mo ne pa kutyumukwa mutyima, nabya tukazoza. I biyampe’ko twingidije kino kitatyi na kulumbulula ngikadilo yotusakilwa pa kusela biselwa kampanda mu kipwilo.

11. I ngikadilo’ka ya ku mushipiditu yotubwanya kutamija, ne mwanda waka idi na mvubu?

¹¹ Tamija ngikadilo ne bwino bosakilwa. Kutanga ne kulangulukila pa byotanga mu Bible kubwanya kukukwasha wikale na tunangu, ulange ne kulanguluka mobifwaninwe, ne kukwata butyibi buyampe. Na bubine, ino yo ngikadilo ne bwino busakilwa batutu pa kulela kipwilo. (Nkindi 1:1-4; Tetusa 1:7-9) Shi twifunda Bible, tukemvwanija mulangila Yehova pa myanda mivule. Ebiya difuku ne difuku, tubwanya kwingidija byotwifunda pa kukwata butyibi busangaja Yehova. Kimfwa, tukayuka mwa kwikadila na bakwabo, mwa kwingidijija lupeto, ne mwa kutongela kwipwija mukose ne bivwalwa.

12. I muswelo’ka ukelombola ba mu kipwilo bu bantu bakulupilwa?

¹² Ingila bininge mwingilo onso obakupa. Pādi pobakulula bengidi ba Leza tempelo, Nehemia wākimbile bana-balume ba kusela biselwa palapala. Wātongele boba bādi banenenwa  māya. Wādi uyukile amba bano bantu basenswe Leza ne babwanya kwingila mwingilo o-onso wibapebwa. (Nehemia 7:2; 13:12, 13) Ye mobikadile ne dyalelo, boba badi na kikōkeji ne bengila bininge banenenwanga māya kadi babwanya kupebwa mingilo mivule. (1 Kodinda 4:2) Nanshi, twikale batutu nansha bakaka, tufwaninwe kulonga bukomo bwetu bonso bwa kuvuija mwingilo onso otupelwe.​—Tanga 1 Temote 5:25.

13. Le i muswelo’ka okalonda kimfwa kya Yosefa shi abakulongela bintu na bukondame?

¹³ Kulupila mudi Yehova. Le ukalonga namani shi bakwabo abakulongela bintu na bukondame? Padi ukebashintulwila mobyakusanshila. Ino shi wibingije ne kukomeneja amba udi na bubinga, ukabipija myanda. Tubwanya kwifunda bivule ku kimfwa kya Yosefa. Banababo bāmulongele bibi. Bantu bāmubepēle bubela ne kumwela mu kifungo pa bintu byakādipo ulongele. Inoko Yosefa wākulupile mudi Yehova. Wāvulukile milao ya Yehova, wāshala na kikōkeji. (Ñimbo ya Mitōto 105:19) Mu bino bitatyi bya makambakano, wātamije ngikadilo miyampe yāmukweshe mwenda mafuku paāpelwe mwingilo mukatampe. (Ngalwilo 41:37-44; 45:4-8) Shi bakwabo abakulongela bintu na bukondame, lomba Yehova tunangu. Ukakukwasha wikale talala ne kwibalongela bintu senene ne kwisamba nabo biyampe byonka.​—Tanga 1 Petelo 5:10.

14, 15. (a) Mwanda waka tufwaninwe ‘kyaba kyonso kuta mutyima’ ku muswelo otusapula? (b) Le ubwanya namani kushinta bintu mungya ngikadilo? (Tala kifwatulo ku ngalwilo ne kapango “Le Udi na Mutyima wa Kutompa’ko Manwa Makwabo?”)

¹⁴ Polo wāsapwidile Temote endelele kulumbulula muswelo waādi ushintulula Bisonekwa. Polo wānenene amba: “Kyaba kyonso wite mutyima abe mwine ne bufundiji bobe.” (1 Temote 4:13, 16) Temote wādi kala musapudi mu bula bwa myaka mivule. Ino mwanda waka wādi usakilwa kwilumbulula? Temote wādi uyukile amba bantu ne ngikadilo bishintanga. Wādi usaka bantu bamuteje, kadi wādi ufwaninwe kwendelela na kwilumbulula ne kushinta muswelo waādi wibafundija. Netu byotusapula dyalelo, tunenwe kulonga nabya.

¹⁵ Mu bifuko bimo, ketutanangapo bantu bavule ku mobo potusapula ku njibo ne njibo. Ino kungi, bantu bavule batanwanga ku mobo abo, ino mwa kwibamwena byakoma padi i mwanda kekudipo muswelo wa kufika pa etaje pobadi. Shi ye mobikadile mu wenu mwaba, ubulwe’po kutompa manwa makwabo a mwa kwimwena na bantu?

16. Le i muswelo’ka otukokeja kusapula biyampe busapudi bwa mu bantu bavule?

¹⁶ Batutu ne bakaka bavule basangelanga busapudi bwa mu bantu bangi. Kimfwa, bendanga ku ngāla, pashīkanga myotoka, mu nsoko, mu biwanza bya mityi mwanda wa kukimba bantu ba kwisamba nabo. Kamoni ubwanya kushilula mīsambo na muntu pa myanda ipityile panopano mu kibundi kampanda. Mukwabo ubwanya kushilula na kutendela bana ba muntu’wa nansha kumwipangula kipangujo kitala kaji kandi kaingila. Shi muntu wasangela mīsambo, musapudi ubwanya kutela mwanda umo wa mu Bible ne kwipangula muntu’wa mwalangila’po. Pavule pene, bantu basakanga kuyuka myanda mivule ya mu Bible.

17, 18. (a) I muswelo’ka obwanya kwikala na kikulupiji posapula mu kibumbo kya bantu? (b) Mitendelo ya Davida yaātendele Yehova idi na mvubu’ka podi mu mwingilo?

¹⁷ Padi bikukolelanga kushilula mīsambo mu kipito na bantu bokuyukilepo. Ye mwadi mwiimvwanina Eddie, pania wa mu New York City. Ino kudi kintu kyamukweshe amone kikulupiji. Unena’mba: “Mu butōtyi bwetu bwa kisaka, ami ne wami mukaji twalongele bukimbi bwa kutana mwa kulondolwela ku bijika ne ku milangwe ya bantu. Kadi twaipangwile ne Batumoni bakwabo milangwe.” Pano Eddie wasanswa kusapula mu bifuko bya bantu bavule.

¹⁸ Shi tusapula bininge ne kulumbulula muswelo otusapwila bantu myanda miyampe, nabya, kwendelela kwetu kwa ku mushipiditu kukamonwa na bakwabo. (Tanga 1 Temote 4:15.) Kadi tubwanya ne kukwasha bakwabo bekale bengidi ba Yehova. Davida wānenene amba: “Nkatotanga Yehova mafuku onso, nyeke; mitendelo yandi īkashikilwanga mu kyakanwa kyami nyeke. Muya wami ukētumbikanga mudi Yehova; bakikōkeji bakēvwanangako ne kuloelelwa monka.”​—Ñimbo ya Mitōto 34:1, 2.

19. Mwanda waka bengidi ba Yehova badi na nsangaji nansha shi badi mu ngikadilo mikomo?

¹⁹ Davida wānenene kadi amba: “Mīngilo yobe yonsololo īkakufwijangako,  abe Yehova; kadi bapandulwemo bobe bakakutōtanga. Bakēsambanga ntumbo ya bulopwe bobe, ne kunena bukomo bobe. Kuyūkanya ku bāna ba bantu bilongwa byandi bikatampe. Ne ntumbo ya buleme bukatakata ya bulopwe bwandi.” (Ñimbo ya Mitōto 145:10-12) Bonso basenswe Yehova i bamukōkele kadi badi na kyumwa kya kusapwila bakwabo myanda yandi. Ino bikekala namani shi pa mwanda wa misongo ne bununu, kukibwanyapo kupityija kitatyi kyowadi upityijanga mu busapudi bwa ku njibo ne njibo? Vuluka nyeke amba utendelanga Yehova kitatyi kyonso kyowisamba na bantu myanda yandi, kimfwa bamuñanga nansha badokitele. Shi udi mu buloko, padi i mwanda wa lwitabijo lobe, ubwanya kwendelela kusapwila bakwabo myanda ya Yehova, ne kino kisangajanga mutyima wandi. (Nkindi 27:11) Usangalanga bininge shi umwingidila nansha shi bantu bakwabo mu kisaka kebamwingidilapo. (1 Petelo 3:1-4) Nansha ke mu makambakano makomo, ubwanya kutendela Yehova, kwendelela na kumufwena, ne kwendelela ku mushipiditu.

20, 21. I muswelo’ka okekala bu dyese ku bakwabo shi ubapebwa mingilo mivule mu bulongolodi bwa Yehova?

²⁰ Bine Yehova ukakwesela shi ufwene kwadi ne kulonga bukomo bwa kumwingidila. Padi shi ushinte bintu mu mpangiko yobe, ukamona mikenga ya kukwasha bantu bayuke milao milumbuluke ya Leza. Kadi ubwanya kukwasha bininge banabenu. Fwatakanya’po mukuswelele batutu ne bakaka pobakumona wingidila bininge kipwilo!

²¹ Nansha shi tubalonga myaka inga mu kwingidila Yehova, batwe bonso tubwanya kwendelela kufwena kwadi ne kwendelela ku mushipiditu. Kishinte kilonda’ko, kikalombola muswelo otubwanya kwendelela kukwasha bakwabo bendelele kumeso.