1, 2. Mwanda waka tufwaninwe kufundija bakwabo babwanye kwingila mingilo ya kiteokratike?

YESU wāingile bininge pa kusapula Bulopwe. Wāpityije kitatyi kivule ufundija bana ba bwanga. Wēbalombwele mwa kufundijija ne mwa kutela bantu ba Leza mutyima. Bana ba bwanga bāfundile kwikala pamo bwa bakumbi batele mikōko mutyima. (Mateo 10:5-7) Fidipa wādi usapula bininge, ino kadi wāfundije bandi bana bana-bakaji bengile uno mwingilo. (Bilongwa 21:8, 9) Netu dyalelo tufwaninwe kufundija bakwabo. Mwanda waka?

² Mu bipwilo bya ntanda yonso, mudi bapya bavule bampikwa kubatyijibwa. Nabo basakilwa kufundijibwa. Tufwaninwe kwibakwasha bemvwanije mwanda waka i biyampe kobadi kutanga ne kwifunda Bible pa kasuku. Kadi tunenwe kwibebidija mwa kusapwila ne kufundija myanda miyampe. Batutu babatyijibwe panopano babwanya mwenda mafuku kukengila bu bengidi ba mingilo ne bu bakulumpe, o mwanda bafwaninwe kufundijibwa. Muntu  ne muntu mu kipwilo ubwanya kukwasha’ko bano bapya.​—Nkindi 4:2.

3, 4. (a) Polo wākwatañenye namani kwifunda Bisonekwa na mwingilo upa bipa? (b) Kumeso kwa kukankamika befundi befunde Bible pa kasuku, le i bika bidi byotufwaninwe kulonga?

³ Mwingidi yense wa Yehova ufwaninwe kutanga ne kwifunda Bible amba ayuke mwikadile kiswa-mutyima kya Leza. Mutumibwa Polo wāshintulwidile’kyo batutu ne bakaka ba mu Kolose paānenene amba: “Ketwalekelepo kwimulombelela ne kulomba’mba muyulwe buyuki bwa binebine bwa kiswa-mutyima kyandi.” Mwanda waka kyādi na mvubu kobadi kutanga ne kwifunda Bisonekwa? Mwanda kino kyādi kya kwibapa tunangu ne kwibakwasha bayuke kunanga “mwa kufwaninwa Yehova mwa kumutōkejeja ku mutyima ne pa mfulo.” Ne kadi kyādi kya kwibakwasha balonge “mwingilo onso muyampe” wādi wibasakila Yehova kulonga, nakampata kusapula myanda miyampe. (Kolose 1:9, 10) O mwanda shi twifunda Bible na muntu, tufwaninwe kumukwasha emvwanije amba kutanga ne kwifunda Bible kitatyi ne kitatyi kubwanya kumukwasha engidile Yehova.

⁴ Ketubwanyapo kukwasha befundi ba Bible bemvwanije mvubu ya kwifunda Bible shi batwe bene ketwifundenga’yepo. I bine shi tutanga Bible kitatyi ne kitatyi ne kulangulukila’po, kino kiketukwasha mu būmi bwetu ne mu mwingilo wetu. Kimfwa, potudi mu busapudi ino muntu wetwipangula kipangujo kikomo, tukengidija Bible pa kumulondolola. Nansha kitatyi kyotutanga myanda ya Yesu, ya Polo ne ya bakwabo bāūminine mu mwingilo, netu tukakankamikwa kadi tukendelela kusapula nansha ke mu ngikadilo mikomo. Kadi potusapwila bantu bintu byotwifundile mu kifundwa kyetu ne mobyetukwashishe, nabya tubebakankamika befunde Bible na mushike amba nabo bamwene’mo.

5. Leta milangwe ya mwa kukwashisha bapya bekale na kibidiji kya kwifunda Bible pa kasuku.

⁵ Wiipangule amba, ‘Le mbwanya namani kukwasha mwifundi efunde Bible kitatyi ne kitatyi?’ Padi ubwanya kumulombola mwa kuteakenya myanda idi mu dibuku dyomwifundanga nandi. Ubwanya kumulombola atange myanda ikwatañene na yomudi’po idi mu mbwejo ya dibuku Lelo I Bika Bine Bifundija Bible? ne kutala mavese a mu  Bible atelelwe’mo. Difuku dikwabo, ubwanya kumulombola mwa kuteakenya kupwila amba nandi akalondolole’ko. Mukankamike atange kweji ne kweji Kiteba kya Mulami ne Réveillez-vous ! Kadi ubwanya kumukwasha mwa kutanina malondololo a bipangujo bimanine pa Bible, na kwingidija kimfwa Watchtower Library nansha KIBĪKO PA ENTELENETE. Shi atompe ano manwa palapala mu kifundwa kyandi kya kasuku, padi ukasangela’kyo ne kusaka kuyukila’ko bivule.

6. (a) Le ukakwasha namani mwifundi atamije buswe bwa kuswa Bible mu mutyima wandi? (b) Padi i bika bikalonga mwifundi wa Bible shi watamija buswe bwa Bisonekwa mu mutyima wandi?

⁶ Potwifunda na muntu, tusakanga ajingulule amba Bible udi na mvubu mwanda ukamukwasha ayuke Yehova senene. Pa kyaba kya kumuningila kifundwa, tubwanya kumulombola mwa kusangela’kyo. Paenda wifunda bivule mu Bible, kakabulwe’po kwiimvwana bwa kaimba wa mitōto wāimbile amba: “Ino i kinengelele ami kufwena kudi Leza; namwene Mfumwami Leza, ke mumpakala mwami.” (Ñimbo ya Mitōto 73:28) Mushipiditu wa Yehova ukakwasha na bubine ense usaka kufwena kwadi.

7. Lelo Yesu wāfundije namani basapudi ba myanda miyampe? (Tala kifwatulo ku ngalwilo.)

⁷ Tubwanya kuboila ñeni ku muswelo wādi ufundija Yesu batumibwa bandi. Yesu wādi wenda nabo mu busapudi, nabo bādi bamutala mwafundijija bantu. Kadi wēbapele bulombodi bupotoloke bwa mobafwaninwe kusapwila. (Mateo, shapita 10) ^[1] (Tala bilembwa bya ku mfulo.) Kitatyi kityetye’tu, batumibwa befundile kudi Yesu mwa kufundijija bantu bubine. (Mateo 11:1) Tutalei bintu bibidi byotubwanya kufundija bapya kulonga pobadi mu busapudi.

8, 9. (a) Le Yesu wādi wisamba namani na muntu ne muntu mu busapudi? (b) Le tukakwasha namani basapudi bapya besambe na bantu na mwālongele Yesu?

⁸ Wisambe na bantu. Yesu kādipo wisamba’nka na kibumbo kya bantu. Divule wādi wisamba ne na muntu ne muntu kadi mu bulunda. Kimfwa, wēsambile biyampe na mwana-mukaji wāile kuteka mema ku mushimwa wa kubwipi na kibundi kya Saika. (Yoano 4:5-30) Kadi Yesu wēsambile na Mateo Levi, musonkeji wa musonko ne kumwita ekale wandi mwanā bwanga. Mateo nandi wāitabija kadi mwenda mafuku, wāendela Yesu ne bakwabo kudya bidibwa kwandi. Kwine’kwa, Yesu wēsambile’ko na bantu bavule.​—Mateo 9:9; Luka 5:27-39.

⁹ Kadi Yesu wēsambile bya bulunda na Natanela, nansha Natanela byaānenene bibi bantu ba ku Nazala. Yesu  byaēsambile nandi bya bulunda, Natanela wāshintyile mwaādi umwena Yesu, muntu wātambile ku Nazala. Natanela wāsaka kwifunda bivule kudi Yesu. (Yoano 1:46-51) Kupityila ku kimfwa kya Yesu, tubefunde amba shi twisamba na bantu bya bulunda, bakekala na mutyima wa kuteja byobya byotunena. ^[2] [Tala bilembwa bya ku mfulo.] Shi tufundije bapya kwisamba uno muswelo, bakasanswa mpata busapudi.

10-12. (a) Le Yesu wādi utamija namani kusangela kwādi kusangela bantu myanda miyampe? (b) I muswelo’ka otukakwasha basapudi bapya balumbulule manwa abo a kufundija bantu bubine bwa mu Bible?

¹⁰ Fundija boba basaka kuteja. Yesu wādi na bivule bya kulonga. Ino shi bantu basaka kumuteja wādi upityija nabo kitatyi ne kwibafundija bivule. Kimfwa, kibumbo kya bantu kyebungīle ku nkula mwanda wa kuteja Yesu. Penepo Yesu wasonsoloka pamo na Petelo kafundija bantu aye mu bwato. Kupwa papo, wāsakile kufundija Petelo nandi. Yesu wālonga kingelengele na kupa Petelo mukenga wa kukwata mwita mungi mpata. Wānena Petelo amba: “Tamba pano ukakwata bantu bōmi.” Ponka’po Petelo ne bakwabo baādi nabo “bajokeja mato ku ntanda, bashiya byonso” ke balonda Yesu.​—Luka 5:1-11.

¹¹ Nikodema nandi wādi usaka kwifunda bivule kudi Yesu. Ino Nikodema byaādi wa mu Sanhedrini, wāimvwene moyo pa bikokeja kunena bakwabo shi abamumone wisamba na Yesu. Ko kwenda kudi Yesu bufuku. Yesu kāmupangilepo ino wāpityije nandi kitatyi ne kumushintulwila bubine bwa mvubu. (Yoano 3:1, 2) Yesu wādi usaka nyeke kwingidija kitatyi kyandi mwanda wa kufundija bantu bubine ne kukomeja lwitabijo lwabo. Mo monka netu, tufwaninwe kwikala na mutyima wa kupempula bantu mu kitatyi kiyampe kobadi, kadi tufwaninwe kupityija nabo kitatyi ne kwibakwasha bemvwanije Bible.

¹² Potusapula na bapya, tubwanya kwibafundija kujokela boba bonso basangela musapu ne kwisamba nabo monka. Tubwanya ne kwibeta betutwale potukajokela bantu ne mu bifundwa bya Bible. Mu uno muswelo, bakamona mwa kufundijija bakwabo ne mobitobelanga kukwasha bantu bayuke bubine butala padi Yehova. Kupwa bano bapya bakasangela kujokela bantu ne kwifunda nabo Bible. Kadi bakefunda kwikala na kitūkijetyima ne kuleka kukōka bukidibukidi shi kebatenepo bantu ku mobo abo.​—Ngalatea 5:22; tala kapango “Kazozelepo.”

13, 14. (a) Le ulanga namani pa bimfwa bya mu Bible bya bantu bēpānine bakwabo? (b) I mu miswelo’ka mobwanya kukwasha basapudi bapya ne bankasampe balombole buswe ku batutu ne bakaka?

¹³ Yehova usakanga bengidi bandi besanswe bu batutu ne bakaka ne kwiingidila. (Tanga Luka 22:24-27; 1 Petelo 1:22.) Bible ushintulula amba Yesu wāpēne byonso, kubadila’mo ne būmi bwandi mwanda wa kukwasha bakwabo. (Mateo 20:28) Dokasa “wadi ulonga bilongwa biyampe bivule ne kupāna byabuntu.” (Bilongwa 9:36, 39) Madia “wasusukile na mingilo”  pa mwanda wa batutu ne bakaka ba mu Loma. (Loma 16:6) Le tubwanya kukwasha namani bapya bemvwanije amba i kya mvubu mpata kulongela batutu ne bakaka bintu bilumbuluke?

¹⁴ Tubwanya kwita mupya etutwale potukapempula banunu nansha boba babela. Kadi shi bambutwile bapempula bantu ba uno muswelo, babwanya kupaika ne babo bana ponso pobikokejika. Bakulumpe babwanya kwita bankasampe nansha bapya kwingila nabo pobenda kutwadila banunu bidibwa nansha kwibalongolwela bintu ku njibo. Shi bankasampe ne bapya abamone muswelo wikwatakanya batutu ne bakaka, nabo bakalongela monka. Kimfwa, mukulumpe umo paadi usapulanga kunja, wadi upita kyaba ne kyaba ku banabetu ba kwine’kwa kumona mobabūkile. Tutu umo nkasampe obadi benda nandi kitatyi ne kitatyi waboile ñeni ku kimfwa kiyampe kya uno mukulumpe, waalula kulanga muswelo wabwanya kukwasha batutu ne bakaka.​—Loma 12:10.

15. Mwanda waka i kya kamweno bakulumpe bate mutyima ku batutu baendelela mu kipwilo?

¹⁵ Yehova i mupe bana-balume kiselwa kya kufundija kipwilo Kinenwa kya Leza. Nanshi i kya mvubu batutu befunde mwa kufundijija biyampe pobanena mashikulu. Shi wi mukulumpe, padi ubwanya kuteja mwingidi wa mingilo wiibidija dishikulu ne kumulēmununa. (Nehemia 8:8) ^[3]—Tala bilembwa bya ku mfulo.

16, 17. (a) Lelo Polo wātele namani mutyima ku kwendelela kwa Temote? (b) Le bakulumpe bakafundija namani biyampe bantu ba kwikala kumeso bu bakulumpe mu kipwilo?

¹⁶ Kusakilwa bine kufundija batutu bavule bekale bakumbi mu kipwilo. Polo wāfundije Temote, wāmukankamika nandi afundije bakwabo. Polo amba: “Nanshi, abe wami mwana, wikomeje nyeke mu kanye kakatampe ka mudi Kidishitu Yesu, kadi bintu byowaivwene kondi byaitabije ne batumoni bavule, pá’byo bantu bakōkele, nabo bakabwanya senene kufundija bakwabo.” (2 Temote 2:1, 2) Temote wēfundile bintu bivule kudi Polo, mwine wādi mukulumpe kadi mutumibwa, kimfwa, mwa kulumbulwila busapudi bwandi ne mwa kukwashisha bakwabo mu kipwilo.​—2 Temote 3:10-12.

¹⁷ Polo wādi upityija kitatyi kivule na Temote mwanda wādi usaka Temote afundijibwe biyampe. (Bilongwa 16:1-5) Bakulumpe babwanya  kwiula Polo na kusela bengidi ba mingilo ba bwino pobalonga bupempudi bwa bukumbi. Namino, bengidi ba mingilo bakefunda kupityila ku bakulumpe mwa kufundijija bakwabo, mwa kwikadila na kitūkijetyima ne buswe, ne muswelo wa kukulupila mudi Yehova pobalama luombe lwandi.​—1 Petelo 5:2.

18. Mwanda waka tufwaninwe kumona na mvubu kufundija bakwabo mwingilo wa Yehova?

¹⁸ Mu bino bitatyi bya ku mfulo, bapya bavule basakilwa kufundijibwa mwa kulumbulwila manwa abo mu busapudi. Kadi kusakilwa batutu ba kwifunda mwa kulamina kipwilo. Yehova usakanga bengidi bandi bonso bekale bafundijibwe senene, ne i mwitupe dyese dya kukwasha bapya. Nanshi i biyampe twingile bininge mwanda wa kufundija bakwabo, enka na mwālongele ba Yesu ne Polo. Tufwaninwe kufundija bavule mwanda kukidi bivule bya kulonga mu busapudi kumeso kwa mfulo kufika.

19. Mwanda waka ufwaninwe kukulupila amba ukabwanya mu bukomo bolonga bwa kufundija bakwabo mwingilo wa Yehova?

¹⁹ Kufundija bapya kulomba kitatyi ne bukomo. Inoko tubwanya kukulupila amba Yehova ne Yesu baketukwasha tuyuke mwa kufundijija bakwabo mu muswelo muyampe mpata. Tukasangala pa kumona boba botwafundije ‘ke bengila bikomo ne kwielelela’ mu mingilo ya kipwilo ya busapudi. (1 Temote 4:10) Kadi, tusakilwa ne batwe bene kulonga bukomo bwa kwendelela ku mushipiditu, kulumbulula ngikadilo ya bwine Kidishitu, ne kufwena pabwipi na Yehova.