1-2. Le i bika byotubwanya kwiipangula pa mwanda utala milombelo?

 LELO kodi mwiipangule shi Yehova ulondololanga milombelo yobe? Shi i amo, kudipo bunka. Batutu ne bakaka bavule nabo beipangwile’nka namino, nakampata kitatyi kyobadi mu makambakano. Netu shi tususuka, bibwanya padi kwitukomena kujingulula muswelo ulondolola Yehova milombelo yetu.

² Tubandaulei’ko kine kyotubwanya kukulupidila’mba Yehova ulondololanga milombelo ya batōtyi bandi. (1 Yo. 5:15) Kadi tusa kulondolola ne bino bipangujo: Mwanda waka kyaba kimo bibwanya kumweka’mba Yehova kalondololangapo milombelo yetu? Le i muswelo’ka ulondololanga Yehova milombelo yetu dyalelo?

3. Mwanda waka Yehova usakanga tulombele kwadi?

³ Bisonekwa bitukulupija’mba Yehova witusenswe bininge kadi witukwete na bulēme. (Hak. 2:7; 1 Yo. 4:10) O mwanda witwita tumulombe etukwashe. (1 Pe. 5:6, 7) Usakanga kwitukwasha tushale pabwipi nandi ne kūminina makambakano otutanwa nao.

4. Le i bika bilombola’mba Yehova ulondololanga milombelo ya batōtyi bandi? (Tala ne kifwatulo.)

⁴ Mu Bible, tutañanga’mo divule muswelo wālondolwele Yehova milombelo ya batōtyi bandi. Le kudi kimfwa kyowavuluka’ko? Kimfwa kimo bidi i kya Davida. Wāikele na balwana bavule mu būmi bwandi, kadi wālombēle divule Yehova amukwashe. Difuku dimo, wāzenzele Yehova amba: “A Yehova, ivwana milombelo yami; teja kulomba konomba bukwashi. Mu bubinebine bobe ne mu boloke bobe, nondolole.” (Ñim.  143:1) Yehova wālondolwele milombelo ya Davida yaādi ulomba amupandije. (1 Sa. 19:10, 18-20; 2 Sa. 5:17-25) O mwanda Davida wānenene na kikulupiji kyonso amba: “Yehova udi pabwipi na boba bonso bamwita.” Netu tubwanya kwikala na kino kikulupiji.—Ñim. 145:18.

5. Le milombelo ya bengidi ba Yehova ba pa kala yādi ilondololwa nyeke enka mobādi balangila? Leta kimfwa. (Tala ne kifwatulo.)

⁵ Yehova ubwanya kuleka kulondolola milombelo yetu mu muswelo otulangila. Bino ye byātene ne mutūmibwa Polo. Wālombele Leza amutalule “mwiba mu ngitu.” Polo wālombēle misunsa isatu mituntulu pa ano makambakano. Le Yehova wālondolwele ino milombelo? En-en, inoko ke mu muswelopo wādi ulangila’byo Polo. Pa kyaba kya kumutalula ano makambakano, Yehova wāmupele bukomo bwaādi usakilwa pa kumwingidila na kikōkeji.—2 Ko. 12:7-10.

6. Mwanda waka kyaba kimo bibwanya kumweka’mba Yehova kalondololangapo milombelo yetu?

⁶ Ne batwe netu kyaba kimo, Yehova ulondololanga milombelo yetu mu muswelo mwishile na motwadi twibilangila. Tukulupilei amba Yehova uyukile muswelo muyampe wa kwitukwasha. Ukokeja enka ne “kulonga bivulevule kupita ne byonso byotulomba ne byotulanga.” (Ef. 3:20) O mwanda kilondololwa kyandi ku milombelo yetu kibwanya kufika pa kitatyi kyoketwadipo tulangila nansha mu muswelo oketwadipo twibilangila.

7. Mwanda waka bibwanya kwitulomba kushinta byotulomba mu milombelo? Leta kimfwa.

⁷ Bibwanya kwitulomba kushinta byotulomba mu milombelo shi tubajingulula senene kiswa-mutyima kya Yehova. Twisambilei’ko pa kimfwa kya Tutu Martin Poetzinger. Kitatyi kityetye na pasongele Tutu Poetzinger, bamukutyile mu komponi ka masusu ka Nazi. Dibajinji, wadi ulombela Yehova amba akwashe’ko bamulupule mu komponi ka masusu mwa kukakwatakenya wandi mukaji, ne kwanza monka kusapula. Inoko mayenga abidi pa kupita’po, kamwenepo kintu kilombola’mba Yehova wadi umushitwila dishinda dya kumukutulula mu buloko. Ebiya washilula kulombela’mba: “A Yehova, nkwashe’ko ndyuke bine byounsakila kulonga.” Kupwa washilula kulangulukila pa makambakano adi ekonda na batutu bakwabo mu komponi ka masusu. Bavule badi bazumbija mutyima bininge pangala pa bakaji babo ne babo bana. Ebiya Tutu Poetzinger walombela amba: “A Yehova, wafwa’ko pa uno mwingilo wami mupya. Nkwashe’ko nkomeje banabetu  ne kwibakankamika.” Wapityije myaka kitema yalondele’po mu komponi ka masusu ukankamika bakwabo!

8. Le i mwanda’ka wa mvubu otufwaninwe kulama mu ñeni kitatyi kyotulombela?

⁸ Tufwaninwe kuvuluka’mba Yehova udi na mpango, kadi usa kufikidija’yo pa kitatyi kyatungile. Mu ino mpango mubadilwa ne kutalula’ko makambakano onso etususula bininge dyalelo—kimfwa bimpengele bya kipangila, misongo, ne lufu. Yehova ukafikidija ino mpango yandi kupityila ku Bulopwe bwandi. (Dan. 2:44; Kus. 21:3, 4) Inoko pano, Yehova ukilekele Satana uludika ino ntanda. b (Yoa. 12:31; Kus. 12:9) Shi Yehova wadi ukwasha’ko ku kupwija makambakano a bantu dyalelo, byadi bya kumweka’mba Satana uludikanga ntanda biyampe. Kino kekishintululapo amba pano potukitengele Yehova afikidije milao yandi imoimo, i mwituleke’nka namino pampikwa kwitukwasha. Tutalei’ko miswelo imoimo ya mwitukwashishanga Yehova.

9. Le Yehova ubwanya kwitukwasha namani kitatyi kyotukimba kukwata butyibi? Leta kimfwa.

⁹ Witupanga tunangu. Yehova i mulaye kwitupa tunangu totusakilwa pa kukwata butyibi buyampe. Tusakilwanga nakampata tunangu twandi kitatyi kyotukwata butyibi bukekala na lupusa pa būmi bwetu bonso, pamo bwa kushala nkunga, kusonga nansha kusongwa. (Yak. 1:5) Twisambilei’ko pa kimfwa kya kaka umo nkungakaji witwa bu Maria. c Wadi wingila na nsangaji bu pania wa lonso kitatyi kyaetene na tutu umo. Unena’mba: “Kipwano kyetu pokyadi kyenda kiningila’ko, buswe bwetu nabo bwadi bwenda buningila’ko. Nadi ndyukile amba mfwaninwe kukwata butyibi. Nalombēle bininge pa uno mwanda. Nadi nsakilwa buludiki bwa Yehova, inoko kadi nadi ndyukile amba Yehova kakankwatyilapo butyibi.” Uno kaka wamwene amba Yehova walondolwele milombelo yaamulombele amupe tunangu. Muswelo’ka? Paalongele bukimbi mu mabuku etu, watene bishinte byamukweshe atane bilondololwa ku bipangujo byaadi wiipangula. Kadi watejeje ne madingi a tunangu amupele inandi usenswe Yehova. Ano madingi akweshe Maria alangulukile pa mwiivwanino wandi. Ku mfulo, wakwata butyibi bwa tunangu.

10. Le kukwatañana na Bene Fidipai 4:13, i bika biloñanga Yehova mwanda wa kukwasha batōtyi bandi? Leta kimfwa. (Tala ne kifwatulo.)

¹⁰ Witupanga bukomo bwa kūminina. Yehova witupanga bukomo botusakilwa pa kūminina makambakano, monka mwaāpedile’bo mutumibwa Polo. (Tanga Bene Fidipai 4:13.) Tubandaulei’ko muswelo wakweshe Yehova tutu Benjamin ōminine makambakano. Kitatyi kilampe mu bunkasampe bwandi, Benjamin  pamo ne kisaka kyabo bashikete mu mankambi a balefije mu Afrika. Benjamin unena’mba: “Nalombēle Yehova kitatyi kyonso ampe bukomo bwa kulonga byobya bimusangaja. Yehova walondolwele milombelo yami na kumpa ndoe ya mutyima, bukankamane bwa kwendelela kusapula, ne mabuku mwanda wa kunkwasha nshale mukomo ku mushipiditu.” Ubweja’ko amba: “Kutanga myanda ya Batumoni bakwabo ne kumona muswelo webakweshe Yehova bōminine, byankweshe nsumininwe bininge kushala wa kikōkeji.”

11-12. Le i muswelo’ka ubwanya Yehova kwingidija kisaka kyetu kya ku mushipiditu mwanda wa kulondolola milombelo yetu? (Tala ne kifwatulo.)

¹¹ Wingidijanga kisaka kyetu kya ku mushipiditu. Yesu wālombēle bininge bufuku bukya kapāna kitapwa kya būmi bwandi. Wāzenzele Yehova akwashe amba bantu bakwabo kebakamumona bu muntu utuka Leza ne kumutyibila mambo pa kino. Pa kyaba kya Yehova kulonga namino, aye wākweshe Yesu na kutuma mwanabo mwikeulu amukomeje. (Luka 22:42, 43) Ne batwe netu, Yehova ubwanya kwitukwasha kupityila kudi tutu nansha kaka witwita ku telefone nansha kwiya kwitupempula mwanda wa kwitukankamika. Batwe bonso tukimbanga mikenga ya kwisamba “binenwa biyampe” bya kukankamika banabetu mu lwitabijo.—Nki. 12:25.

¹² Twisambilei’ko pa byatene kaka umo witwa bu Miriam. Mayenga matyetye pa kupita’po na pafwile wandi mulume, kaka Miriam wadi ku njibo bunka, mutyumukwe mutyina ne na bulanda bukatampe. Wādi’nka udila kadi ukimba muntu wa kwisamba nandi. Unena’mba: “Nkyadipo na bukomo bwa kwita muntu nansha umo, ebiya nalomba Yehova. Ami papo nekidila koku nombela, telefone yadila. I mukulumpe wangityile, mulunda netu wa pa mutyima.” Uno mukulumpe pamo ne wandi mukaji bamusengele. Kaka Miriam ukulupile amba Yehova ye watonwene uno tutu amwite.

13. Leta kimfwa kilombola muswelo ubwanya Yehova kwingidija boba kebamutōtapo mwanda wa kulondolola milombelo yetu.

¹³ Ubwanya kwingidija bantu kebamutōtapo. (Nki. 21:1) Kyaba kimo, Yehova ulondololanga milombelo ya bantu bandi na kulengeja  bantu kebamutōtapo balonge’po kintu mwanda wa kwibakwasha. Kimfwa, wālengeje Mulopwe Alatazelekishishi etabije kulomba kwa Nehemia kwa kujokela ku Yelusalema akakwashe ku kūbakululwa kwa kibundi. (Neh. 2:3-6) Ne dyalelo nadyo, Yehova ubwanya kulengeja enka ne boba kebamutōtapo betukwashe kitatyi kyotusakilwa bukwashi.

14. Le i bika byakusangaja mu kimfwa kya kaka Soo Hing? (Tala ne kifwatulo.)

¹⁴ Kaka Soo Hing wamwene amba Yehova wamukweshe kupityila kudi dokitele. Wabo mwana ubelanga misongo mivule ya mutwe. Kitatyi kyalongele wabo mwana akishida, aye ne wandi mulume balekele twabo twaji mwanda wa kumukwatakanya. Kino kyalengeje bekonde na makambakano a misokwe. Kaka Soo Hing wanenene amba, wamwene bu kakidipo na bukomo bwa kūminina makambakano’a. Wapungulwila Yehova mutyima wandi na kumulomba amukwashe. Dokitele wadi undapa mwana wakwata butyibi bwa kukimba’ko muswelo wa kumukwasha aye pamo ne kisaka kyandi. Kino kyebakweshe batambule bukwashi bwa ba lupusa ne kumona kifuko kiyampe mwa kushikata. Kaka Soo Hing unena’mba: “Twemwenine kuboko kwa Yehova mu uno mwanda. Bine i ‘Mwine wivwananga milombelo.’”—Ñim. 65:2.

15. I bika byakweshe kaka umo ajingulule amba Yehova wadi ulondolola milombelo yandi?

¹⁵ Milombelo yetu keilondololwangapo nyeke mu muswelo utulumukwa. Inoko Tata wetu wa mūlu ulondololanga milombelo yetu na kwitupa bine byotusakilwa pa kushala ba kikōkeji kwadi. Nanshi tá mutyima ku muswelo ulondolola Yehova milombelo yobe. Kaka Yoko wadi ulanga’mba Yehova kalondololangapo milombelo yandi, ebiya washilula kulemba bintu byaadi ulomba Yehova mu milombelo. Kitatyi kampanda pa kupita’po, wakatala paadi ulemba wajingulula’mba Yehova ke mumulondolole ku bintu bivule byaadi umulomba, enka ne ku byobya byaadi ke mwilwe. Nanshi kyaba ne kyaba, i biyampe kulangulukila pa muswelo ulondolola Yehova milombelo yetu.—Ñim. 66:19, 20.

16. Le i muswelo’ka otubwanya kulombola lwitabijo mu mwanda utala milombelo? (Bahebelu 11:6)

¹⁶ Tulombolanga lwitabijo na kulombela Yehova ne na kwitabija kilondololwa kyo-kyonso  kyaetupa ku milombelo yetu. (Tanga Bahebelu 11:6.) Twisambilei’ko pa kimfwa kya Mike ne wandi mukaji Chrissy. Betungīle kitungo kya kukengila ku Betele. Mike unena’mba: “Twadingile batwe bonso bubidi mafomu mu bula bwa myaka mivule ne kulombela Yehova kyaba kyonso pangala pa kino kitungo, inoko kebetwityilepo.” Ba Mike ne Chrissy baendelele kukulupila’mba Yehova uyukile muswelo muyampe wa kwibengidija mu mwingilo wandi. Baendelele kulonga byonso byobadi babwanya kulonga, na kwingila bu bapania ba lonso kokwa kusakilwa bukwashi ne kwingila ku lūbako. Pesambwa pano badi mu mwingilo wa kwendakana. Mike unena’mba: “Yehova kalondolwelepo nyeke milombelo yetu mu muswelo otwadi tulangila, inoko weilondolwele mu muswelo muyampe mpata kutabuka ne motwadi twibilangila.”

17-18. Le kukwatañana na Ñimbo ya Mitōto 86:6, 7, i bika byotubwanya kukulupila?

¹⁷ Tanga Ñimbo ya Mitōto 86:6, 7. Davida kaimba wa mitōto wādi ukulupile amba Yehova wāivwene milombelo yandi ne kwiilondolola. Nobe ubwanya kwikala na kino kikulupiji. Bimfwa byotwesambila’po mu kino kishinte bitukulupija amba Yehova ubwanya kwitupa tunangu ne bukomo botusakilwa pa kūminina. Ubwanya kwingidija kisaka kyetu kya ku mushipiditu, enka ne boba kebamutōtapo pano, mwanda wa kwitukwasha mu muswelo kampanda.

¹⁸ Nansha Yehova byabwanya kuleka kulondolola milombelo yetu mu muswelo otwadi tulangila, tuyukile amba ukeilondolola. Uketupa byobya byotusakilwa kadi mu kitatyi kine kyotusakilwa’byo. Nanshi endelela kulombela na lwitabijo koku ukulupile amba Yehova ukakukwasha tamba’nka pano, kadi ukavuija “bisaka mutyima wa bintu byonso byūmi” mu ntanda mipya.—Ñim. 145:16.