1. Lelo bambutwile basakilanga babo bana bika?

 A BAMBUTWILE, tuyukile amba musakanga kukwasha benu bana bayuke Yehova ne kumusanswa. Inoko kamwekangapo. I muswelo’ka omubwanya kukwasha benu bana bamone Leza bu Muntu udi’ko bine ne kumufwena?—Yak. 4:8.

2. Le bambutwile babwanya namani kufundija babo bana ngikadila ya Yehova?

² Muswelo umo bidi wa mvubu omubwanya kukwasha benu bana bafwene Yehova i kwifunda nabo Bible. (2 Tm. 3:14-17) Inoko, Bible ulombola ne muswelo mukwabo ubwanya bana kwifunda myanda ya Yehova. Mu mukanda wa Nkindi, mudi kimfwa kya mbutwile uvuluja wandi mwana amone ngikadila ya Yehova, imwekela mu bupangi. (Nki. 3:19-21) Tusa kubandaula miswelo imoimo ibwanya bambutwile kwingidija bupangi pa kukwasha babo bana befunde mwikadile Yehova.

3. Le bambutwile bafwaninwe kukwasha babo bana bayuke bika?

³ Bible unena padi Leza amba “ngikadila yandi yampikwa kumweka i mimweke patōka tamba ku kupangwa kwa ino ntanda, mwanda i mimwekelele mu bintu byalongele.” (Loma 1:20) A bambutwile, padi musangelanga kukenangija na benu bana. Pomwinangija kwashai benu bana bamone kukwatañana kudi pa ‘bintu bilongele Yehova’ ne ngikadila yandi ya kutendelwa. Tutalei ñeni ibwanya kuboila bambutwile ku kimfwa kya Yesu mu uno mwanda.

4. Le Yesu wāingidije namani bupangi pa kufundija bandi bana ba bwanga? (Luka 12:24, 27-30)

 ⁴ Talai muswelo wāingidije Yesu bupangi pa kufundija bantu. Difuku dimo, wālombwele bandi bana ba bwanga babandile binkombe ne maluba. (Tanga Luka 12:24, 27-30.) Yesu wādi ubwanya kutela banyema nansha mityi yo-yonso, inoko wātelele byoni ne maluba bine byādi biyukile senene bandi bana ba bwanga. Bana ba bwanga bādi babwanya kumona binkombe bilelemba mūlu ne maluba nao etoyola mu madimi. Ubwanya kumona Yesu mu ñeni ufunka bino bintu kitatyi kyaesamba. Le i bika byaālongele pa kupwa kutela bino bintu? Wāfundije bandi bana ba bwanga bufundiji bwa kamweno butala kanye ne buntu budi na Shandi wa mūlu. Bufundiji bwine i buno bwa amba, Yehova ukadisha ne kuvwika bengidi bandi ba kikōkeji monka mwalongelanga ku binkombe ne ku maluba a mu madimi.

5. Le i bintu’ka bya mu bupangi bibwanya kwingidija bambutwile pa kufundija bana myanda ya Yehova?

⁵ A bambutwile, le mubulwepo kwiula muswelo wādi ufundija Yesu? Ubwanya kulombola obe mwana bintu byosangelanga mu bupangi, kimfwa nyema osenswe nansha mutyi. Pomusapwila bino bintu lombola obe mwana byobitufundija padi Yehova. Kupwa ubwanya kwipangula obe mwana atele nyema nansha mutyi wasenswe. Shi wingidije kintu kya mu bupangi kyasenswe, ukakuteja na katentekeji powisambila pa ngikadila ya Yehova.

6. I ñeni’ka yotuboila ku kimfwa kya inandya Christopher?

⁶ Le bikalomba bambutwile bajimije kitatyi kivule na kukimba nyema nansha mutyi pa kufundija bana myanda ya Yehova? Aa. Yesu kāshintulwilepo bilabila pa mudīlanga binkombe nasha mutaminanga maluba. Kitatyi kimo, mwana ubwanya kukimba kukonkotola bintu bivule bya mu bupangi, inoko pavule pene i myanda’tu ipēla ibwanya kumupa bufundiji bwa kamweno. Tala munenena tutu Christopher pavuluka myanda ya pa bwanuke. Unena’mba: “Mama wadi wisamba’tu binenwa bityetye mwanda wa kwitukwasha tusangele bupangi bwadi bwitujokolokele. Kimfwa shi tudi ku lūlu, dimodimo wadi unena’mba: ‘Talai ngulu buya, le kemumwenepo amba Yehova i wa kutendelwa!’ Kadi shi tudi ku dijiba, dimodimo wadi unena’mba: ‘Talai mabimbi bukata! Le kemumwenepo amba Leza i mukomokomo?’” Christopher unena’mba: “Bino binenwa’tu bipēla bilengeja twisambe byadi na lupusa lukatampe potudi.”

7. Le i muswelo’ka obwanya kwibidija bobe bana balangulukile pa bupangi?

⁷ Kitatyi kyenda kitama benu bana, mubwanya kwibebidija balangulukile pa bupangi ne kwibakwasha bafule ku kwimwena mwikadile Yehova. Ubwanya kutela kintu kimo kipangile Yehova ne kwipangula bobe bana’mba, “Le kino kimufundija bika padi Yehova?” Padi ukatulumunwa na byobakanena’po.—Mat. 21:16.

8. Le i mikenga’ka yādi na bambutwile bene Isalela pobādi benda “mu dishinda”?

⁸ Bambutwile bene Isalela bāsoñanibwe kufundija babo bana misoñanya ya Yehova pobenda “mu dishinda.” (Kup. 11:19) Bibundi bya Isalela byādi na mashinda mavule. Pobādi benda’mo bādi babwanya kumona banyema, byoni, ne maluba. Bene Isalela pobādi benda mu dishinda na bisaka byabo, bambutwile bādi  na mikenga ya kufundija babo bana myanda mivule ya kutendelwa ya mu bupangi. Bambutwile nenu mubwanya kwingidija mikenga ya uno muswelo pa kufundija benu bana myanda ya mu bupangi. Talai mwalongēle’byo bambutwile bamo.

9. Le i bika byotwifunda ku kimfwa kya ba Punitha ne Katya?

⁹ Lolo umo witwa bu Punitha ushikatanga mu kibundi kikatampe mu India, unena’mba: “Potwendanga kukapempula babutule kunja, tumonanga bu o mukenga wa kufundija bana myanda ya kutendelwa ya mu bupangi. Monanga bami bana bevwanija biyampe bupangi kitatyi kyotudi kufula kulampe na bipito bya bantu bavule ne myotoka mivule. A bambutwile, padi benu bana kebakelwapo nansha dimo pomupityija bitatyi mu bifuko bilumbuluke uno muswelo. Kaka Katya wa mu Moldavi unena’mba: “Kitatyi kya pa bwanuke nkisangaja bininge nkyovuluka, i kyotwadi tupityija na bambutwile kunja. Mfwija’ko bininge bambutwile pa kumfundija tamba ku bwanuke ngikale ngimana ne kubandila byobya bilongele Yehova ne kumumona kupityila ku bintu byapangile.”

10. I bika bibwanya kulonga bambutwile shi kebadipo na muswelo wenda kunja? (Tala kapango “ Bukwashi ku Bambutwile.”)

¹⁰ Le bikekala namani shi kemudipo na muswelo wenda kunja? Amol ushikatanga mu India unena’mba: “Konshikatanga bambutwile bapityijanga mansá mavule ku mingilo, kadi lwendo lwa kwenda kunja lulombanga lupeto luvule. Mu uno muswelo, kabudimi’tu katyetye kadi pa lubanza kabwanya kukwasha ku kubandila bupangi bwa Yehova ne kwisambila pa ngikadila yandi.” Nobe ubwanya padi kusokola kubwipi na yobe njibo bintu bya mu bupangi, byobwanya kwisambila’po na bobe bana. (Ñim. 104:24) Ubwanya padi kumona byoni, bishi, mityi, ne  bintu bikwabokwabo. Karina wa mu Alemanye unena’mba: “Mama usenswe maluba, wadi uvudile kwitufunkila maluba malumbuluke potwinangija.” A bambutwile, mubwanya ne kwingiidija mavideo mavule ne mabuku esambila pa bupangi alupwilwe na bulongolodi bwetu mwanda wa kufundija bana. Bine, nansha shi wikale mu ngikadilo’ka ubwanya kukwasha bobe bana babandile bintu bipangile Leza. Lekai tutale’ko ngikadila imoimo ya Yehova yobwanya kusapwila bobe bana.

11. Le bambutwile bakakwasha namani babo bana bajingulule buswe bwa Yehova?

¹¹ Pa kukwasha bobe bana bamone buswe bwa Yehova, ubwanya kwisambila pa mukwatakenyanga banyema na kanye twabo twana. (Mat. 23:37) Ubwanya ne kwisambila pa bintu palapala byakutendelwa byotusangelanga mu bupangi. Karina otutelele kala unena’mba: “Potwadi tukenangija, mama wadi unkankamika ngimane ne kubandila diluba ne diluba modishidile ne kumona buyampe bwadyo mobulombwela buswe bwa Yehova. Ino nansha byokepadi myaka, nakitalanga maluba na katentekeji—kwishila kwao, bupunga bwao, ne misombelo yao. Bimvulujanga nyeke muswelo witusenswe Yehova.”

12. Le bambutwile babwanya kukwasha namani babo bana bajingulule tunangu twa Leza? (Ñimbo ya Mitōto 139:14) (Tala ne kifwatulo.)

¹² Kwasha bobe bana bajingulule tunangu twa Leza. Yehova udi na tunangu tukatampe kwitupita. (Loma 11:33) Kimfwa, ubwanya kwisambila pa mwipungilanga mema ke makumbi ne muswelo oendanga anokeja mvula koku ne koku. (Yoba 38:36, 37) Kadi ubwanya ne kwisambila pa mupungīlwe umbidi wa muntu mu muswelo wa kutendelwa. (Tanga Ñimbo ya Mitōto 139:14.) Tala mwalongēle mbutwile umo witwa bu Vladimir. Unena’mba: “Difuku dimo wetu mwana waponene na nkinga ne kwisanshija. Mafuku matyetye pa kupita’po kilonda kyapwa. Ami ne wami mukaji twamushotolwedile amba Yehova i mupange maselile na bukomo bwa kwikomeja ao mene. Ebiya twamulombola’mba, i kutupu kintu kipungile bantu kibwanya kwilonga namino. Kimfwa, shi motoka ubalonga akishida  keubwanyapo kwilongolola ao mwine. Kino kyakweshe wetu mwana evwanije biyampe tunangu twa Yehova.”

13. Le bambutwile bakakwasha namani babo bana bajingulule bukomo bwa Leza? (Isaya 40:26)

¹³ Yehova witwita tutulule meso etu mūlu tumone bukomo bwandi bwa kutendelwa mobulamina bintu bidi mu lwelele. (Tanga Isaya 40:26.) Nobe ubwanya kukankamika bobe bana batale mūlu ne kulangulukila pa byobamona’mo. Tala binena kaka Tingting wa mu Taiwane pavuluka myanda ya ku bunkasampe amba: “Difuku dimo, twaendele na mama mu ntanda ebiya ketutale mūlu bufuku mwanda kemudipo malampi etujikakanya pamo bwa mu bibundi bikatampe. Kino kyadi kitatyi kyonadi nzumbija mutyima pa mwanda wa kuningilwa na bakwetu ba ku masomo kadi nadi keneipangula shi kendelela kwingidila Yehova na kikōkeji. Mama waunkankamika nangulukile pa bukomo bwāingidije Yehova pa kupanga ino ñenyenye yonso ne kumvuluja’mba ukengidija buno bukomo bonka mwanda wa kunkwasha nkomene matompo. Batwe pa kujoka, kino kyauntonona kimbe kuyukila’ko Yehova biyampe, kadi nasumininwa kumwingidila nyeke.”

14. Le i muswelo’ka ubwanya kwingidija bambutwile bupangi pa kukwasha babo bana bamone amba Yehova i Leza wa nsangaji?

¹⁴ Bupangi bwa Yehova bulombola mwaikadile Leza wa nsangaji. Befundi ba sianse i bamone amba banyema bavule, byoni ne mwita wa lui bikalanga bikaya. (Yoba 40:20) Le kwamwene bobe bana basepa pakumona nyema ukaya? Padi bamwene kapushi kana kapanga futu nansha tubwa twana twishinda pa nshi. Difuku dikwabo pokamona bobe bana basepa pa mwanda wa tubintu tulonga banyema, kokelwa kwibavuluja’mba Leza otwingidila i wa nsangaji.—1 Tm. 1:11.

15. Le i bika bikakwasha bambutwile bayuke bilanga babo bana? (Nkindi 20:5) (Tala ne kifwatulo.)

¹⁵ Kyaba kimo, bambutwile bakomenwanga kulengeja babo bana balombole makambakano  obekonda nao. Shi bidi uno muswelo, longa bukomo bwa kuteka milangwe ya bana. (Tanga Nkindi 20:5.) Ye mulongelanga bambutwile bamo kitatyi kyo babandila bupangi na babo bana. Mwanda waka? Bubinga bumo bidi i bwa amba mu kino kitatyi bambutwile ne babo bana bekalanga na bintu bityetye bibalabika. Mbutwile umo wa mu Taiwane witwa bu Masahiko ulombola bubinga bukwabo. Unena’mba: “Potupityijanga kitatyi mu kukenangija na betu bana—ekale ku ngulu nansha ku nkula—divule bekalanga na nsangaji. Mu kino kitatyi tupelelwanga kuyuka milangwe yabo.” Katya otwatelanga unena’mba: “Potwadi tutamba ku masomo, mama wadi wenda nami ku kiwanza kya mityi. Mu kino kifuko kiyampe byadi bimpelela kumusapwila byapitanga ku masomo ne binkambakanya.”

16. Le bisaka bibwanya namani kwisangaja ne kukaya na kwingidija bintu bipangile Yehova?

¹⁶ Bupangi bwa Yehova bupanga bisaka myanda isangaja, mine ilengeja bikale mu bumo. Bible unena’mba, kudi “kitatyi kya kusepa” ne “kitatyi kya kutumbuka.” (Mus. 3:1, 4, kunshi kwa dyani.) Kupityila ku bintu byalongele, Yehova i mwitupe kifuko kiyampe kya kulongela’po bintu byotusenswe. Bisaka bivule bisangelanga kuketana ku parke, mu ntanda, ku ngulu, nansha ku nkula. Bana bavule basangelanga kwipanga ne kukaila mu parke, kubandila banyema, kusumba mu minonga ne kwijiba. Bine ino i mikenga milumbuluke’po kashā yotudi nayo ya kwisangaja potwenda ku kifuko kotujokolokelwe na bintu bipangile Yehova!

17. Mwanda waka bambutwile bafwaninwe kukwasha babo bana basangēle bupangi bwa Leza?

¹⁷ Mu ntanda mipya ya Leza, bambutwile ne bana bakasangela bupangi bwa Yehova mu muswelo kewamwekele kashā. Mwine’mwa kebikekalapo bwa dyalelo, mwanda ketukatyinapo banyema kadi nabo kebaketutyinapo. (Isa. 11:6-9) Tukekala na kitatyi kya mpikwa mfulo kya kusangela byobya bilongele Yehova. (Ñim. 22:26) Inoko a bambutwile, kemwakilaijai’nka mukatwele’mo ebiya kemusangela na benu bana bupangi. Shi mwingidije bupangi mwanda wa kufundija benu bana myanda ya Yehova, kebakabulwepo kunena na mwānenene Mulopwe Davida amba: “A Yehova, i kutupu mingilo idi pamo bwa yobe.”—Ñim. 86:8.