1-2. Mwanda waka kufwaninwepo kutyumukwa mutyima, shi kukidi bisakibwa bya kubwanya kumeso kwa kubatyijibwa? (Tala kifwatulo pa kibalu.)

 SHI USAKANGA kubatyijibwa, nabya ubetungila kitungo kiyampe. Le wi mwiteakanye mwanda wa kubatyijibwa panopano? Shi i amo ne shi bakulumpe i betabije, nabya kokekaka kubatyijibwa kitatyi kiya’ko. Būmi bwa nsangaji itamba mu kwingidila Yehova bukutengēle.

² Le kudi muntu wakulombwele amba kudi bisakibwa byofwaninwe kubwanya kumeso kwa kubatyijibwa? Nansha abe mwine wimumone bu kukusakilwa bintu kampanda? Shi i amo, kokatyumukwa mutyima. Ubwanya kufikila pa ano matabula, wikale nkasampe nansha mutame.

3. Le ntungu mwine Efiopya wāipangwile Fidipa kipangujo’ka, ne kino kibalengeja twiipangule namani? (Bilongwa 8:36, 38)

³ Tanga Bilongwa 8:36, 38. Ntungu mwine Efiopya wāipangwile Fidipa musapudi wa myanda miyampe amba: “Le kinkankaja kubatyijibwa i kika le?” Uno mwana-mulume mwine Efiopya wādi usaka kubatyijibwa, ino le na bubine wādi mwiteakanye mwanda wa kutabula dino ditabula dya mvubu mpata?

4. I muswelo’ka wālombwele uno mwine Efiopya’mba i musumininwe kwendelela kwifundila’ko bivule?

⁴ Uno mwana-mulume mwine Efiopya “waendele kukatōta ku Yelusalema.” (Bil. 8:27) Ye uno wādi muntu waālamukile ke Muyuda. Ne kutatana kwine mpika ye uno wēfundile myanda ya Yehova mu bilembwa bijila bya Bisonekwa bya Kihebelu. Nansha nankyo wādi ukisaka kwifundila’ko bivule. Kitatyi kyāsambakene Fidipa uno ntungu mwine Efiopya, le wāmutene ulonga bika? Wādi utanga muvungo mulembe wa mupolofeto Isaya. (Bil. 8:28) Bino byādi byakudya  bikomo bya ku mushipiditu. Uno mwine Efiopya kādipo utele mutyima pa kwifunda’tu myanda mityetye ya mu bufundiji bwa kyalwilo; ino wādi usumininwe kwendelela kwifundila’ko bivule.

5. Le bubine bwādi bwifunda mwine Efiopya bwāmulengeje alonge bika?

⁵ Uno mwana-mulume wādi mwingidi wa bulēme mu kipango kya Kandase mulopwe mukaji wa bene Efiopya; kadi “wadi utūdilwe pa byabulēme byandi byonso.” (Bil. 8:27) Nanshi ye uno wādi na biselwa bivule kadi muvudilwe bya kulonga. Ino nansha nankyo, wētūdile’ko kitatyi kya kutōta Yehova. Kāimaninepo’nka pa kwifunda bubine; ino wāingidije ne byaādi wifunda. O mwanda wāendele lwendo lwa kutamba ku Efiopya wāenda ku Yelusalema kukatōta Yehova ku tempelo. Luno lwendo lwādi lwa kumusela kitatyi ne lupeto, ino uno mwana-mulume wākatōtele Yehova nansha byobyādi bya kumulomba kulonga bukomo.

6-7. Le mwine Efiopya wāendelele kutamija namani buswe bwa kusanswa Leza?

⁶ Uno mwine Efiopya wēfundile kudi Fidipa bubine bwa kamweno bwakādipo uyukile. Kubadila’mo ne bubine bwa kujingulula Meshiasa. (Bil. 8:34, 35) Uno ntungu wātengelwe bininge pa kwifunda byobya byālongele Yesu pa mwanda wandi. Le wālongele’po namani pa kupwa kwifunda buno bubine? Kāsakilepo kushala’nka mwaādi wikadile, bu muntu mulēmekibwe waālamukile ke Muyuda. Ino wātamije buswe bwa kuswa Yehova ne wandi Mwana. Ne kino kyāmulengeje akwate butyibi bushinta būmi bwandi. I butyibi bwa kubatyijibwa ne kwikala mulondi wa Yesu Kidishitu. Fidipa wāmwene amba uno mwana-mulume i mwiteakanye, kupwa wamubatyija.

⁷ Shi ulonde kimfwa kya uno mwine Efiopya, nabya uketeakanya biyampe mwanda wa kubatyijibwa. Nobe ukabwanya kunena na kikulupiji kyonso amba, “Le kinkankaja kubatyijibwa i kika le?” Tubandaulei’ko muswelo obwanya kutabula matabula amo onka na awātabwile. Wāendelele na kwifunda, wāingije mu būmi byaādi wifunda, ne kwendelela kutamija buswe bwa kusanswa Leza.

8. Le Yoano 17:3 witusapwila tulonge bika?

⁸ Tanga Yoano 17:3. Le bino binenwa bya Yesu i bikukwashe ukwate butyibi bwa kwifunda Bible? Bine ye mobyaikadile ne kubatwe bavule. Ino bino binenwa bimo byonka bitusapwila twendelele na kwifunda. Ketukaleka’byopo ‘kwendelela kuyuka Leza umo kete wa  bine.’ (Mus. 3:11) Tukendelela kwifunda nyeke ne nyeke. Shi twendelele na kwifunda, po pene tukafwena Yehova bininge.—Ñim. 73:28.

9. Le i bika byotusakilwa kulonga pa kupwa kwifunda bufundiji bwa kyalwilo?

⁹ Shako tushilulanga na bufundiji bwa kyalwilo pa kwifunda myanda ya Yehova. Mu mukanda wandi ku Bahebelu, mutumibwa Polo wādingakenye bufundiji bwa kyalwilo na “bintu bya kyalwilo.” Kādipo utyepeka “lufundijo lubajinji”; ino wēludingakenye na mabele amwanga mwana. (Bah. 5:12; 6:1) Wāsoñenye bene Kidishitu bashiye bufundiji bwa kyalwilo ne kwifunda bubine bwa mushike bwa Kinenwa kya Leza. Lelo wimutamije mutyima wa kusaka kwifunda bufundiji bwa mushike bwa mu Bible? Lelo udi na mutyima wa kwendelela kwifunda myanda ya Yehova ne mpango yandi?

10. Mwanda waka bamo bamonanga kufunda bu kikoleja?

¹⁰ Kufunda kintu kekwitupelelangapo batwe bavule. Le abe nobe? Le wefundile kutanga senene powadi ku masomo? Le wadi usangela kufunda ne kumona’mba i kwa kamweno? Nansha le wadi wimona’mba kubwanyapo kwifunda myanda ya mu mabuku? Shi i amo, kudipo bunka. Inoko Yehova ubwanya kukukwasha. I Mwadimu mubwaninine kadi mulumbuluke’po kashā.

11. Le Yehova i mwilombole namani bu ‘Mufundiji Mukatakata’?

¹¹ Yehova witelanga aye mwine bu “Mufundiji obe Mukatakata.” (Isa. 30:20, 21) I Mufundiji wa kanye, wa kitūkijetyima, kadi wivwana bantu. Umonanga biyampe bidi mu befundi bandi. (Ñim. 130:3) Ketulombengapo bintu byoketubwanyapo. Vuluka, wakupele kyabuntu kya kutendelwa kya bongolo. (Ñim. 139:14) I mwitupange na mutyima wa kusaka kwifunda. Umpangi wetu usaka twendelele kwifunda nyeke ne nyeke, kadi tusangele’ko. Nanshi i kya tunangu tutamije ‘kwabila bininge’ bubine bwa mu Bible tamba’nka pano. (1 Pe. 2:2) Witungile bitungo byobwanya kufikila’po, kadi ikala na mpangiko ya kutanga ne kwifunda Bible. (Yos. 1:8) Na bukwashi bwa Yehova, ukasangela kutanga ne kwifunda pādi kitatyi ne kitatyi.

12. Mwanda waka tufwaninwe kubandaula senene būmi bwa Yesu mu kifundwa kyetu kya pa kasuku?

¹² Wilamije’ko nyeke kitatyi kya kulangulukila pa būmi bwa Yesu ne pa mwingilo wandi wa busapudi. Kulonda senene mu mayo a Yesu kyo kintu kikatampe kikakukwasha wingidile Yehova, nakampata mu bino bitatyi bya makambakano. (1 Pe. 2:21) Yesu wānenene patōkelela makambakano akekonda na balondi bandi. (Luka 14:27, 28) Inoko, wādi ukulupile na kusumininwa’mba balondi bandi ba bine bakeanekenya, enka na mwaānekenyenye’o. (Yoa. 16:33) Wifunde na katentekeji būmi bwa Yesu, ne kwitungila bitungo bya kumwiula difuku ne difuku.

13. I bika byofwaninwe kwendelela kulomba Yehova, ne mwanda waka?

¹³ Kwikala’tu’nka na buyuki kekubwenepo. Ino kya mvubu mpata i muswelo obukukwasha wifunde bivule padi Yehova ne kutamija ngikadila miyampe pamo bwa buswe ne lwitabijo mwadi. (1 Ko. 8:1-3) Endelela kulomba Yehova akukwashe wikale na lwitabijo lukomo kitatyi kyonso kyowifunda. (Luka 17:5) Ulondololanga milombelo ya uno muswelo. Lwitabijo lwa bine lwimanine pa buyuki bwa bine bwa kiswa-mutyima kya Leza lukakukwasha utabule matabula makwabo. (Yak. 2:26)

14. Mutumibwa Petelo wālombwele namani mvubu ya kwingidija byobya byotwifunda? (Tala ne kifwatulo.)

¹⁴ Mutumibwa Petelo wālombwele patōkelela’mba shi balondi ba Kidishitu bengidije nyeke byobya byobefunda bakamwena’mo. Wātelele kimfwa kidi mu Bible kya Noa. Yehova wāsapwidile Noa amba usa konakanya bantu babi ba mu mafuku andi kupityila ku dilobe. Kuyuka’tu amba kusa kwikala dilobe kekwābwenepo pakusaka’mba Noa ne kyandi kisaka bapande. Petelo wātelele mwingilo wādi wingilwa kumeso kwa dilobe kulongeka paānene amba “papo safina upungwa.” (1 Pe. 3:20) Na bubine, Noa ne kyandi kisaka bāingidije byobya byobēfundile kudi Leza na kupungasafina. (Bah. 11:7) Petelo udingakanya byobya byālongele Noa na Lubatyijo, panena’mba: “Lubatyijo, lwine ludingakene na kino, nalo lwimupandijanga.” (1 Pe. 3:21) Nanshi, tubwanya kudingakanya mwingilo oingila pano mwanda wa kwiteakanya ku kubatyijibwa, na mwingilo wāingile Noa ne kyandi kisaka wa kupunga safina mu bula bwa myaka mivule. Le i mwingilo’ka ofwaninwe kwingila pa kwiteakanya ku kubatyijibwa?

15. Le kwisāsa kwa binebine kulomba bika ne bika?

¹⁵ Kintu kimo bidi mu bintu bibajinji byotufwaninwe kulonga i kwisāsa bya binebine bubi bwetu. (Bil. 2:37, 38) Kwisāsa bya binebine kutwalanga ku kwalamuka kwa binebine. Le kodi muleke bilongwa bibi bifityija Yehova mutyima, pamo bwa busekese, kutoma mfwanka, nansha mutonko? (1 Ko. 6:9, 10; 2 Ko. 7:1; Ef. 4:29) Shi kwalekele’byo, nabya endelela kulonga bukomo bwa kushinta. Wisambile’po na omwifundanga nandi Bible, nansha kulomba madingi ku bakulumpe mu kipwilo. Shi wi nkasampe ushikete na bambutwile ku njibo, nabya wibalombe bukwashi mwanda wa uleke bibidiji bibi bibwanya kukukankaja ubatyijibwe.

16. Le mu bibidiji biyampe bya ku mushipiditu mubadilwa bika ne bika?

¹⁶ Kadi i kya mvubu kwikala na bibidiji biyampe bya ku mushipiditu. Muno mubadilwa kutanwa ku kupwila ne kulondolola’ko.  (Bah. 10:24, 25) Shi ubabwanya bisakibwa bya kushilula kusapula, nabya ikala utambila’mo kyaba ne kyaba. Kitatyi kyoendelela kwingila uno mwingilo upandija būmi, po pene ukeusangela. (2 Tm. 4:5) Shi wi nkasampe ushikatanga na bambutwile, wiipangule amba: ‘Le binombanga’nka bambutwile bamvuluje pa kwenda ku kupwila ne mu busapudi? Nansha le i ami mwine ukwatanga mulangwe wa kupwila ne kusapula?’ Shi wilongela abe mwine bino bintu, nabya ubalombola lwitabijo, buswe, ne mutyima obe wa kufwija’ko Yehova Leza. Ino “mingilo ya bwine Leza,” i byabuntu byobwanya kupa Yehova. (2 Pe. 3:11; Bah. 13:15) Byabuntu byotupanga Leza na mutyima umo kadi pampikwa kuningilwa bimusangajanga bininge. (Dingakanya na 2 Bene Kodinda 9:7.) Tuloñanga uno muswelo mwanda tusangelanga kupa Yehova bilumbuluke byetu.

17-18. Le i ngikadila’ka ya mvubu mpata ikakukwasha wendelele kufika ne kukubatyijibwa, ne mwanda waka? (Nkindi 3:3-6)

¹⁷ Poendelela kumeso mwanda wa kubatyijibwa, usa kutanwa na makambakano. Bantu bamo babwanya kukufutulula pa mwanda wa kipwilo kyowatwela’mo; babwanya kukulwa enka ne kukupangapanga. (2 Tm. 3:12) Padi ubwanya kukukala polonga bukomo bwa kuleka bibidiji bibi. Pakwabo kadi ubwanya kutyumukwa mutyima nansha kubulwa kitūkijetyima pa kumona’mba ubaije kufikila mpika pa kitungo kyowitungile. Le i bika bikakukwasha ūminine? Kusanswa Yehova yo ngikadila ya mvubu mpata ikakukwasha.

¹⁸ Buswe bosenswe Yehova yo ngikadila ya mvubu mpata yodi nayo. (Tanga Nkindi 3:3-6.) Buswe bukatampe bosenswe Leza bubwanya kukukwasha unekenye makambakano. Divule Bible ulombola’mba Yehova udi na buswe bwa ndamatyidile ku bengidi bandi. Buno buswe i lulamato kelulamunapo Leza ku bengidi bandi. (Ñim. 100:5) Nobe wimupangwe mu kyelekejo kya Leza. (Ngo. 1:26) Le i muswelo’ka obwanya kulombola buno buswe?

19. Le i muswelo’ka obwanya kutamija mutyima wa kufwija’ko pa byonso bikulongēle Yehova? (Ngalatea 2:20)

¹⁹ Shilula na kutamija mutyima wa kufwija’ko. (1 Ts. 5:18) Wiipangule difuku ne difuku amba, ‘Le i muswelo’ka unombwele  Yehova buswe?’ Kupwa kokelwa kufwija’ko Yehova mu milombelo, na kutela patōkelela bintu byakulongēle. Mona bilongwa bya buswe bya Yehova bu bikutala abe, enka na mwāmwenine’byo mutumibwa Polo. (Tanga Ngalatea 2:20.) Wiipangule amba, ‘Le nami nsakanga kumusanswa?’ Kusanswa Yehova kukakukwasha wendelele kukomena matompo ne kūminina bikoleja. Kulonga namino kukakutonona ulame bibidiji byobe bya ku mushipiditu, ne kusanswa Tata obe difuku ne difuku.

20. Le i bika byofwaninwe kulonga pa kwipāna kudi Yehova, ne le buno butyibi budi na mvubu’ka?

²⁰ Bityebitye buswe bosenswe Yehova bukakutonona ulombele milombelo ya pa bula. Mu ino milombelo ye mokepāna kudi Leza. Vuluka’mba shi ubapu’tu kwipāna kudi Yehova, ubaikala na dino dyese dya kutendelwa. Dyese dya kwikala wandi nyeke ne nyeke. Mutyipo obe wa kwipāna kudi Yehova ulādilanga nyeke ne nyeke, upita mu bitatyi biyampe ne bibi. I mutyipo wa kwipāna dimo kupwididile. Bine kwipāna i ditabula dikatampe dyotutabulanga. Langulukila pa uno mwanda. Vuluka kino amba, mu būmi bikakulomba kukwata butyibi buvule, bumo buyampe, inoko kekukekalapo buyampe kutabuka bwa kupāna būmi bobe kudi Yehova. (Ñim. 50:14) Satana ukasaka kuzozeja buswe bosenswe Shobe, mwanda ukimbanga ujimije bululame bobe. Kokaleka Satana afikile pa kitungo kyandi! (Yoba 27:5) Buswe bukatampe bosenswe Yehova bukakukwasha wiendeje mungya kwipāna kobe kadi ufwene bininge Shobe wa mūlu.

21. Mwanda waka tunena’mba kubatyijibwa ke mfulopo ino i ngalwilo’tu?

²¹ Pa kupwa kwipāna kudi Yehova, wisambe na bakulumpe mu kyenu kipwilo pa dino ditabula dikatampe dyowatabula. Ino vuluka nyeke amba lubatyijo ke mfulopo, ino i ngalwilo. Ubashilula būmi bwa kwingidila Yehova pampikwa mfulo. Nanshi tamba’nka pano komeja buswe bosenswe Tata obe. Witungile bitungo bilengeja buno buswe buningile’ko difuku ne difuku. Kulonga namino kukakulengeja ubatyijibwe. Bine difuku dyobe dya kubatyijibwa i difuku dya kutendelwa. Inoko i ngalwilo’tu. Tulomba buswe bosenswe Yehova ne wandi Mwana bwende butamina’ko nyeke ne nyeke!