1-2. Le i bika bilongekanga divule kitatyi kibatyijibwanga bantu, ne i bika byotusa kwisambila’po?

 LE KODI mumone ba kubatyijibwa bemene? Waivwene kusumininwa kwabo pobadi balondolola na diwi dikatampe bipangujo bibidi kumeso kwa kubatyijibwa. Wamwene babutule ne balunda nabo basangale bininge. Kadi kitatyi kyobadi batamba mu mema, waivwene bantu bakupila makasa ne kumona nsangaji mu mapala abo. Na bubine, yenga ne yenga kwikalanga bantu tununu ne tununu batabulanga dino ditabula dya kwipāna ne kubatyijibwa bu batumoni ba Yehova Leza.

² Le bidi namani kodi? Shi nobe ukimbanga kubatyijibwa, nabya ubaikala muntu wa pa bula mu ino ntanda mibi mwanda ubaikala “muntu ukimba Yehova.” (Ñim. 14:1, 2) Kino kishinte kīsambilanga podi wikale nkasampe nansha mutame. Inoko ne boba ke babatyijibwe basakilwa kukomeja mutyima wabo wa kusumininwa kwingidila Yehova nyeke. Kudi bubinga buvule bwitutononanga twingidile Yehova. Lekai twisambile’ko pa bubinga busatu.

3. Mwanda waka bengidi ba Yehova basenswe bubine ne boloke? (Ñimbo ya Mitōto 119:128, 163)

³ Yehova wāsoñenye bantu bandi ‘basanswe bubine.’ (Zek. 8:19) Kadi Yesu wākankamikile balondi bandi balondelonde boloke. (Mat. 5:6) Kino kishintulula’mba muntu’wa ufwaninwe kwabila bininge kulonga kyokya kyoloke, kiyampe, ne kitōka ku meso a Leza. Le usenswe bubine ne boloke? Bine, tukulupile nankyo. Ushikilwe bubela ne bintu byonso bibi. (Tanga Ñimbo ya Mitōto 119:128, 163.) Bubela bumwekejanga ngikadila ya Satana, mulopwe wa ino ntanda. (Yoa. 8:44; 12:31) Mu bitungo bya Satana mudi ne kya kuvubakenya dijina dijila dya Yehova Leza myanda ya  bubela. Satana uzambalajanga bubela padi Leza tamba pa butomboki bwa mu Edena. I mumwekeje Yehova bu Muludiki wa kwisakila, wa budimbidimbi, kadi usuminwa bantu bintu bilumbuluke. (Ngo. 3:1, 4, 5) Bubela bwa Satana bwabepela Yehova i bone milangwe ne mityima ya bantu. Patonga bantu kuleka ‘kusanswa bubine,’ Satana wibendejanga mu bibi bya miswelo yonso ne mu kubulwa boloke.—Loma 1:25-31.

4. Le Yehova i mwilombole namani amba i “Leza wa bubine”? (Tala ne kifwatulo.)

⁴ Yehova i “Leza wa bubine,” kadi ufundijanga buno bubine ku boba bamusenswe. (Ñim. 31:5) Mu uno muswelo, wibazunzulanga ne kwibanyongolola ku bubela bwa Satana. Kadi Yehova ufundijanga bengidi bandi bekale boloke ne bampikwa budimbidimbi. Ne kino kibalengejanga bekale na ndoe ya mutyima kadi balēmekibwe. (Nki. 13:5, 6) Tukulupile amba ye mwalongēle ne kodi pano powifunda Bible. Wi mumone amba mashinda a Yehova i malumbuluke ku bantu bonso ne kodi abe mwine. (Ñim. 77:13) O mwanda ubatonge kulonga byobya binena Leza bu byoloke. (Mat. 6:33) Usakanga kulwila bubine ne kukwasha ku kubepulula bubela bubepēlwe Leza wetu, Yehova. Le ukabwanya namani kulonga namino?

5. Le i muswelo’ka obwanya kukwatakanya bubine ne boloke?

⁵ Ubwanya kutonga mwikadilo wa mu būmi ukulengeja unene amba: “Napele bubela bwa Satana, nakwatakanya bubine. Nsakanga Yehova ekale Mubikadi wami, kadi nsakanga kulonga byobya byamona bu byoloke.” Le ukabwanya namani kwikala na būmi bwa uno muswelo? Fwena Yehova mu milombelo kadi wipāne kwadi ebiya kolombola kwipāna’kwa ku bantu bonso kupityila ku kubatyijibwa. Kusanswa bubine ne boloke e byo bikakukwasha bininge ukwate butyibi bwa kubatyijibwa.

6. Le Ñimbo ya Mitōto 45:4 uleta bubinga’ka botufwaninwe kusanshilwa Yesu Kidishitu?

⁶ Mwanda waka usenswe Yesu Kidishitu? Bubinga bumo bomusanshilwe butanwa mu Ñimbo ya Mitōto 45:4. (Tanga.) Yesu ukwatakenye bubine, kwityepeja ne boloke. Shi nobe usenswe bubine ne boloke, kibalombola patōka’mba usenswe Yesu Kidishitu. Langulukila pa muswelo wābingije Yesu na bukankamane bubine ne  boloke. (Yoa. 18:37) Ino pene’pa, Yesu umwekejanga namani kwityepeja?

7. I kika kyowasangela mu mwanda utala kwityepeja kwa Yesu?

⁷ Yesu i mumwekeje kwityepeja kupityila ku kimfwa kyandi. Kimfwa, upanga Shandi ntumbo yonso pa kyaba kya kwipa’yo aye mwine. (Mako 10:17, 18; Yoa. 5:19) Le ubeivwana namani pa kuno kwityepeja? Ye kuno kubakutonona usanswe Mwana Leza ne kumulonda. Mwanda waka Yesu i mwityepeje? Mwanda Shandi wasenswe i mwityepeje, kadi usakanga kumwiula. (Ñim. 18:35; Bah. 1:3) Bine kumona Yesu umwekeja ngikadila ya Yehova mu muswelo mubwaninine, kekukabulwepo kukukokela kwadi.

8. Mwanda waka tusenswe Yesu Mulopwe wetu?

⁸ Tusenswe Yesu Mulopwe wetu mwanda i Muludiki muyampe. Yehova wāfundije wandi Mwana ne kumutonga bu muludiki. (Isa. 50:4, 5) Langa’po bidi buswe bwa kwipāna bwālombwele Yesu. (Yoa. 13:1) Nanshi Yesu byadi Mulopwe obe, ufwaninwe kumusanswa. Wāshintulwile amba boba bamusenswe bya binebine—ke boba baita bu balunda nandi kadi—bamulombolanga’mba bamusenswe na kukōkela mbila yandi. (Yoa. 14:15; 15:14, 15) Bine kusamba bulunda na Mwanā Yehova i dyese’po kashā!

9. Le lubatyijo lwa bene Kidishitu i lwiifwane namani na lwa Kidishitu?

⁹ Mu mbila yāsoñenye Yesu mudi ne ya amba balondi bandi bafwaninwe kubatyijibwa. (Mat. 28:19, 20) I mushiye kimfwa kiyampe mu uno mwanda. Lubatyijo lwandi, i lwishile na lwa balondi bandi mu miswelo imo. (Tala kapango “ Kwishila Kudi pa Bukata bwa Lubatyijo lwa Yesu na lwa Balondi Bandi.”) Inoko mu muswelo mukwabo i lwiifwane. Yesu wābatyijibwe mwanda wa kulonga kiswa-mutyima kya Shandi. (Bah. 10:7) Mo monka ne balondi ba Kidishitu nabo kitatyi kyobabatyijibwa balombolanga’mba abepāna kudi Yehova Leza. Mu uno muswelo būmi bwabo bwimaninanga pa kulonga kiswa-mutyima kya Leza, pa kyaba kya kiswa-mutyima kyabo. Nanshi balondanga kimfwa kya Mfumwabo.

10. Mwanda waka buswe bosenswe Kidishitu bufwaninwe kukutonona ubatyijibwe?

¹⁰ Witabije amba Yesu i Mwana wa bunka wa Yehova, kadi i Mulopwe mutongwe na Leza mwanda wa kwituludika. Uyukile amba Yesu i mwityepeje, kadi wiulanga mu muswelo mubwaninine kimfwa kya Shandi. Wimwifunde amba wādishishe bādi na nzala, kusenga batyumukwe mutyima, ne kundapa babela. (Mat. 14:14-21) Kadi umonanga muswelo watangidile kipwilo kyandi dyalelo. (Mat. 23:10) Ne kadi uyukile amba kumeso’ku byadi Mulopwe wa Bulopwe bwa Leza usa kulonga bivule. Le i muswelo’ka obwanya kulombola’mba umusenswe? I na kulonda kimfwa kyandi. (Yoa. 14:21) Kintu kibajinji kyobwanya kulonga pa kwiula kimfwa kyandi i kwipāna kudi Yehova ne kubatyijibwa.

11. Le i bubinga’ka bukatampe bwitulengeja tubatyijibwe, ne mwanda waka?

¹¹ Le i bubinga’ka bukatampe bwitulengeja tubatyijibwe? Yesu wālombwele patōkelela mbila mikatampe ya Leza, paānenene amba: “Sanswa Yehova Leza obe na mutyima obe onso, na muya obe onso, na ñeni yobe yonso, ne na bukomo bobe bonso.” (Mako 12:30) Le mo mosanshilwe Leza namino?

12. Mwanda waka tusenswe Yehova? (Tala ne kifwatulo.)

¹² Kudi bubinga buvule bwa kusanshilwa Yehova. Kimfwa, tuyukile amba aye  ye “nsulo ya būmi” kadi aye ye witupanga “kyabuntu kyonso kiyampe ne kya kupānwa kyonso kibwaninine.” (Ñim. 36:9; Yak. 1:17) Bintu byonso biyampe byodi nabyo bitambanga kudi Leza wa buswe ne wa buntu.

13. Mwanda waka kinkūlwa i kyabuntu kilumbuluke mpata?

¹³ Kinkūlwa i kyabuntu kilumbuluke mpata kitupele Yehova. Mwanda waka tubanena namino? Tala’tu mupwanine bininge Yehova na wandi Mwana. Yesu wānenene amba: “Tata unsenswe” kadi nami “nsenswe Tata.” (Yoa. 10:17; 14:31) Kipwano kyabo i kitamine’ko bininge mu bula bwa myaka midiyala ne midiyala yobashikete pamo. (Nki. 8:22, 23, 30) Nanshi langulukila pa mobyāsanshile Leza kuleka wandi Mwana asusuke ne kufwa. Yehova usenswe bantu—kubadila’mo ne abe—kyo kyāmulengeje apāne wandi Mwana bu kitapwa mwanda wa kukupa abe ne bantu bakwabo mukenga wa kwikala na būmi bwa nyeke. (Yoa. 3:16; Ngt. 2:20) Buno i bubinga bukatampe kutabuka bonso botufwaninwe kusanshilwa Leza.

14. Le i kitungo’ka kiyampe kyobwanya kwitungila mu būmi?

¹⁴ Buswe bosenswe Yehova butaminanga’ko kitatyi kyowifundila’ko myanda yandi. Na bubine usakanga kumufwena bininge dyalelo ne nyeke ne nyeke.  Ukukankamikanga na kanye usangaje mutyima wandi. (Nki. 23:15, 16) Ubwanya kumusangaja mu byonena ne byolonga. Muswelo owiendeja mu būmi o ukalombola shi bine usenswe Yehova. (1 Yo. 5:3) Kusanswa Yehova kyo kitungo kiyampe kwitungila mu būmi.

15. Le i muswelo’ka obwanya kulombola’mba usenswe Yehova?

¹⁵ Le i muswelo’ka obwanya kulombola’mba usenswe Yehova? Dibajinji, i na kulombela milombelo ya pa bula mwine mokepāna kudi Leza umo kete wa bine. (Ñim. 40:8) Kupwa, ukalombola kuno kwipāna ku bantu bonso na kubatyijibwa. Enka motwamwena’kyo mu kino kishinte, kubatyijibwa i kinkumenkume kikatampe kikakuletela nsangaji mu būmi. Mwanda shi ubabatyijibwa ubashilula būmi bupya, ke bwa abe mwinepo ino i bwa kwingidila Yehova. (Loma 14:8; 1 Pe. 4:1, 2) Dino dibwanya kumweka bu ditabula dikatampe, ne bine i dikatampe. Inoko dibakushitwila mukenga wa kwikala na būmi buyampe mpata. Muswelo’ka?

16. Enka mulombwela’kyo Ñimbo ya Mitōto 41:12, le Yehova ukesela namani boba bepāna mwanda wa kumwingidila?

¹⁶ Yehova i wa buntu kutabuka bonso. Nansha shi umupe bika, byakakwalwija byo bingi. (Mako 10:29, 30) Aye ukakupa būmi buyampe, bwa nsangaji, ne kuloelelwa nansha ke mu ino ntanda ya lupito. Ne ino i nsolweji’tu ya byabuntu byakupa. Lwendo lobe lowashilula pa kubatyijibwa keludipo na mfulo. Ubashilula būmi bwa kwingidila Shobe wa buswe nyeke ne nyeke. Buswe budi pa bukata bobe na Shobe busa kwendelela butamina’ko. Byadi’ko nyeke, nobe ukekala’ko nyeke.—Tanga Ñimbo ya Mitōto 41:12.

17. Le i kintu’ka kyobwanya kupa Yehova kyakadipo nakyo?

¹⁷ Kitatyi kyotabula ditabula dya kwipāna ne kubatyijibwa, ubaikala na dyese dya kupa Shobe kintu kya mvubu mpata. I mukupe bintu byonso biyampe, bitatyi byonso bya nsangaji, bine byosangelanga. Nanshi nobe pā yewa wālongele diulu ne ntanda kintu kyakadipo nakyo—ko kunena’mba  kumwingidila na mutyima umo. (Yoba 1:8; 41:11; Nki. 27:11) Bine uno o muswelo muyampe wa kwipāna kwadi. Ne kutatana kwine mpika, buswe bosenswe Yehova bo bubinga buyampe bukakulengeja ubatyijibwe.

18. Le i bipangujo’ka byofwaninwe kwiipangula?

¹⁸ Shi kepano, i muswelo’ka obwanya kulondolola ku kipangujo kya amba, Le wi mwiteakanye mwanda wa kubatyijibwa? Abe mwine kete ye ubwanya kulondolola. Nanshi i biyampe wiipangule amba, ‘Mwanda waka ndejaleja kubatyijibwa?’ (Bil. 8:36) Vuluka bubinga busatu botwesambila’po. Bubajinji, usenswe bubine ne boloke. Wiipangule amba, ‘Le nsakanga kukemwena difuku dikekala muntu yense wisamba bubine ne kulonga byoloke?’ Bwa bubidi, usenswe Yesu Kidishitu. Wiipangule amba, ‘Le nsakanga Mwana Leza ekale Mulopwe wami? Ne le nsakanga kulonda kimfwa kyandi?’ Kutentekela pa byonso, bubinga bwa busatu i bwa amba usenswe Yehova. Nanshi wiipangule amba, ‘Le nsakanga kusangaja mutyima wa Yehova na kumwingidila aye Leza wami?’ Shi ubalondolola’mba en-en ku bino bipangujo byonso, pene’po kyokubatyijibwapo i kika? Mwanda waka ulejaleja kubatyijibwa?—Bil. 16:33.

19. Mwanda waka kufwaninwepo kwikaka kubatyijibwa? Leta kimfwa. (Yoano 4:34)

¹⁹ Shi wikakanga kubatyijibwa, nabya tala kino kimfwa kyāshile Yesu. (Tanga Yoano 4:34.) Yesu wādingakenye kulonga kiswa-mutyima kya Shandi na kudya bidibwa. Mwanda waka? Mwanda bidibwa bidi na kamweno kotudi. Yesu wāyukile amba kyonso kitulomba Yehova i kya kamweno kotudi. Ketulombengapo kulonga kintu kibwanya kwitusanshija. Le mu kulonga kiswa-mutyima kya Yehova mubadilwa ne kubatyijibwa kobe? Bine i amo. (Bil. 2:38) Nanshi kulupila’mba shi ukōkele uno musoñanya wandi wa kubatyijibwa ukamwena’mo. Shi wikalanga na kampeja-bukidi ka kudya bidibwa bya munsonso, pene’po mwanda waka ulejaleja kubatyijibwa?

20. Le i bika byotukabandaula mu kishinte kilonda’ko?

²⁰ Mwanda waka ulejaleja kubatyijibwa? Bavule babwanya kulondolola’mba, “Nkyaikele kwiteakanya.” Shako bubine i buno amba butyibi bwa kwipāna kudi Yehova ne kubatyijibwa i butyibi bukatampe mpata mu būmi. O mwanda pa kwiteakanya bilomba kitatyi, kulanguluka, ne bukomo bukatampe. Ino shi wabilanga bininge kutabula dino ditabula, i bika byofwaninwe kulonga tamba’nka pano pa kwiteakanya? Tukabandaula uno mwanda mu kishinte kilonda’ko.