KISHINTE KYA KWIFUNDA 14
“Pa Kino Bonso Bakayuka’mba Mwi Bami Bana ba Bwanga”
“Pa kino bonso bakayuka’mba mwi bami bana ba bwanga—shi mudi na buswe umbukata mwenu.”—YOANO 13:35.
LWIMBO 106 Tutamijei Ngikadila ya Buswe
BIDI MU KISHINTE a
Le buswe budi mu bukata mwa Batumoni ba Yehova, bwimwenanga boba ke Batumonipo bwikalanga na lupusa’ka pobadi? (Tala musango 1)
1. I bika bitulumunanga bantu basangela myanda miyampe pobatanwa ku kupwila kwetu? (Tala ne kifwatulo.)
LANGA’PO bidi, ba mulume ne mukaji abaiya kupwila musunsa wabo mubajinji ku Njibo ya Bulopwe ya Batumoni ba Yehova. Abatulumunwa na nsangaji yobebalubula nayo ne na buswe bobamona mu kipwilo. Abo pobenda mwishinda kukajoka, mukaji wasapwila mulume amba, ‘Namone Batumoni ba Yehova i beshile na bantu bakwabo—abo badi biyampe.’
2. Le bamo i bakukale pa mwanda wa bika?
2 Na bubine buswe budi mu bantu ba Leza i butulumukwa bininge. Shako Batumoni ba Yehova ke babwanininepo. (1 Yo. 1:8) Shi tubeibidila bininge na boba badi mu kipwilo, tukokeja kumona ne kutupatupa kwabo. (Loma 3:23) Kya bulanda, bamo bakukajibwanga na kuno kubulwa kubwaninina.
3. Le i kika kiyukilwanga’ko balondi ba bine ba Yesu? (Yoano 13:34, 35)
3 Tutalei monka kisonekwa kimanine’po mutwe wa mwanda. (Tanga Yoano 13:34, 35.) Le i kintu’ka kiyukanyanga balondi ba bine ba Yesu Kidishitu? I buswe, ke kubwanininapo. Vuluka’mba Yesu kānenenepo amba: ‘Pa kino mukayuka’mba mwi bami bana ba bwanga.’ Ino wānenene amba: “Pa kino bonso bakayuka’mba mwi bami bana ba bwanga.” Yesu kānenenepo amba, i enka balondi bandi badi ba kwiyuka bu babine kupityila ku buswe budi mu bukata mwabo, ino ne boba badi panja pa kipwilo nabo badi ba kwibayuka.
4. Le i bika bisakanga kuyuka bantu bamo pa bene Kidishitu ba bine?
4 Bamo mu boba ke Batumonipo ba Yehova babwanya kwiipangula’mba: ‘Le buswe buyukanyanga namani balondi ba bine ba Yesu? Le Yesu wālombwele namani buswe ku batumibwa bandi? Le bikokejika namani kwiula kimfwa kyandi dyalelo?’ Batumoni bafwaninwe kulangulukila pa malondololo a bino bipangujo. Mwanda kulangulukila’po kuketukwasha tulombole buswe bininge, nakampata kitatyi kyokwikala kubulwa kumvwañana umo ku mukwabo.—Ef. 5:2.
MWANDA WAKA I ENKA BUSWE BUYUKENANGA’KO BALONDI BA BINE BA YESU?
5. Le binenwa bya Yesu bidi mu Yoano 15:12, 13 bishintulula bika?
5 Yesu wālombwele patōkelela’mba, kudi buswe bwa pa bula bukayukanya balondi bandi. (Tanga Yoano 15:12, 13.) Tala byawēbasoñenye, amba: “Mwisanswe banwe bene na bene monka monemusanshilwe.” Ko kunena namani? Yesu wāendelele na kushintulula’mba, i buswe bwa kwipāna—buswe butonona bene Kidishitu kufwila banababo shi bilomba nabya. b
6. Le Kinenwa kya Leza kikankamikanga namani bantu besanswe?
6 Kinenwa kya Leza, kikankamikanga bantu bekale na buswe. Bantu bavule ibele mu mavese obasenswe bino bisonekwa: “Leza i buswe.” (1 Yo. 4:8) “Sanswa mukwenu mowisanshilwe abe mwine.” (Mat. 22:39) “Buswe bupūtanga milwi ne milwi ya bubi.” (1 Pe. 4:8) “Buswe kebukankalwangapo nansha dimo.” (1 Ko. 13:8) Bino bisonekwa ne bisonekwa bikwabo bilombola kamweno kadi mu kwikala na ino ngikadila milumbuluke mpata.
7. Mwanda waka Satana kabwanyapo kulungila bantu mu buswe bwa bine?
7 Bantu bavule beipangulanga’mba: ‘Le bikokejika kuyuka kipwilo kya bine? Bipwilo byonso bītelanga bu bifundijanga bubine, ino kipwilo ne kipwilo kifundijanga bishile padi Leza.’ Satana i muvutakanye bantu na kutūla’ko bipwilo bya bubela bivule. Inoko kabwanyapo kutūla bwine Kidishitu bwa ntanda yonso bwa bantu besenswe umo ku mukwabo. Enka Yehova kete, ye ubwanya kwibutūla’ko. Ne i kyendele’mo, mwanda buswe bwa bine butambanga kudi Yehova—mwine upa bengidi bandi mushipiditu wandi ne madyese andi. (1 Yo. 4:7) O mwanda ke kyakutulumukapo shi Yesu wānenene amba i enka buswe bwampikwa kwisakila bo bukayukanya balondi bandi ba bine.
8-9. Le bantu bavule batengelwe namani na buswe bobamwene mu Batumoni ba Yehova?
8 Enka mwālaile’kyo Yesu, bantu bavule i bajingulule balondi bandi ba bine kupityila ku buswe bwa bine budi mu bukata mwabo. Kimfwa tutu umo witwa bu Ian uvuluka musunsa mubajinji wawakatenwe ku kitango kyalongelwe mu kiwanza kya futu kya kubwipi na kwabo. Myeji mityetye kunyuma Ian wadi wenda ku kino kiwanza kukatala futu. Unena’mba: “Palongelwe’mo kitango kwaikele kwishila kukatampe na kitatyi kyonadi ñenda kutala’mo futu. Batumoni badi bya bulēme, bavwale biyampe, kadi babo bana belēmeke.” Ubweja’ko amba: “Kutentekela pa bino byonso, bano bantu badi bamweka bu bete mutyima kadi ba ndoe—kintu kyonadi ngabilanga. Nkikivulukilepo mwisambo nansha umo mu mīsambo yanenenwe mu dine difuku’dya, inoko mwiendelejo wa Batumoni i munshale nyeke mu ñeni.” c Na bubine mwiendelejo wa uno muswelo utambanga ku buswe bwa binebine botwisenswe batwe bene na bene. Byotusenswe batutu ne bakaka, twibalongelanga bintu na kanye ne bulēme.
9 Tutu umo witwa bu John nandi wanenene muswelo umo onka pawashilwile kupwila netu, amba: “Natengelwe na muswelo obadi bapwene. . . Abo bonso—badi bamweka’tu bu bajila. Buswe bwabo bwa bine bwankulupije amba nasokola kipwilo kya bine.” d Ne pano napo, ino myanda mimweke ilombola’mba bantu ba Yehova i bene Kidishitu ba bine.
10. Le i mu mikenga’ka ya pa bula motukalombola buswe bwa bwine Kidishitu? (Tala ne kunshi kwa dyani.)
10 Enka na motwanenenanga ku ngalwilo, i kutupu motudi mubwaninine. Kitatyi kimo, banabetu babwanya kunena nansha kulonga bintu bitulobeja. e (Yak. 3:2) Ino yo mikenga ya pa bula motufwaninwe kulombola buswe bwa bwine Kidishitu kupityila ku muswelo otulondolola. Le i ñeni’ka yotuboila ku kimfwa kya Yesu mu uno mwanda?—Yoa. 13:15.
LELO YESU WĀLOMBWELE NAMANI BUSWE KU BATUMIBWA BANDI?
Yesu wālombwele batumibwa bandi buswe kitatyi kyobālombwele tuto (Tala musango 11-13)
11. Le i tuto’ka twāmwekeje ba Yakoba ne Yoano? (Tala ne kifwatulo.)
11 Yesu kādipo ulomba balondi bandi balonge bintu mu muswelo mubwaninine. Ino wēbakweshe na buswe balemunune tuto twabo mwanda wa betabijibwe na Yehova. Difuku dimo batumibwa bandi babidi ba Yakoba ne Yoano, bālombwele inabo akebanenene kudi Yesu mwanda wa ebape bifuko bya pa bula mu Bulopwe. (Mat. 20:20, 21) Mu uno muswelo, ba Yakoba ne Yoano bāmwekeje kwisakila.—Nki. 16:18.
12. Le i ba Yakoba ne Yoano kete bāmwekeje tuto? Shintulula.
12 Ke enkapo ba Yakoba ne Yoano bāmwekeje tuno tuto mu kine kitatyi’kya. Tala byālongele batumibwa bakwabo. Tutanga’mba: “Penepo boba bakwabo dikumi pa kwivwana nabya bafītyilwa ba mwana na mwanabo babidi’ba.” (Mat. 20:24) Langa’po binenwa bitapa byēnenene ba Yakoba, Yoano ne batumibwa bakwabo. Padi bādi babwanya kwinena’mba: ‘Mubemonenga bu ba ani pa kukalomba bifuko bya pa bula mu Bulopwe? Le i banwe kete bengile bininge na Yesu? Mwene netu twi bafwaninwe ano madyese a pa bula!’ Nansha bikale namani, batumibwa bālengeje kisanso kya bu bana na bana kiketeke mu kitatyi kampanda.
13. Le Yesu wālongele namani pa kutupatupa kwa batumibwa bandi? (Mateo 20:25-28)
13 Le Yesu wālongele’po namani pa uno mwanda? Kālobelepo. Kānenenepo amba usa kukakimba batumibwa bayampe kwibapita, bana-balume betyepeje balombola buswe umo ku mukwabo, aa. Inoko Yesu wālangulukile na kitūkijetyima na bano bana-balume ba mityima myoloke. (Tanga Mateo 20:25-28.) Nansha uno byokewādipo musunsa wabo mubajinji ne wa mfulo wa kulwila i ani mukatampe mobadi, wāendelele kwibalongela bintu na buswe.—Mako 9:34; Luka 22:24.
14. Le batumibwa ba Yesu bātamīne mu kifuko kya muswelo’ka?
14 Ne kutatana kwine mpika, Yesu wāvulukile bitamina bya batumibwa bandi. (Yoa. 2:24, 25.) Bātamīne mu bifuko mwādi bendeji ba bipwilo bādi balwila ntumbo ne bukatampe. (Mat. 23:6; dingakanya na video inena’mba, Les premiers sièges dans les synagogues mu note d’étude pa kisonekwa kya Mateo 23:6.) Bendeji ba bipwilo bya Bayuda, bādi bemona bu boloke. f (Luka 18:9-12.) Yesu wāyukile amba kutamina mu kino kifuko kwādi kubwanya kushinta muswelo wimona batumibwa abo bene ne obamona bantu bakwabo. (Nki. 19:11.) Kādipo ulomba bandi bana ba abwanga balonge bivule kupita pa byobabwanya, kadi kādipo uloba shi abakomenwa. Wādi uyukile amba badi na mityima miyampe, o mwanda wēbakweshe na kitūkijetyima banekenye mitatulo, kwisakila ne kwibipingakanya na buswe.
LE I MUSWELO’KA OTUBWANYA KWIULA KIMFWA KYA YESU?
15. Le i bika byotwifunda ku byātene ba Yakoba ne Yoano?
15 Byobya byātene ba Yakoba ne Yoano, bibwanya kwitufundija bintu bivule. Bālubile pa kulomba bifuko bya pa bula mu Bulopwe. Kadi batumibwa bakwabo nabo bālubile pa kuleka uno mwanda wibakalañanye. Ino nansha nankyo Yesu wālongele bintu na kanye ne buswe ku bano batumibwa bonso 12. I ñeni’ka yotuboila’ko? Mwanda keudipo enka pa byobya bilonga bakwabo ino ine pa byobya byotulonga pa kutupatupa kwabo. Le i bika bibwanya kwitukwasha? Shi mutōtyi-netu wetulobeja, twiipangulei amba: ‘Mwanda waka byawalonga bibandobeja bininge? Le bibasokola pondi kato kampanda komfwaninwe kunekenya? Le yewa wandobeja abulwepo padi udi mu makambakano? Nansha shi ngidi na bubinga bwa kulobela, le mbulwepo kulombola buswe bwampikwa kwisakila na kwilwa mwanda’wa?’ Shi tulongele bakwetu bintu na buswe, nabya po pene tubelombola bya binebine amba twi balondi ba Yesu.
16. Le i ñeni’ka mikwabo yotuboila ku kimfwa kya Yesu?
16 Kadi kimfwa kya Yesu kitufundija muswelo wa kuyuka batōtyi-netu. (Nki. 20:5) Shako Yesu wādi ubwanya kumona bidi mu mutyima. Batwe ketubwanyapo. Inoko tubwanya kulekela kutupatupa kwa batutu ne bakaka. (Ef. 4:1, 2; 1 Pe. 3:8.) Shi tuyuke bitamina byabo, biketupēlela kwibalekela. Tutalei kino kimfwa.
17. Le mutadi wa kipindi wamwenine namani mu kuyuka mwanabo mu lwitabijo?
17 Mutadi umo wa kipindi wa mu Afrika wa Kutunduka, uvuluka tutu umo waamwene bu udi na mutyima mūmu. Le mutadi wa kipindi walongele’po namani? Unena’mba: “Pa kyaba kya kwepuka uno tutu, nasumininwe kumuyuka biyampe.” Ebiya uno mutadi wa kipindi wayuka’mba, kudi myanda ya kala yatene uno tutu yamulengeje ekale namino. Mutadi wa kipindi wendelela na kunena’mba: “Ponayukile bukomo bwalongele uno tutu pa kunekenya bibidiji byandi ne kushinta, nashilula kumusanswa. Twapwene bininge.” Nanshi, shi tuyuke biyampe batutu ne bakaka nabya tukapēlelwa kwibasanswa.
18. Le i bipangujo’ka byotufwaninwe kwiipangula shi abetulobeja kudi mwanetu mu kipwilo? (Nkindi 26:20)
18 Kitatyi kimo tubwanya kumona’mba i biyampe tukesambe na mwanetu wetulobeje. Inoko kumeso kwa kulonga namino, i biyampe twiipangule amba: ‘Le ndyukile myanda senene?’ (Nki. 18:13) ‘Le abulwe padi byawalongele webilongele pampikwa kuyuka?’ (Mus. 7:20) ‘Le nami kendi mulonge’po kilubo kya uno muswelo?’ (Mus. 7:21, 22) ‘Shi nakemone nandi, mbulwe kubaija mwanda pa kyaba kya kwiupwija?’ (Tanga Nkindi 26:20.) Shi twitūdile’ko kitatyi kya kubandula bino bipangujo, padi buswe botusenswe banabetu buketutonona twilwe mwanda’wa.
19. Le ubasumininwa kulonga bika?
19 Batumoni ba Yehova mu kikonge i belombole amba i bana ba bwanga ba bine ba Yesu. Umo ne umo ulombolanga amba i mulondi wa Yesu na kwikala na buswe bwampikwa kwisakila ku batutu ne bakaka pampikwa kubanga kutupatupa kwabo. Mu uno muswelo tukakwasha bantu bakwabo bayuke mutōtelo wa bine ne kwilunga pamo netu mu kutōta Yehova Leza wa buswe. Nanshi tusumininwei kulombola buswe buyukanya bene Kidishitu ba bine.
LWIMBO 17 “Nsakile”
a Bantu bavule batwelanga mu bubine mwanda bakokwanga na buswe bwa binebine bobamonanga mu bukata mwetu. Inoko twi bambulwa kubwaninina, kyaba kimo tubwanya kukomenwa kulongela mutōtyi-netu bintu na buswe. Tubandaulei’ko mwanda waka buswe budi na mvubu ne muswelo otubwanya kwiula kimfwa kya Yesu shi kubaikala kubulwa kumvwañana na mwanetu.
b Tala kitabo “Wiye Unonde,” shap. 17, mus. 10-11.
c Tala kishinte “Mfulo Mfulō Nasokola Būmi bwa Nsangaji,” mu Kiteba kya Mulami kya difuku 1 Kweji 11, 2012, p. 13-14 kya Falanse.
d Tala kishinte “Būmi Bwami Bwadi Bumweka bu Buyampe,” kya mu Kiteba kya Mulami, 1 Kweji 5, 2012, p. 18-19 mu Falanse.
e Kino kishinte kekisambilapo pa bubi bukatampe bunenwe kupwijibwa na bakulumpe, kimfwa buno butelelwe mu 1 Bene Kodinda 6:9, 10.
f Lapolo imo inena’mba, mwenda mafuku labi umo wānenene amba: “Shi pa ntanda ke pekale bantu boloke bwa Abalahama, nabya kebapitepo pa makumi asatu. Shi badi’mo makumi asatu, nankyo tudi’mo ami ne wami mwana; kadi shi padi dikumi nabya tudi’mo ami ne wami mwana; kadi shi i batano nabya ami ne wami mwana tudi’mo; kadi shi i babidi nabya i enka ami ne wami mwana; kadi shi padi umo nankyo i ami.”
