Bible kanenene’popo kintu. Ino ulombola’ko myanda imoimo ya mvubu yēbalengeje padi bakwate butyibi bwa kushala mu Betelema.

Mwikeulu wāsapwidile Madia amba usa kwimita dīmi ne kubutula mwana. Pāletele mwikeulu uno musapu, ba Madia ne Yosefa bādi bashikata mu Nazala, kibundi kya ba Yosefa, mu Ngadilea. (Luka 1:26-31; 2:4) Mwenda mafuku, pobātambile ku Edipo, bājokēle ku Nazala. Ye kwātamīne Yesu wāikala mwine Nazala. (Mat. 2:19-23) O mwanda tumonanga Nazala mu ñeni kitatyi kyonso kyotwisambila padi Yesu, Yosefa, ne Madia.

Madia wādi na mubutule witwa bu Edisabeta, wādi ushikata mu Yuda. Edisabeta wādi mukaja kitobo Zekadia kadi ye wābutwile Yoano Mubatyiji. (Luka 1:5, 9, 13, 36) Madia wākemwine Edisabeta ku Yuda ne kushikata’ko myeji isatu. Kupwa wājokela ku Nazala. (Luka 1:39, 40, 56) O mwanda Madia wādi uyukile ntanda ya Yuda.

Mwenda mafuku, Yosefa wākōkele kijila kya “kukelembeja.” O mwanda Yosefa wāendele lwendo lwa kutamba ku Nazala kwenda ku Betelema, “kibundi kya Davida,” kadi kwine kwālaile bupolofeto amba ko kukabutwilwa Meshiasa. (Luka 2:3, 4; 1 Sa. 17:15; 20:6; Mika 5:2) Madia pa kupwa kubutwila’ko Yesu, Yosefa kāsakilepo kumwendeja lwendo lulampe lwa kujokela ku Nazala na mwana wa lukeke. Bāshikete mu Betelema, kibundi kyādi ku kintu kya makilometele 9 na Yelusalema. Namino byādi bibwanya kwibapēlela kusela wabo mwana bende nandi ku tempelo, ne kulambula bitapwa byādi bilombelwe mungya bijila.—Levi 12:2, 6-8; Luka 2:22-24.

Mwikeulu wa Leza wāsapwidile Madia dibajinji amba wandi mwana ukapebwa “lupona lwa . . . Davida” kadi “ukabikala bu Mulopwe.” Padi ba Madia ne Yosefa bāmwene amba kyādi kya mvubu Yesu kubutwilwa mu kibundi kya Davida. (Luka 1:32, 33; 2:11, 17) Ye bano bālangile amba i kya tunangu bendelele kushikata’mo ne kwilaija enka ne byobayuka bibasakila Leza kulonga.

Ketuyukilepo kitatyi kyobādi kebalonge ku Betelema na pāile bantu bamo babuka na ñenyenye. Ino mu kine kitatyi’kya kisaka kyādi kishikete mu yabo njibo, kadi Yesu wādi “mwana mutyetye,” kākidipo mwana wa lukeke. (Mat. 2:11) Bimweka bu pa kyaba kya kujokela ku Nazala, bāshikete kibundi mu Betelema mu bula bwa kitatyi kilampe.

Heloda wāsoñenye “bepaye bana bana-balume bonso ba mu Betelema . . . kushilwila ku mwana wa myaka ibidi kotūka.” (Mat. 2:16) Mwikeulu pa kwibadyumuna ku uno musoñanya, ba Yosefa ne Madia bānyemena ku Edipito na Yesu ne kushikata’ko enka ne byāfwile Heloda. Mwenda mafuku, Yosefa wāselele kisaka kyandi bāenda ku Nazala. Mwanda waka kebājokēlepo ku Betelema? I mwanda bānyemene Akeleusa mwanā Heloda wa kasusu, mwine wādi ubikele mu Yudea. Kadi i pa mwanda wa kidyumu kyēbapele mwikeulu. Nazala kyādi kifuko kiyampe kudi Yosefa mutōtyi wa bine wa Leza kulelela’ko Yesu.—Mat. 2:19-22; 13:55; Luka 2:39, 52.

Mobimwekela, Yosefa wāfwile kumeso kwa Yesu kufwa ne kushitula dishinda dya bantu kukekala momwa mūlu. Nanshi Yosefa ukasangwilwa pano pa ntanda. Bavule baketana nandi ne kuyukila bivule kwadi pa kine kyobāshikatyile mu Betelema aye ne Madia, pa kupwa kwa Yesu kubutulwa.