1. I bika byotufwaninwe kulonga pa kupanda ku difuku dya Yehova?

 BIBLE paesambila pa “difuku dya Yehova,” ufunkilanga pa kitatyi kikonakanya Yehova balwana nandi ne kupandija bantu bandi. Pa kala, Yehova wāletele butyibi bwandi pa mizo imo. (Isa. 13:1, 6; Ezk. 13:5; Zef. 1:8) Mu kino kyetu kitatyi, “difuku dya Yehova” dikashilula na kutambwa kwa Babiloni Mukatampe ne kufula na divita dya Amakedona. Pa kupanda ku dino “difuku,” tunenwe kwiteakanya tamba’nka pano. Yesu wāfundije amba tufwaninwe kwikala beteakanye ne ‘kwilongolola nyeke’ ku “kyamalwa kikatampe.”—Mat. 24:21; Luka 12:40.

2. Mwanda waka tubwanya kumwena mu mukanda wa 1 Bene Tesalonika?

² Mu mukanda wandi mubajinji wa ku bukomo bwa mushipiditu waālembēle bene Tesalonika, mutumibwa Polo wāingidije’mo byelekejo bivule mwanda wa kukwasha bene Kidishitu bekale nyeke beteakanye ku dikufu dikatakata dya Yehova dya butyibi. Polo wādi uyukile amba difuku dya Yehova kedyādipo dya kwiya mu kine kitatyi’kya. (2 Ts. 2:1-3) Inoko, wākankamikile banababo beteakanye ku dino difuku pamo bwa adyo dīya kesha. Ne batwe netu tunenwe kulonda ano madingi. Tubandaulei’ko nshintulwilo yaāletele pa ino myanda ilonda’ko: (1) muswelo ukafika difuku dya Yehova, (2) boba kebakapandepo ku dino difuku, ne (3) muswelo wa kwiteakanya pa kupanda.

3. Le difuku dya Yehova dikāya pamo bwa ngivi bufuku muswelo’ka? (Tala ne kifwatulo.)

³ “Pamo bwa ngivi bufuku.” (1 Ts. 5:2) Uno o muneneno mubajinji wa kyelekejo wāingidije Polo pa kulombola mukafikila difuku  dya Yehova. Divule bangivi baloñanga bintu bukidibukidi mu bukata bwa mfindi kitatyi kekilangilapo bantu amba basa kwiya. Ne difuku dya Yehova nadyo dikafika mu kitulumukila, ne kutulumuna bantu bavule. Enka ne bene Kidishitu ba bine babwanya kukatulumunwa pa muswelo ukalongeka bintu bukidibukidi. Inoko abo kebakonakanibwapo.

4. Le difuku dya Yehova didi pamo bwa bisanso bya lubutulo muswelo’ka?

⁴ “Pamo bwa bisanso bya lubutulo bya mwana-mukaji wa dīmi.” (1 Ts. 5:3) Lolo utengēle kubutula kabwanyapo kuyuka pa bute pa bute difuku dine dikashilula bisanso bya lubutulo. Inoko uyukile amba bikamukwata. Pobikashilula bikekala bya mu kitulumukila, bisansa, kadi byampikwa kwimana. Ne batwe netu, ketuyukilepo difuku ne nsá ikashilula difuku dya Yehova. Inoko tukulupile amba dikāya, kadi butyibi bwa Leza pa bantu babi bukekala bwa mu kitulumukila, bwine bokebabwanyapo kunyema.

5. Le kyamalwa kikatampe kidi pamo bwa kibanga muswelo’ka?

⁵ Pamo bwa kibanga. Kyelekejo kya busatu kya Polo kīsambila monka pa bangivi beba mu bukata bwa bufuku. Inoko pano Polo washinta milangwe yandi kebimweka bu kadingakanya difuku dya Yehova na kibanga. (1 Ts. 5:4) Bangivi babwanya kuta mutyima ku byobalonga bufuku bavulaminwa’ko amba kitatyi kyendanga lubilo. Kibanga kibwanya kwibatulumuna ne kwibalupwila patōka. Ne kyamalwa kikatampe nakyo kikalupwila patōka boba badi pamo bwa bangivi bashele mu mfindi, na kwendelela kulonga bilongwa bifītyija Leza mutyima. Inoko batwe tubwanya kwikala beteakanye na kupela kwikala na mwiendelejo ufītyija Leza mutyima, ne kulondalonda “miswelo yonso ya buyampe ne boloke ne bubine.” (Ef. 5:8-12) Kupwa Polo wāingidije byelekejo bibidi bikwabo mwanda wa kwisambila pa boba kebakapandepo.

6. Le bantu bavule balēle tulo mu buluji’ka? (1 Bene Tesalonika 5:6, 7)

⁶ ‘Boba balēle tulo.’ (Tanga 1 Bene Tesalonika 5:6, 7.) Polo wādingakenye boba kebakapandepo ku difuku dya Yehova na bantu balēle tulo. Kebayukilepo bilongeka nansha muswelo upita kitatyi. O mwanda, kebabwanyapo kuyuka kitatyi kilongeka bintu bikatampe nansha kulongapo kintu. Bantu bavule dyalelo balēle tulo ku mushipiditu. (Loma 11:8) Kebakulupilangapo bintu bilombola’mba tudi mu “mafuku a mfulo” ne amba kyamalwa kikatampe kisa kwiya panopano. Shi kwalongeka binkumenkume bikatampe mu ino ntanda, bapalamukanga ku mushipiditu ne kutompa kuta mutyima ku musapu wa Bulopwe. Inoko bavule bajokelanga monka mu tulo pa kyaba kya kushala batale. Enka ne bamo bakulupile amba difuku dya butyibi disa kwiya, balañanga’mba dikidi kulampe. (2 Pe. 3:3, 4) Inoko batwe, difuku dyonso dipita tujingululanga’mba po pene potufwaninwe kushala batale ku mushipiditu.

7. Le boba basa kufikilwa na bukalabale bwa Leza badi pamo bwa bakolwe muswelo’ka?

⁷ “Ba kukolwa.” Polo wādingakenye boba bakaponenwa na bukalabale bwa Leza na bankolwankolwa. Bantu bakolwe kebatengapo mutyima ku bilongeka, kadi kebakwatangapo butyibi bwa tunangu. Ne bantu babi nabo, kebatengapo mutyima ku bidyumu bya Leza. Batoñanga būmi bwibatwala ku konakanibwa. Inoko bene Kidishitu i bakankamikwe kulama ñeni yabo, ko kunena’mba kulanguluka senene. (1 Ts. 5:6) Mufundi umo wa Bible ushintulula kulanguluka senene bu “ñeni mitūke, mishikate, itompa ne kupikula bintu mobyolokele kadi itukwasha kukwata butyibi buyampe.” Mwanda waka tufwaninwe kwikala nyeke na ñeni mitūke kadi mishikate? I mwanda wa tuleke kwikuja mu myanda ya politike ne ya tuvutakanya twa bantu dyalelo. Kuningilwa kwikuja mu ino myanda kukaningila’ko penda pafwena difuku dya Yehova. Inoko, ketunenwepo kuzumbija mutyima pa byotukalonga’po. Mushipiditu wa Leza uketukwasha twikale na ñeni mitūke kadi mishikate ne kukwata butyibi bwa tunangu.—Luka 12:11, 12.

8. Le 1 Bene Tesalonika 5:8 welekeja namani ngikadila iketukwasha mwanda wa twikale nyeke batale ne kulama ñeni yetu? (Tala ne kifwatulo.)

⁸ ‘Vwalai kilama-kyadi ne kilama-mutwe.’ Polo witudingakanya na basola beteakanye kadi belumbile mwanda wa kukalwa. (Tanga 1 Bene Tesalonika 5:8.) Sola wikalanga mwiteakanye kitatyi kyonso mwanda wa kukalwa divita. Ne batwe netu mo monka. Twikalanga nyeke beteakanye ku difuku dya Yehova na kuvwala kilama-kyadi kya lwitabijo, buswe, ne kilama-mutwe kya lukulupilo. Ino ngikadila ibwanya kwitukwasha bininge.

9. Le lwitabijo lwitukiñanga namani?

⁹ Kilama-kyadi kikiñanga mutyima wa sola. Lwitabijo ne buswe nabyo bikiñanga mutyima wetu wa kyelekejo. Biketukwasha twendelele kwingidila Yehova ne kulonda Yesu. Lwitabijo lwitukulupijanga’mba Yehova uketupala mpalo shi tumukimbe na mutyima umo. (Bah. 11:6) Kadi lwitabijo luketulengeja tulamate nyeke Mwendeji wetu Yesu, nansha shi tudi mu makambakano. Tubwanya kwikala na lwitabijo lukomo lwitukwasha tūminine makambakano, na kuboila ñeni ku bimfwa bya mu ano etu mafuku bya boba balamine bululame bwabo mu kupangwapangwa nansha mu makambakano a misokwe. Kadi tubwanya kwepuka dikinga dya kusanswa bintu bya ku ngitu na kwiula boba besuminwe bintu mu būmi mwanda wa kutūla tumweno twa Bulopwe pa kifuko kibajinji. b

10. Le buswe botusenswe Leza ne bantu bwitukwashanga namani tūminine?

 ¹⁰ Kadi buswe i bwa kamweno pa kwikala nyeke batale ne kulama ñeni yetu. (Mat. 22:37-39) Buswe botusenswe Leza bwitukwashanga tūminine mu mwingilo wa busapudi nansha shi kwingila uno mwingilo kubwanya kwituletela makambakano. (2 Tm. 1:7, 8) Byotusenswe ne boba bene kebengidilapo Yehova, twendelelanga na kusapula mu wetu mwaba, enka ne kupityila ku telefone ne ku mikanda. Twendelelanga kukulupila’mba dyakadilwe kantu, bantu bakashinta ne kushilula kulonga byobya byoloke.—Ezk. 18:27, 28.

11. Le kusanswa batutu ne bakaka kwitukwashanga namani? (1 Bene Tesalonika 5:11)

¹¹ Kadi tusenswe batutu ne bakaka. Tulombolanga buno buswe na ‘kwikankamika ne kwitamija nyeke batwe bene na bene.’ (Tanga 1 Bene Tesalonika 5:11.) Pamo’nka bwa basola badi pamo ku bulwi, netu twikankamikanga batwe bene na bene. Shako, sola ubwanya kulongela sola mukwabo kibi pobadi ku bulwi pampikwa kusaka, inoko kakamulongela’kyopo nansha dimo ku kusaka. Ne batwe netu, ketukasakepo nansha dimo kusanshija batutu ne bakaka ku kusaka nansha kwibalwija kibi ku kibi. (1 Ts. 5:13, 15) Kadi tulombolanga buswe na kulēmeka batutu betutangidile mu kipwilo. (1 Ts. 5:12) Pālembele Polo uno mukanda, kipwilo kya mu Tesalonika kyādi kekyalongele mwaka mu kubundwa. Mobimwekela, bana-balume batongwe ba mu kino kipwilo bādi kebaikele na bwino kadi ye bano bādi balonga bilubo. Nansha nankyo, bādi banenwe kwibalēmeka. Kyamalwa kikatampe pokyenda kifwena, po pene potubwanya kusakilwa bwendeji bwa bakulumpe kutabuka pano. Tubwanya kukomenwa kutambula bulombodi butamba ku kité kya ntanda yonso ne ku musambo; o mwanda i kya mvubu tusanswe bakulumpe ne kwibalēmeka tamba’nka pano. Nansha shi kubalongeka bika, tulamei ñeni yetu, ketwakitai mutyima ku kubulwa kubwanina kwabo, ino tutei mutyima ku kuyuka’mba Yehova uludikanga bano bana-balume ba kikōkeji kupityila kudi Kidishitu.

12. Le lukulupilo lukiñanga namani milangwe yetu?

¹² Enka mukingilanga kilama-mutwe mutwe  wa sola, mo mukingilanga ne lukulupilo lwetu lwa lupandilo milangwe yetu. Lukulupilo lukomo lwitukwashanga tujingulule amba bintu bitubeleñenya ino ntanda i bya bituputupu. (Fid. 3:8) Lukulupilo lwitukwashanga twikale na ñeni mitūke kadi mishikate. ba Wallace ne Laurinda bengidilanga mu Afrika, bemwenine uno mwanda. Mu mayenga’tu asatu, kaka Laurinda wafwidilwe’mo inandi, tutu Wallace nandi wafwilwa’mo shandi. Pa mwanda wa kipupo kya Corona, kebabwenyepo kwenda kukadila pamo na byabo bisaka. Tutu Wallace unena’mba: “Lukulupilo lwa lusangukilo lunkwashanga ndeke kulangulukila pa muswelo obadi bekele mu mafuku abo a mfulo mu ino ntanda, ino lunkwashanga nangulukile pa mobakekadila mu mafuku abo mabajinji mu ntanda mipya. Luno lukulupilo luntūkijanga mutyima kitatyi kyonekonda na milangwe ya bulanda ne ya bushiyena.”

13. Le i bika byotubwanya kulonga pa kutambula mushipiditu ujila?

¹³ “Kemwakibulai mudilo wa mushipiditu.” (1 Ts. 5:19) Polo wādingakenye mushipiditu ujila na mudilo waka motudi. Shi tudi na mushipiditu wa Leza, twikalanga na bupyasakane ne na buzanzamuke bwa kulonga byobya byoloke ne na bukomo bwa kwingidila Yehova. (Loma 12:11) Le i bika byotubwanya kulonga pa kutambula mushipiditu ujila? I na kulomba’o, na kwifunda Kinenwa kya Leza kya ku bukomo bwa mushipiditu, ne na kupwana na batutu ne bakaka badi mu bulongolodi bwandi buludikwa na mushipiditu. Kulonga namino kuketukwasha tutamije “kipa kya mushipiditu.”—Ngt. 5:22, 23.

14. Le i bika byotufwaninwe kwepuka pa kwendelela kutambula mushipiditu wa Leza? (Tala ne kifwatulo.)

¹⁴ Shi Leza wetupe mushipiditu wandi ujila, tufwaninwe kutadija kutyina twakabula “mudilo wa mushipiditu.” Leza upānga mushipiditu wandi ujila boba bendelela kulama milangwe yabo itōka ne badi na mwiendelejo wampikwa disubi. Kaketupepo mushipiditu wandi ujila shi twendelela kulangulukila pa bintu bya disubi ne kwibilonga. (1 Ts. 4:7, 8) Pa kwendelela kutambula mushipiditu ujila, tufwaninwe ne ‘kuleka kufutulula bupolofeto.’ (1 Ts. 5:20) “Bupolofeto”  butelelwe pano bufunkila pa misapu itupa Yehova kupityila ku mushipiditu wandi ujila, kubadila’mo ne yoya itala difuku dya Yehova ne itulombola’mba tudi mu kitatyi kya ku mfulo. Ketusonsolwelangapo kulampe dino difuku mu ñeni yetu, na kulanga’mba Amakedona keikafikapo mu kino kyetu kitatyi. Ino, twidilamanga nyeke mu ñeni yetu amba kedidi pabwipi—na kwikala nyeke na mwiendelejo muyampe ne kuvudilwa nyeke bya kulonga mu “mingilo ya bwine Leza” difuku ne difuku.—2 Pe. 3:11, 12.

15. Le i bika byotubwanya kulonga pa kuleka kongolwa na myanda ya bubela ne lunsafwakanwa lwa bandemona? (1 Bene Tesalonika 5:21)

¹⁵ Panopano ponka kumeso’ku, balwana na Leza bakela mu muswelo kampanda lubila lwa amba: “Ndoe ne mutyima-ntenke!” (1 Ts. 5:3) Lunsafwakanwa lwa bandemona lukasambakana ntanda yonso, ne kongola bantu bavule. (Kus. 16:13, 14) Le batwe netu? Ketukongolwapo shi ‘tujingulule senene bintu byonso.’ (Tanga 1 Bene Tesalonika 5:21.) Kishima kya Kingidiki kyalamwinwe pano amba “jingululai senene,” kyādi kingidijibwa mu kutompa byuma bya bulēme. Nanshi, tufwaninwe kutompa byotwivwana nansha byotutanga mwanda wa kujingulula shi i bya bine. Kulonga namino kwādi kwa mvubu ku bene Tesalonika, kadi i kwa mvubu bininge kotudi pano penda pafwena kyamalwa kikatampe. Pa kyaba kya kwitabija bintu byonso binena bantu bakwabo, twingidijanga bukomo bwetu bwa kulanga mwanda wa kudingakanya byotutanga nansha byotwivwana na byobya binena Bible ne bulongolodi bwa Yehova. Kulonga namino, kuketukwasha tuleke kongolwa na lunsafwakanwa nansha bubela bo-bonso bwa bandemona.—Nki. 14:15; 1 Tm. 4:1.

16. Le i lukulupilo’ka lwa bine lotudi nalo, ne i bika byotwasumininwa kulonga?

¹⁶ Tuyukile amba bantu ba Yehova bakapanda pa kyamalwa kikatampe. Inoko umo ne umo motudi, kayukilepo mukekadila dya kesha. (Yak. 4:14) Tukatanwe bōmi pa kyamalwa kikatampe nansha tufwe kumeso kwa akyo kufika, tukapalwa mpalo ya būmi bwa nyeke shi tushale nyeke ba kikōkeji. Bashingwe māni bakekala na Kidishitu momwa mūlu. Mikōko mikwabo ikekala mu paladisa pano pa ntanda. Nanshi batwe bonso tutei mutyima ku lukulupilo lwetu lwa kutendelwa ne kwikala nyeke beteakanye ku difuku dya Yehova!