1. Mwanda waka lubatyijo i ditabula dya mvubu mpata? (Tala kifwatulo ku ngalwilo.)

MWAKA ne mwaka befundi ba Bible tununu ne tununu babatyijibwanga. Bavule mu bano i bankasampe, bansongwalume ne bansongwakaji, enka ne banuke. Padi batamijibwe mu bubine. Le nobe ubadilwa’mo? Shi i amo, nabya wi mulonge kintu kiyampe mpata. Mwine Kidishitu ense ufwaninwe kubatyijibwa. Kadi lubatyijo i kisakibwa pa kutambula lupandilo ne kwikala’ko nyeke.​—Mateo 28:19, 20; 1 Petelo 3:21.

2. Mwanda waka kufwaninwepo kwikala na moyo wa kwipāna kudi Yehova?

² Tamba powabatyijibwe, Yehova washilwile kukwesela mu miswelo palapala. Ino kadi waikele na biselwa bikwabo. Namani? Difuku dyowabatyijibwe, tutu walongele mwisambo wa lubatyijo waipangwile amba: “Kupityila ku kitapwa kya Yesu Kidishitu, lelo wi mwisāse bubi bobe ne kwipāna kudi Yehova mwanda wa kulonga kiswa-mutyima kyandi?” Walondolwele amba en-en. Walaile amba ukasanswa Yehova ne kumona mwingilo wandi bu wa mvubu kupita kintu kyo-kyonso mu bobe būmi. Lelo ufwaninwe kwialakanya pa uno mulao musumininwe?  Nansha dimo! Kukealakanyapo nansha dimo pa kuleka Yehova aludike būmi bobe. Bantu bonso kebayukilepo Yehova badi ku mutamba wa ntanda ya Satana. Dyabola kebasakilangapo biyampe, enka ne abe mwine kakusakilanga’byopo. Inoko, Satana ukasangala shi ujimije lukulupilo lobe lwa būmi bwa nyeke, mwanda nabya ubekupe ku wandi mutamba ne kupela Yehova.

3. I muswelo’ka ukwesele Yehova pa mwanda wa kwipāna kowepēne kwadi?

³ Pano langulukila pa muswelo ukwesele Yehova pa mwanda wa kwipāna kowepēne kwadi ne kubatyijibwa. Byowapēne būmi bobe kudi Yehova, o mwanda ubwanya kunena na kikulupiji kyonso amba: “Yehova udi padi ami; nkikakwatwapo moyo; lelo kisaka kunonga muntu i kika?” (Ñimbo ya Mitōto 118:6) Kekudipo kintu nansha kimo kipityile dyese dya kwikala ku mutamba wa Leza ne kuyuka’mba ukwitembanga.

4, 5. (a) Mwanda waka tunena’mba kwipāna i kiselwa kya muntu mwine? (b) I makambakano’ka atanwanga na bene Kidishitu ba myaka yo-yonso?

⁴ Kufwaninwepo kumona kipwano kyobe na Yehova pamo bwa telefone ‘ya kisaka’ ipotelwe na bambutwile. Nansha shi ukidi ku njibo ya bambutwile, kipwano kyobe na Yehova i kiselwa kya abe mwine. Mwanda waka kuvuluka kino kudi na mvubu? I kutupu muntu nansha umo uyukile mukatompelwa lwitabijo lwetu mu mafuku āya kumeso. Kimfwa, padi wabatyijibwe kumeso kwa kusongola. Ino abe pa kusongola, kowiivwana bingi ne kwikala na makambakano makwabo. Nsongwakaji umo unena’mba: “Mwana ubwanya kupela kwikala Kamoni wa Yehova mwanda’tu wa kupebwa mukate utobala pa masobo a difuku dya kubutulwa ku masomo. Ino shi wafika mu myaka ikalanga itama bilokoloko bya busekese, papo kebimulombe kukulupila ne pa mfulo amba kukōkela bijila bya Yehova i kwa kamweno nyeke.”

⁵ Ke enkapo bankasampe kete batanwanga na ano makambakano. Nansha ke boba babatyijibwe ke batame, lwitabijo lwabo lutompibwanga mu miswelo yokebadipo balangila. Matompo abo abwanya kutamba ku busongi bwabo, ku bukomo bwa ngitu, nansha ku twabo twaji. Nansha shi twikale batame namani, batwe bonso tufwaninwe kukōkela Yehova mu ngikadilo yo-yonso.​—Yakoba 1:12-14.

6. (a) Le kwipāna abe mwine kudi Yehova kushintulula namani? (b) I bika byotwifunda mu Fidipai 4:11-13?

⁶ Pa kushala na kikōkeji, vuluka nyeke amba i abe mwine walaile Yehova uno mulao. Kino kishintulula’mba walaile Mwine wa Mūlu Mwine amba ukamwingidila nansha shi bibaikala namani, nansha shi bambutwile bobe ne balunda nobe bakukankaja. (Ñimbo ya Mitōto 27:10) Mu ngikadilo yo-yonso, lomba Yehova akukwashe ufikidije mulao obe kwadi.​—Tanga Fidipai 4:11-13.

7. Lelo kwielela’ko mwanda wa lupandilo lobe na “moyo ne luzakalo ponka” kushintulula namani?

⁷ Yehova ukusakilanga wikale mulunda nandi. Inoko bilombanga bukomo pa kulama nyeke kino kipwano ne kwielela’ko mwanda wa lupandilo. Fidipai 2:12 unena’mba: “Mwielelei’ko nyeke mufikijije lupandilo lwenu na moyo ne luzakalo ponka.” Kino kishintulula’mba tufwaninwe kulangulukila na katentekeji pa mwa kwikadila nyeke pabwipi na Yehova ne mwa kushadila nyeke na kikōkeji nansha ke mu ngikadilo’ka. Ketufwaninwepo kulanga’tu amba tukalonga bino bintu. Ino vuluka’mba enka ne bantu bamo baingidile Leza mu myaka mivule bajimije kikōkeji. Lelo i bintu’ka bibwanya kukukwasha wielele’ko mwanda wa lupandilo lobe?

8. Lelo mu kifundwa kya pa kasuku mubadilwa bika ne bika? Mwanda waka kidi na mvubu?

⁸ Pa kwikala balunda na Yehova, tufwaninwe kumuteja ne kwisamba nandi. Kwifunda Bible o muswelo otutejanga Yehova. Muno mubadilwa kutanga ne kulangulukila pa Kinenwa kya Leza ne mabuku esambila pa Bible. Inoko kwifunda Bible kekukwatyilapo myanda bitupu bwa abe ukalonga ekizame ku masomo. Ino, kudi pamo bwa kwenda lwendo lusangaja, lwine lokasokola’mo myanda mipya itala padi Yehova. Kadi ukafwena bininge kudi Leza, nandi ukakufwena.​—Yakoba 4:8.

9. I bingidilwa’ka byakukweshe mu kifundwa kya pa kasuku?

⁹ Bulongolodi bwa Yehova bulupulanga bingidilwa bivule bibwanya kukukwasha mu mpangiko ya kifundwa kyobe. Kimfwa, pa jw.org mu kipindi kya “Bankasampe” mudi “Madevwala a Kifundwa kya Bible” akakukwasha wingidije myanda yowifunda mu Bible. Kadi pa jw.org, ukatana’po ne bingidilwa bya kwifunda nabyo, “Lelo I Bika Bine Bifundija Bible?” Bino bingidilwa bibwanya kukukwasha uningije lwitabijo lobe ne kushintulwila bantu nkulupilo yobe. Ubwanya kutana myanda mikwabo yobwanya kwingidija mu kifundwa kyobe kya pa kasuku mu kishinte “ Les jeunes s’interrogent . . . Comment trouver du plaisir à lire la Bible ? ” mu Réveillez-vous ! wa Kweji 4, 2009. Kwifunda ne kulanguluka kudi na mvubu pa kwielela’ko mwanda wa lupandilo.​—Tanga Ñimbo ya Mitōto 119:105.

10. Mwanda waka mwine Kidishitu mubatyijibwe ufwaninwe kulombela?

¹⁰ Potwifunda Bible, tutejanga Yehova, ino potulombela, twisambanga kwadi. Ketufwaninwepo kumona milombelo bu kibidiji’tu bitupu nansha bu ‘kijimba kya dyese.’ Milombelo i mīsambo ya binebine yotwisambanga na Umpangi wetu. Vuluka’mba: Yehova usakanga kukwivwana powisamba! (Tanga Fidipai 4:6.) O mwanda kitatyi kyozumbija mutyima pa kintu kyo-kyonso, Bible ukusoñanya wele “kiselwa kyobe padi Yehova.” (Ñimbo ya Mitōto 55:22) Batutu ne bakaka midiyo ne midiyo babwanya kukusapwila’mba ano madingi ebakweshe. Nobe abwanya kukukwasha!

11. Mwanda waka ufwaninwe nyeke kufwija’ko Yehova?

¹¹ Inoko, ketufwaninwepo’tu kulombela  enka mu kitatyi kyotusaka Yehova etukwashe. Bible wituvuluja’mba: “Ikalai na mutyima wa kufwija’ko.” (Kolose 3:15) Kyaba kimo tuzumbijanga mutyima bininge pa mwanda wa makambakano etu, twavulaminwa’nka ne bintu biyampe byotudi nabyo. Nanshi tompa kulonga namino: Difuku ne difuku, langulukila pa bintu biyampe nansha bisatu bikulongele Yehova, kupwa mufwije’ko pa bino bintu. Abigail, nkasampe umo wabatyijibwe na myaka 12, unena’mba: “Pano ndi mujingulule amba Yehova ye ufwaninwe kufwijibwa’ko kupita muntu ye-yense mūlu ne panshi. Tufwaninwe kumufwija’ko kyaba kyonso pa mwanda wa byabuntu byaetupele.” Kyaba kimo Abigail wiipangulanga kipangujo kyaaivwene difuku dimo amba: “Shi ne kesha naikala’nka na bintu bimo byonka byonafwijijanga’ko Yehova dyalelo, le na bubine nkatengela bika bikwabo?” * (Tala kunshi kwa dyani.)

12, 13. Le i muswelo’ka okodi mwimwene buyampe bwa Yehova, ne mwanda waka kulangulukila pa muswelo ukukweshe Yehova kudi na mvubu?

¹² Yehova wākweshe Mulopwe Davida ōminine makambakano mavule. O mwanda Davida wēsambīle pa myanda yāemwenine kitatyi kyaānenene amba: “Tompai mumone’mba Yehova i muyampe; keye wa katōkwe kandi, shandi! yewa muntu umukulupile.” (Ñimbo ya Mitōto 34:8) Uno vese witulombola’mba tufwaninwe kwimwena batwe bene buyampe bwa Yehova. Potanga Bible ne mabuku etu ne podi ku kupwila, wifundanga mwākwashishe Yehova bantu bakwabo balame kikōkeji. Inoko penda patyita kipwano kyobe na Yehova, ukasaka kwimwena mwakukwashishanga. Le i muswelo’ka okodi mwimwene buyampe bwa Yehova?

¹³ Bene Kidishitu bonso i bemwene buyampe bwa Yehova mu muswelo wa pa bula. Leza i mwite umo ne umo afwene kwadi ne kudi wandi Mwana. Yesu wānenene amba: “I kutupu muntu ukokeja kwiya kondi, poso Tata untumine amukoke.” (Yoano 6:44) Lelo nobe wimonanga’mba Yehova i mukukokele kwadi? Nansha le ulañanga’mba, ‘Yehova i mukokele bambutwile bami kwadi, ino ami nondanga’tu bitupu?’ Kokilwa’mba powepēne abe mwine kudi Yehova ne kubatyijibwa, wapwene nandi mu muswelo wa pa bula. Bible witusapwila’mba: “Shi muntu usenswe Leza, uno’u wayukwa nandi.” (1 Kodinda 8:3) Sangela nyeke dyese dikupele Yehova dya kwikala mu bulongolodi bwandi.

14, 15. Lelo busapudi bubwanya kukukwasha namani wikale na lwitabijo lukomo?

¹⁴ Kadi wimwenanga buyampe bwa Yehova pakupānga bukankamane bwa kusapwila bantu bakwabo nkulupilo yobe, ekale mu busapudi nansha ku masomo. Inoko ubwanya kukolelwa kusapwila bakwenu ba ku masomo. Padi ubwanya kuzumbija mutyima pa byobakalonga’po. Pakwabo ubwanya kukwatwa moyo wa kushintulula nkulupilo yobe ku meso a kibumbo kya bantu. Lelo i bika bibwanya kukukwasha?

¹⁵ Langulukila pa kine kyoitabijije nkulupilo yobe. Shi bingidilwa bya kwifunda nabyo bidi pa jw.org bidi ne mu lwenu ludimi, nabya ingidija’byo. Bibwanya kukukwasha ulangulukile pa byobya byokulupile, kine kyowibikulupidile, ne mwa kushintulwila nkulupilo yobe ku bakwabo. Shi witeakanya biyampe ne kwikala na kikulupiji kya binebine, nabya ukekala  na mutyima wa kusapula myanda ya Yehova.​—Yelemia 20:8, 9.

16. Le i bika bibwanya kukupa bukankamane bwa kwisambila pa nkulupilo yobe?

¹⁶ Nansha shi wi mwiteakanye senene, padi ubwanya kwikala na moyo wa kushintulula nkulupilo yobe. Kaka umo wa myaka 18 wabatyijibwe na myaka 13, unena’mba: “Ndyukile byobya byonkulupile, inoko kyaba kimo binkomenanga kumwekeja milangwe yami mu binenwa.” O mwanda uloñanga bukomo bwa kwisambila pa bubine na mwanenenanga ne na butūkanye. Unena’mba: “Bakwetu ba ku masomo besambilanga pampikwa kafinda pa bintu byobaloñanga. Namwene amba nami mfwaninwe kwisamba pampikwa kafinda. Penepa natela’tu mwanda umo na ami upita, kimfwa’mba, ‘Difuku dimo nafundije Bible, kadi . . .’ Kupwa naendelela kwisambila pa mwanda’wa. Nansha shi mwanda onatelanga’wa kewimaninepo pa Bible, divule bakwetu bekalanga na kipyupyu kya kuyuka byobya byonoñanga pa kufundija Bible. Kyaba kimo bangipangulanga ne bipangujo pa uno mwanda. Ponaendelele na kwingidija ano manwa, po pene byaumpēlela. Kadi pa kupwa, ngivwananga nyeke nsangaji!”

17. I bintu’ka bikwabo bibwanya kukukwasha usapwile bantu bakwabo?

¹⁷ Shi bantu bakwabo bamona’mba wibatele mutyima bya binebine ne kwibalēmeka, nabya nabo bakakulēmeka abe ne nkulupilo yobe. Olivia, wa myaka 17 kadi wabatyijibwe ukidi mwanuke unena’mba: “Nyeke nadi ntyina kutela Bible potwisamba, kutyina bantu bakamona’mba ndi mwipe’byo.” Inoko washilwile kumona bintu mu muswelo mukwabo. Pa kyaba kya kuleka moyo umutādile, walangulukile amba: “Bankasampe bavule kebayukilepo kintu nansha kimo pa Batumoni ba Yehova. Ino batwe bo Batumoni ba kwibasapwila. O mwanda muswelo otulonga bintu ubwanya kwikala na lupusa pa mobaketabila ku musapu. Ino le bikekala namani shi tudi na bumvu, moyo, shi tukolelwanga kwisambila pa nkulupilo yetu, ne shi tuzakala pa kwisamba? Papo bantu babwanya kwitumona amba ketusangedilepo byotudi. Babwanya kwitaba bibi ku musapu pa mwanda wa kubulwa kikulupiji kwetu. Ino, shi twisambile biyampe pa nkulupilo yetu kadi na kikulupiji, kwiitweja mu mīsambo, bimweka’mba baketulēmeka bininge.”

18. I bika byofwaninwe kulonga pa kwielela’ko mwanda wa lupandilo?

¹⁸ Tubamone amba kwielela’ko mwanda wa lupandilo i kiselwa kikatampe. Pa kubwanya kino, ufwaninwe kutanga ne kulangulukila pa Kinenwa kya Leza, kulomba Yehova, ne kulangulukila na mushike pa miswelo yonso ikukweshe’mo Yehova. Kulonga bino bintu kukakukwasha ukulupile ne pa mfulo amba Yehova i Mulunda nobe. Kadi kino kikakulengeja wikale na mutyima wa kusapwila bantu bakwabo nkulupilo yobe.​—Tanga Ñimbo ya Mitōto 73:28.

19. Mwanda waka bukomo bonso bolonga pa kwielela’ko mwanda wa lupandilo budi na mvubu?

¹⁹ Yesu wānenene amba: “Shi muntu usaka kunonda, nankyo epele aye mwine, asele mutyi wandi wa masusu kadi anonde nyeke.” (Mateo 16:24) Bine, pa kulonda Yesu, mwine Kidishitu yense ufwaninwe kwipāna aye mwine kudi Yehova ne kubatyijibwa. Inoko kulonga uno muswelo i ñanjilo’tu ya kwikala na būmi bulumbuluke dyalelo, kadi kukakulengeja ukamone būmi bwa nyeke mu ntanda impya ya Leza. Nanshi longa bukomo bobe bonso pa kusaka’mba wielele’ko mwanda wa lupandilo lobe!