KYANGA kyadi kala kekishilule kukaba mu Dya Butano lubanga mu Kweji 9, 1922 papo bantu 8 000 bebungile mu njibo mikatampe. Mwimaniji waela musapu amba ku kino kinkumenkume kya mvubu i kutupu wa kutamba panja, inoko shi muntu watambe kakatwela’po monka.

Papo ñimbo imbwa pashilula “Mwingilo wa Kutendela,” kupwa Joseph F. Rutherford wakanda ku lukala. Bemvwaniki bauba nyā kebatengele na kipyupyu kwivwana byasaka kunena. Pabapite kakyaba katyetye. Kupwa muneni webanena na kyanga bashikate ne kuteja. Mwisambo pa kushilula, le kudi wajingulwile kisandi kivunge kyadi kikutwe peulu pa lukala?

Tutu Rutherford wesambīle pa mutwe wa mwanda unena’mba, “Bulopwe bwa Mūlu Bubafwena.” Mu bula bwa nsá mutuntulu ne kipindi, diwi dyandi dyadi divwanikwa na bonso mu njibo’mwa paadi wisambila pa muswelo wādi usapula bapolofeto ba pa kala pampikwa moyo kwīya kwa Bulopwe. Ao mwisambo keufika dya ku mfulo, waipangula’mba, “Le mwitabije amba Mulopwe wa ntumbo kemushilule kubikala?” Bevwaniki balondolola kiundaunda’mba: “En-en!”

Tutu Rutherford wanena na diwi ditunduke amba, “Nanshi jokelai mu budimi, banwe bana ba Leza wa mūlu mwine! Bandilai Mulopwe wabikala! Banwe bo bandi bedi ba lubila. Shi ke pano, sapulai, sapulai, sapulai.”

Penepa kisandi kyadi kivunge’kya, kyavunguluka, palembwe amba: “Sapulai Mulopwe ne Bulopwe Bwandi.”

Ray Bopp uvuluka’mba, “Bemvwaniki basangele bininge.” Anna Gardner ulombola muswelo “watenkene njibo na kukupila makasa.” Fred Twarosh unena’mba, “Bemvwaniki bonso baimene bwimwa kya pamo.” Evangelos Scouffas unena’mba, “Bwadi pamo’nka bwa bukomo kampanda bwetwimikile potwadi tushikete, twaimana koku mipolo isuma mu meso.”

Bavule badi ku kino kitango badi kala kebashilule kusalaja myanda miyampe ya Bulopwe. Inoko pano, baivwanije buluji ne kitungo kinekine kya kusapwila. Ethel Bennecoff unena’mba Befundi ba Bible bajokele “na bupyasakane ne buswe mu mityima [yabo] kupita mobaidile.” Odessa Tuck, wadi na myaka 18 mu kine kitatyi’kya, wajokele ku kitango musumininwe kwitaba ku lwito lwa amba, “I ani le uketwendela, a?” Unena’mba: “Nkyadipo ndyukile i kwepi, mwa kwendela’ko, nansha bya kukalonga’ko bine. Inoko kyonadi nsaka i kwikala pamo bwa Isaya, wānenene amba, ‘Ami uno, ntume bidi.’” (Isaya 6:8) Ralph Leffler wanenene amba, “Mu dino difuku dya kasekuseku, mo amo mwashilwile kampanye kakatampe ka kusapula musapu wa Bulopwe mwine usambakene dyalelo pano pa ntanda.”

Bine kino kitango kya mu 1922 kyalongelwe mu Cedar Point, Ohio, i kinkumenkume kya kutendelwa mu mānga ya kiteokratike! George Gangas wanenene amba, “Kino kitango kyaumpele kyumwa kya kuleka kubulwa kitango nansha kimo.” Monka  mwaavulukile’kyo mwenda mafuku, kabudilwepo nansha kimo. Julia Wilcox walembele amba: “Na bubine nkibwanyapo kushintulula ne pa mfulo nsangaji yongivwananga ponso pesambilwa mu mabuku etu myanda ya kitango kyalongelwe mu Cedar Point mu 1922. Nenanga kitatyi kyonso amba, ‘Wafwa’ko Yehova na kumpa mukenga wa kutanwa’ko.’”

Muswelo umo onka, bavule motudi dyalelo bavulukanga bitango bya kasekuseku bine byetupele nsangaji ku mityima, bupyasakane ne buswe bwa kusanswa Leza wetu mukatampe ne Mulopwe watongele. Potulangulukila pa bino binkumenkume bya kasekuseku, netu tunenanga’mba, “Wafwa’ko Yehova na kumpa mukenga wa kutanwa’ko.”