MU DYA busatu mafuku 18 Kweji 1, 2023, musapu wa pa bula wamwekele pa jw.org unena’mba, tutu Gage Fleegle ne Jeffrey Winder abatongwe kwingila mu Kitango Kyendeji kya Batumoni ba Yehova. Bano batutu babidi ke bengidile Yehova na kikōkeji mu bula bwa kitatyi kilampe.

Tutu Fleegle watamīne mu kisaka kya bambutwile bakaminwe Leza kushika kwa Pennsylvania, mu États-Unis. Paakidi nkasampe, kyabo kisaka kyavilukīle ku kibundi kityetye kya kunja kwadi kusakilwa bukwashi. Kepaijijepo, wabatyijibwa mu mafuku 20 Kweji 11, 1988.

Bambutwile ba Tutu Fleegle badi nyeke bamukankamika atwele mu mwingilo wa kitatyi kyonso. Badi batundaila divule batadi ba bipindi ne ba mu kisaka kya Betele kwabo, kadi Tutu Fleegle wadi ubwanya kumona nsangaji yadi na bano batutu ne bakaka. O mwanda kepaijijepo na paabatyijibwe, washilula kwingila bu pania wa lonso mu difuku 1 Kweji 9, 1989. Myaka ibidi pa kupita’po, wafikila pa kitungo kyaetungile paadi na myaka 12 kya kukengila ku Betele. Washilula mwingilo wandi ku Betele ya Brooklyn mu Kweji 10, 1991.

Ku Betele, Tutu Fleegle waingile ku Mwingilo wa Kulamika Mabuku mu bula bwa myaka 8, kupwa bamutuma ku Bilo ya Mingilo. Mu kine kitatyi’kya, wapwidile mu kipwilo kya ludimi lwa Kirusi mu bula bwa myaka mityetye. Mu 2006 besonga na wandi mukaji Nadia, mwine obashilwile kwingila nandi ku Betele. Abo bonso babidi baingidile mu kipwilo kya Kiportigé, kupwa mu bula bwa myaka dikumi ne musubu, mu kipwilo kya Kieshipanyole. Pa kupwa kwingila mu bula bwa myaka mivule ku Bilo ya Mingilo, Tutu Fleegle watuminwe kwingila ku Bilo ya Komite wa Bufundiji ne mwenda mafuku ku Bilo ya Komite wa Mingilo. Mu Kweji 3, 2022, watongwa bu mukwashi mu Komite wa Mingilo wa Kitango Kyendeji.

 Tutu Winder watamīne mu Murrieta, mu Kaliforni, mu États-Unis. Watamijibwe mu bubine na bambutwile bandi ne kubatyijibwa mu mafuku 29 Kweji 3, 1986. Kweji’tu walondele’po na paabatyijibwe, washilula mwingilo wa bupania mukwashi. Wasangedile bininge uno mwingilo, wasaka kwiwendeleja. Pa kupwa kwingila bu pania mukwashi mu bula bwa myeji mivule, washilula kwingila bu pania wa lonso mu difuku 1 Kweji 10, 1986.

Tutu Winder paakidi nkasampe, wakapempwile batutu wandi babidi badi bengila ku Betele mu kine kitatyi’kya. Kino kyamulengeje asake kudinga fomu wa kukengila ku Betele shi watama. O mwanda mu Kweji 5, 1990, bamwityile kukengila ku Betele mu Wallkill.

Ku Betele, Tutu Winder waingile ku mingilo mishileshile, kimfwa ku Mwingilo wa Kukundula, ku Mwingilo wa Ferme, ne ku Bilo ya Betele. Wasonga wandi mukaji Angela mu 1997, kadi tamba papo abo bonso babidi bengilanga ku Betele. Mu 2014 batuminwe ku Warwick, kwine kwashilwile kukwasha Tutu Winder ku lūbako lwa mobo a kité kya ntanda yonso. Mu 2016 bavilukila ku Kitako kya Bufundiji kya Watchtower mu Patterson, kwine kwaingile Tutu Winder ku Bilo ya Mawi ne Mavideo. Myaka iná pa kupita’po, bajokela ku Warwick, kadi Tutu Winder watumwa kwingila ku Bilo ya Komite Utala Bengidi. Mu Kweji 3, 2022, watongwa bu mukwashi mu Komite Utala Bengidi wa Kitango Kyendeji.

Tulomba Yehova esele bano “bantu bu byabuntu” pobendelela kwingila bininge pa mwanda wa tumweno twa Bulopwe.—Ef. 4:8.