BALEMBI ba Bible bāpitulukile kyaba kimo mu misemwa imo kishima pa kishima. Tubandaulei’ko bubinga busatu bwālengeje padi balembi ba Bible balonge namino:

Kitatyi kyālembelwe myanda. Mu Isalela wa kala, bantu bavule kebādipo na makopi abo a Bijila. Bādi bateja kutangwa kwa Bijila kitatyi kyādi kībungila muzo ku kipema. (Kup. 31:​10-12) Mobimwekela bādi balabikwa pobādi bateja koku bemene mu bula bwa mansá mavule mu bukata mwa kibumbo kikatampe. (Neh. 8:​2, 3, 7) Mu bitatyi pamo bwa bino, kupituluka mu misemwa ya mvubu kwādi kulengeja bantu bapēlelwe kuvuluka bisonekwa ne kwibilonda mu būmi bwabo. Kupituluka mu bishima bimo, ye kuno kwēbakweshe nakampata bavuluke kanda ne kanda ka mu bijila byēbapele Leza.—Levi 18:​4-22; Kup. 5:1.

Muswelo wālembelwe myanda. Bipindi bimo bya mu Bible i bilembwe bu ñimbo—kimfwa, mukanda wa Ñimbo ya Mitōto, Lwimbo lwa Ñimbo, ne Madilo. Ñimbo imo yādi na bitundaijo, bine byādi na bishima bipitulukilwe’mo bikwasha bevwaniki bakwatyile ku mutwe binenwa’bya. Kimfwa, tala binenwa bidi mu Ñimbo ya Mitōto 115:​9-11: “A Isalela, kulupila mudi Yehova—Aye i mukwashi wabo ne ngabo yabo. A njibo ya Alone, kulupila mudi Yehova—Aye i mukwashi wabo ne ngabo yabo. Banwe batyina Yehova, kulupilai mudi Yehova—Aye i mukwashi wabo ne ngabo yabo.” Kupituluka mu bino binenwa ye kuno kwākweshe batuimba balame buno bubine bulēme mu ñeni ne mu mityima yabo.

Kukomeneja myanda mikatampe. Kyaba kimo balembi ba Bible bāpitulukile mu misemwa ya mvubu. Kimfwa, pāsoñenye Yehova bene Isalela kuleka kudya mashi, wālengeje Mosesa apituluke misunsa mivule mu bubinga bwine bokebafwaninwepo kwiadīla. Leza wākomeneje amba būmi bwa ngitu budi mu mashi, ko kunena’mba, mashi elekeja būmi. (Levi 17:​11, 14) Mwenda mafuku, pālombwele batumibwa ne bakulumpe mu Yelusalema miswelo mikatampe ya kusangaja’mo Leza, bākomeneje monka kamweno kadi mu kwilama ku mashi.—Bil. 15:​20, 29.

Yehova kadipo usaka amba twikale na kibidiji kya kupituluka mu misemwa ya mu Bisonekwa. Kimfwa, Yesu wānenene amba: “Polombela, kokanena bintu bimo byonka wadi’mo kodi’mo.” (Mat. 6:7) Kupwa waendeleja na kwitulombola myanda ya mvubu yotubwanya kutela mu milombelo, mine ikwatañene na kiswa-mutyima kya Leza. (Mat. 6:​9-13) Nansha byotwepukanga kutela bishima bimo byonka twadi’mo ketudi’mo mu milombelo yetu, inoko tubwanya kulombela pa myanda imo yonka misunsa ne misunsa.—Mat. 7:​7-11.

I pa bubinga buyampe bwalengeje Leza amba bishima bimo ne misemwa imo bipitulukwe mu Kinenwa kyandi. Kino kibadilwa mu miswelo mivule itufundijanga’mo Mufundiji wetu Mukatampe, mwanda wa kamweno ketu.—Isa. 48:​17, 18.