1-2. (a) Le i bika bimonanga Yehova kitatyi kibungila pamo bantu midiyo ne midiyo mwanda wa Bidibwa bya Kyolwa bya Mfumwetu? (Tala kifwatulo pa kibalu.) (b) Le i bika byotusa kwisambila’po mu kino kishinte?

LANGA’PO bidi bintu bimonanga Yehova kitatyi kibungilanga pamo midiyo ne midiyo ya bantu kujokoloka ntanda yonso mwanda wa kuvuluka Bidibwa bya Kyolwa bya Mfumwetu. Kamonengapo enka buvule bwa bantu kete; ino umonanga umo ne umo utenwe’ko. Kimfwa, umonanga boba bāyanga kutanwa’ko mwaka ne mwaka. Mu bano bantu, mudi bāyanga kutanwa’ko nansha shi bapangwapangwa bya malwa. Bakwabo kebāyangapo kitatyi kyonso ku kupwila kukwabo, ino bamwene amba kutanwa ku Kivulukilo kudi na mvubu kutabuka. Kadi Yehova umonanga ne boba bāyanga ku Kivulukilo musunsa mubajinji, padi mwanda wa kukimba kuyuka mobipityila.

² Na bubine, Yehova usangalanga pa kumona bantu bavule batanwa ku Kivulukilo. (Luka 22:19) Inoko, Yehova katengapo mutyima dibajinji ku buvule bwa bantu batanwa’ko. Aye utanga mutyima bininge ku kine kibalengeja batanwe’ko; kintu kine kya mvubu kudi Yehova. Mu kino kishinte, tusa kulondolola kino kipangujo kya mvubu mpata: Mwanda waka ketutanwangapo’nka ku Kivulukilo kya pa mwaka, ino tutanwa ne ku kupwila kwa yenga ne yenga kutūdīle’ko Yehova boba basenswe?

3-4. (a) Mwanda waka tutanwanga ku kupwila? (b) Le kutanwa kotutanwanga ku kupwila kulombola’mba twi bantu ba muswelo’ka? (c) Kukwatañana na byobya binena 1 Kodinda 11:23-26, mwanda waka ketufwaninwepo kubulwa Kivulukilo?

³ Dibajinji tutanwanga ku kupwila kwa pa kipwilo mwanda kubadilwanga mu butōtyi bwetu. Kadi tutanwanga’ko mwanda Yehova witufundijanga ku kupwila. Bantu ba mitatulo  bapelanga mulangwe wa amba bafwaninwe kufundijibwa kintu kampanda. (3 Yo. 9) Inoko batwe, twitabije kufundijibwa na Yehova ne na bulongolodi bwandi bwaingidija.—Isa. 30:20; Yoa. 6:45.

⁴ Kutanwa kotutanwanga ku kupwila kulombola’mba twi betyepeje—kadi twitabije kufundijibwa. Kyolwa kya Kivulukilo kya lufu lwa Yesu, tutanwanga ku kino kinkumenkume kya mvubu ke mwandapo’tu i kiselwa kyetu ino i mwanda tukōkelanga na kwityepeja musoñanya wa Yesu wa amba: “Longai nyeke namino ke pa kumvulukila.” (Tanga 1 Kodinda 11:23-26.) Kuno kupwila kuningijanga lukulupilo lwetu lwa kukekala’ko mu mafuku a kumeso kadi kwituvulujanga buswe bukatampe bwituswele Yehova. Inoko, Yehova uyukile amba tusakilwa kukankamikwa ne kukomejibwa bininge kupita’ko’tu musunsa umo kete pa mwaka. O mwanda i mwitutūdile’ko kupwila kwa yenga ne yenga ne kwitusoñanya tutanwe’ko. Kwityepeja kwitutononanga tukōkele. Yenga ne yenga tupityijanga mansá mavule mwanda wa kuteakanya kuno kupwila ne kutanwa’ko.

5. Mwanda waka bantu betyepeje betabanga ku lwito lwa Yehova?

⁵ Mwaka ne mwaka, bantu bavule betyepeje betabanga lwito lwa Yehova lwa kufundijibwa nandi. (Isa. 50:4) Basangelanga kutanwa ku Kivulukilo, kupwa kebatanwa ne ku kupwila kukwabo. (Zek. 8:20-23) Batwe bonso pamo, tusangelanga kufundijibwa ne kuludikwa na Yehova, “mukwashi [wetu] ne mukūdi [wetu].” (Ñim. 40:17) Na bubine, le kudi kintu kisangaja mpata—nansha kya mvubu kutabuka—kwitabija lwito lwa kufundijibwa na Yehova ne Yesu wandi Mwana wasenswe bininge?—Mat. 17:5; 18:20; 28:20.

6. Le kwityepeja kwakweshe namani muntu umo atanwe ku Kivulukilo?

⁶ Mwaka ne mwaka, tuloñanga bukomo bwa kwita bantu bavule bāye batanwe ku Kivulukilo kya lufu lwa Yesu. Bantu bavule betyepeje bamwenanga’mo shi abaitabija lwito lwetu. Tutalei bidi kimfwa kimo. Pano kepadi myaka mivule, bapele muntu umo lwito lwa ku Kivulukilo, ino wasapwila tutu wamupele luno lwito amba kasapo kutanwa’ko. Inoko, kyolwa kya Kivulukilo, tutu watulumuka pa kumona uno muntu utwela mu Njibo ya Bulopwe. Uno muntu watengelwe bininge na kizaji kyobamulubwile nakyo, washilula kutanwa ku kupwila yenga ne yenga. Na bubine, wabudilwe’tu enka kupwila kusatu kete mu bula bwa mwaka mutuntulu. Le i bika byamukweshe atanwe ku kupwila konso? Wadi mwityepeje bininge pa kushinta milangwe yandi. Tutu wamwityile’wa wanenene mwenda mafuku amba, “Aye i muntu mwityepeje bininge.” Na bubine, i Yehova wakokele uno muntu amutōte, kadi pano i tutu mubatyijibwe.—2 Sa. 22:28; Yoa. 6:44.

7. Le byobya byotwifunda ku kupwila ne byotutanga mu Bible bibwanya kwitukwasha namani twikale betyepeje?

⁷ Byobya byotwifunda ku kupwila ne byotutanga mu Bible bibwanya kwitukwasha twikale betyepeje. Mu mayenga abadikile Kivulukilo, divule dine kupwila kwetu kwisambilanga bininge pa kimfwa kya Yesu ne kwityepeja kwaālombwele pa kupāna būmi bwandi bu kinkūlwa. Kadi mu mafuku abadikile Kivulukilo, twi basoñanibwe kutanga nsekununi ya mu Bible īsambila pa binkumenkume byālongekele kubwipi na lufu lwa Yesu ne lusangukilo lwandi. Bintu byotwifunda ku kupwila konso, ne byotutanga mu ino nsekununi ya mu Bible bitamijanga mutyima wetu wa kufwija’ko pa kitapwa kya Yesu kyaālambwile pa mwanda wetu. Mutyima witutononanga twiule ngikadila yandi ya kwityepeja ne kulonga kiswa-mutyima kya Yehova, nansha shi i bitukomene namani.—Luka 22:41, 42.

8. Le Yesu wālombwele bukankamane namani?

⁸ Kadi tuloñanga bukomo bwa kwiula kimfwa kya Yesu kya kulombola bukankamane. Tulangulukilei bidi pa bukankamane bwaālombwele mu mafuku kampanda kumeso kwa kwipaibwa. Wādi uyukile biyampe amba balwana nandi basa kumufwija bumvu, kumukupila, ne kumwipaya pampikwa kwija. (Mat. 20:17-19) Inoko, aye wāitabije kufwa. Kitatyi pa kubwana, wānena batumibwa bandi ba kikōkeji bādi nandi mu budimi bwa Ngesemani amba: “Imanai, twendei. Talai! Yewa wa kungaba wafwena pabwipi.” (Mat. 26:36, 46) Kadi kibumbo kya bantu baselele byabulwi pa kwiya kumukwata, wāpita kumeso, wetēla aye mwine, kupwa wānena basola baleke batumibwa bandi bende. (Yoa. 18:3-8) Bine, buno bwādi bukankamane bukatampe bwālombwele Yesu! Dyalelo nadyo, bene Kidishitu bashingwe māni ne mikōko mikwabo, baloñanga bukomo bwa kwiula Yesu na kulombola bukankamane. Namani?

9. (a) Mwanda waka tusakilwa bukankamane pa kutanwa ku kupwila kitatyi ne kitatyi? (b) Le kimfwa kyetu kibwanya kukankamika namani banabetu bakutyilwe pa mwanda wa lwitabijo lwabo?

⁹ Pa kutanwa ku kupwila kitatyi ne kitatyi, bitulombanga padi kulombola bukankamane shi tudi mu ngikadilo mikomo. Batutu ne bakaka bamo batanwanga ku kupwila nansha shi balēmenenwe na njia, kutyumukwa mutyima, ne misongo. Bakwabo batanwanga ku kupwila na bukankamane nansha shi bapangwapangwa bininge na bantu ba mu kisaka nansha na bakatampe ba lupusa. Tulangulukilei bidi bityetye pa muswelo ubwanya kimfwa kyetu kukankamika banabetu bakutyilwe pa mwanda wa lwitabijo lwabo. (Bah. 13:3) Pobevwananga’mba twendelelanga kwingidila Yehova nansha shi tudi mu makambakano, bakomejibwanga, ebiya balama lwitabijo lwabo, bukankamane ne bululame bwabo. Mutumibwa Polo nandi wēmwenine mwanda wa uno muswelo. Paādi mukutwe mu Loma, wādi usangala kitatyi kyonso kyaādi wivwana’mba banababo bengidilanga Leza na kikōkeji. (Fid. 1:3-5, 12-14) Kumeso ne pa kupwa’tu kukutululwa, Polo wālembēle Bahebelu mukanda. Mu uno mukanda wāsoñenye bano bene Kidishitu ba kikōkeji baleke ‘buswe bwabo bwa bu bana na bana bwendeende’ ne amba kebakaleka’byo kubungakana.—Bah. 10:24, 25; 13:1.

10-11. (a) Le i bāni botufwaninwe kwita ku Kivulukilo? (b) Le Efisesa 1:7 witupa bubinga’ka bwa kwibetyila?

¹⁰ Tulombolanga bukankamane kitatyi kyotwita babutule, bakwetu ba kukaji, ne balondakani bāye ku Kivulukilo. Mwanda waka twibetanga? Tufwijanga’ko bininge pa byobya bitulongēle ba Yehova ne Yesu, o mwanda ketwikakangapo kwita bakwetu nabo bāye batanwe ku Kivulukilo. Tusakanga nabo befunde muswelo obabwanya kumwena mu kanye “ka ku buntu bitupu” kalombwele Yehova kupityila ku kinkūlwa.—Tanga Efisesa 1:7; Kus. 22:17.

¹¹ Kitatyi kyotulombola bukankamane na kupwidila pamo, tulombolanga ne ngikadila mikwabo milēme, mine ilombolanga  Leza ne wandi Mwana mu muswelo wa kutendelwa.

12. (a) Le kupwila kwetu kuvudijanga namani buswe botuswele Yehova ne Yesu? (b) Le 2 Kodinda 5:14, 15 witukankamika tulonge bika pa kwiula Yesu?

¹² Buswe botuswele Yehova ne Yesu bwituningilanga tutanwe ku kupwila. Ne kadi, byobya byotwifunda ku kupwila bivudijanga buswe botuswele Yehova ne wandi Mwana. Betuvulujanga kyaba kyonso ku kupwila byobya byobetulongēle. (Loma 5:8) Nakampata, Kivulukilo kituvulujanga buswe bukatampe bobetuswele, ne bobaswele boba kebaivwanije mvubu ya kinkūlwa. Byotudi na mutyima wa kufwija’ko, tuloñanga bukomo bwa kwiula Yesu kupityila ku mwiendelejo wetu wa difuku ne difuku. (Tanga 2 Kodinda 5:14, 15.) Ne kadi mutyima wetu witutononanga tutendele Yehova mwanda wa kinkūlwa kyaetupele. Muswelo umo bidi otubwanya kumutendela i kulondolola na mutyima umo ku kupwila.

13. Le i muswelo’ka otubwanya kumwekeja buswe bukatampe botuswele Yehova ne wandi Mwana? Shintulula.

¹³ Tubwanya kumwekeja buswe bukatampe botuswele Yehova ne wandi Mwana na kwitabija kwipāna pa mwanda wa abo. Divule dine, tufwaninwe kwipāna mu miswelo palapala pa kutanwa ku kupwila. Bipwilo bivule bipwilanga pa kupwa kaji padi bavule ke bakōke bininge. Bakwabo nabo bapwilanga ku mfulo kwa yenga kitatyi kikōkolokwa bantu bakwabo. Le Yehova umonanga’mba tutanwanga ku kupwila nansha shi twi bakōke? Bine umonanga! Na bubine, shi twielela’ko bininge, Yehova nandi ukasangela buswe botulombola pa mwanda wandi.—Mako 12:41-44.

14. Le Yesu i mwitushile namani kimfwa kya buswe bwa kwipāna?

¹⁴ Yesu wētushidile kimfwa kya buswe bwa kwipāna. Kāitabijepo’nka kufwila bandi bana ba bwanga, ino i ne kwiendeja difuku ne difuku mu muswelo ulombola’mba utangidije tumweno twabo kumeso kwa twandi. Kimfwa, wēbungile na balondi bandi nansha byaādi mukōke ku ngitu ne mu ñeni. (Luka 22:39-46) Kadi wādi utele mutyima ku bintu byabwanya kupa bakwabo, pa kyaba kya kuta’o ku byobabwanya kumupa. (Mat. 20:28) Shi buswe botuswele Yehova ne banabetu i bukatampe, tukalonga bukomo bwetu bonso mwanda wa kutanwa ku Bidibwa bya Kyolwa bya Mfumwetu ne ku kupwila kukwabo konso kwa pa kipwilo.

15. Le i bāni botusakanga kukwasha bininge?

 ¹⁵ Batwe bonso tudi mu bu bana na bana bwa bwine Kidishitu, kadi tusangedile kwingidija kitatyi kyonso kyotudi nakyo mwanda wa kwita bapya belunge kotudi. Inoko, tusakanga kukwasha bininge boba “botubutulwa nabo mu lwitabijo” ino kebakingilanga. (Ngt. 6:10) Tulombolanga buswe botwibaswele na kwibakankamika bāye ku kupwila, nakampata ku Kivulukilo. Pamo bwa ba Yehova ne Yesu, tusangalanga bininge shi muntu kakingilanga wajokela kudi Yehova, Tata wetu wa buswe kadi Mukumbi wetu.—Mat. 18:14.

16. (a) Le i muswelo’ka otubwanya kwikankamika batwe bene na bene, ne kupwila kwetu kwitukwashanga namani? (b) Mwanda waka kino i kitatyi kiyampe pa mwaka kya kuvuluka binenwa bya Yesu bidi mu Yoano 3:16?

¹⁶ Mu mayenga ashala’ko, ita bantu bavule bāye batanwe ku Kivulukilo Dya Butano kyolwa, mafuku 19 Kweji 4, 2019. (Tala kapango kanena’mba, “ Le Usa Kwibeta?”) Mu mwaka onso, twikankamikei batwe bene na bene na kutanwa kitatyi ne kitatyi ku kupwila konso kwitutūdile’ko Yehova. Pano pafwena mfulo ya ino ngikadilo, tufwaninwe kupwila mwanda wa kwikwasha twikale nyeke betyepeje, bakankamane, kadi ba buswe. (1 Ts. 5:8-11) Na mutyima wetu onso, tulombolei motwiivwaninanga pa buswe bukatampe bwituswele Yehova ne wandi Mwana!—Tanga Yoano 3:16.