1-2. Le i bika byalongeka mu difuku dya Pentekosa 33 Yesu Ke Mwiye?

TUDI mu Yelusalema Dya Yenga lubanga. Mu mwaka wa 33 Yesu Ke Mwiye, kadi i difuku dya Pentekosa. Kisumpi kya bana ba bwanga kintu kya 120 bebungile mu kyumba kya peulu. (Bil. 1:13-15; 2:1) Mafuku matyetye kunyuma, Yesu webalombwele bashale mu Yelusalema mwanda wa kutambula kyabuntu kya pa bula. (Bil. 1:4, 5) Le i bika byalongeka?

² “Na mu kitulumukila, [kubaikala] lunwa lutamba mūlu pamo bwa kivula kikatampe kipukuma.” Lunwa lubayula mu njibo monso. Kupwa, “ndimi pamo bwa mimbi ya mudilo” ibamweka pa mitwe ya bana ba bwanga, abo bonso abayulwa “mushipiditu ujila.” (Bil. 2:2-4) Mu uno muswelo utulumukwa, Yehova wapungulwila kino kisumpi mushipiditu wandi ujila. (Bil. 1:8) Abaikala bantu babajinji kushingwa māni na mushipiditu ujila * ne kupebwa lukulupilo lwa kukabikala na Yesu momwa mūlu.

3. Mwanda waka boba bātenwe pa Pentekosa bākulupile amba i bashingwe māni na mushipiditu ujila?

³ Shi wādi mu bano bana ba bwanga bēbungile mu kyumba kya peulu mu dine difuku’dya, kwadipo wa kwilwa’dyo. Kintu kidi pamo bwa ludimi lwa mudilo kibakutentama pa mutwe, ebiya ubashilula kwisamba mu ndimi! (Bil. 2:5-12) Wādi wa kukulupila’mba ubashingwa māni na mushipiditu ujila. Ino le bantu bonso bashingilwe māni na mushipiditu  ujila, bashingilwe’o mu muswelo utulumukwa kadi pa kitatyi kimo mu bwabo būmi? Aa. Le tubayuka kino namani?

4. Lelo bashingwe māni bonso ba mu myaka katwa kabajinji bāshingilwe’o mu kitatyi kimo? Shintulula.

⁴ Twisambilei bidi pa mwanda utala kitatyi. Kisumpi kya bene Kidishitu kubwipi kwa 120, kea’kyopo kete kyāshingilwe māni na mushipiditu ujila pa Pentekosa 33 Yesu Ke Mwiye. Enka mu dine difuku’dya, kintu kya bantu bakwabo 3 000 bātambwile mushipiditu ujila wālailwe. Abo bāshingilwe māni pa kubatyijibwa. (Bil. 2:37, 38, 41) Inoko mu myaka yālondele’po, ke bene Kidishitu bonsopo bāshingilwe māni pa kubatyijibwa. Bene Samadia bāshingilwe māni abo kebapwe kubatyijibwa. (Bil. 8:14-17) Kadi mwanda wa pa bula i uno, Konilusa ne ba mu njibo yandi bāshingilwe māni abo kubatyijibwa mpika.​—Bil. 10:44-48.

5. Mungya 2 Bene Kodinda 1:21, 22, le i bika bilongekanga shi muntu washingwa māni na mushipiditu ujila?

⁵ Twisambilei ne pa bilongekanga shi muntu washingwa māni na mushipiditu ujila. Bashingwe māni bamo bakomenwanga dibajinji kwitabija’mba Yehova webatonge. Babwanya kwiipangula’mba, ‘Mwanda waka Leza wantonge ami?’ Bakwabo nabo kebabwanyapo padi kwiipangula uno muswelo. Nansha bikale namani, mutumibwa Polo wāshintulwile byobya bifikilanga bashingwe māni bonso amba: “Pa kupwa kwitabija, mwatūdilwe ne kiyukeno * kupityila kudi aye na mushipiditu ujila walailwe, ao i kyeya kyetweyekelwe kala kya bupyani bwetu.” (Ef. 1:13, 14) Nanshi Yehova wingidijanga mushipiditu wandi ujila pa kukulupija bano bene Kidishitu amba i mwibatonge. Mu uno muswelo, mushipiditu ujila i “kyeya [nansha mulao]” wibapēlwe mwanda wa kwibakulupija’mba bakekala’ko nyeke momwa mūlu mu mafuku a kumeso, ke pano pa ntandapo.​—Tanga 2 Bene Kodinda 1:21, 22.

6. Le i bika bifwaninwe kulonga mwine Kidishitu mushingwe māni pa kutambula mpalo yandi ya momwa mūlu?

 ⁶ Shi mwine Kidishitu washingwa māni, lelo ko kunena amba watambwididila mpalo yandi? Aa. Aye ukulupile na bubine amba i mutongwe kwenda mūlu. Inoko ufwaninwe kuvuluka kino kidyumu kya amba: “Banwe banabetu, ikalai na kininga kyonso amba mufikidije banwe bene lwito ne kutongwa kwenu, mwanda shi mwendelele kulonga bino bintu’bi, kemukakankalwapo nansha dimo.” (2 Pe. 1:10) Nanshi shi mwine Kidishitu mushingwe māni watongwe, nansha kwitwa kwenda mūlu, ukatambula mpalo yandi enka shi waikala nyeke na kikōkeji.—Fid. 3:12-14; Bah. 3:1; Kus. 2:10.

7. Le bashingwe māni bayukanga namani amba i betwe kwenda mūlu?

⁷ Penepa muntu uyukanga namani amba i mwitwe kwenda mūlu? Malondololo adi mu byānenene Polo ku bene Loma, bene bāityilwe “kwikala bajila.” Wēbasapwidile amba: “Banwe kemwatambwilepo mushipiditu wa bupika wimulengeja moyo dikwabo, ino mwatambwile mushipiditu wa kwimwalamuna kemudi bana, mushipiditu otwita nao amba: ‘Abba, Tata!’ Mushipiditu mwine usapulanga bukamoni na mushipiditu wetu amba twi bana ba Leza.” (Loma 1:7; 8:15, 16) Nanshi kupityila ku mushipiditu wandi ujila, Leza ukulupijanga bashingwe māni amba i betwe kwenda mūlu.​—1 Ts. 2:12.

8. Le kisonekwa kya 1 Yoano 2:20, 27 kilombola namani amba bene Kidishitu bashingwe māni kebasakilwapo bantu bakwabo ba kwibalombola’mba abashingwa māni?

⁸ Yehova utalulanga kutatana ko-konso mu ñeni ne mu mityima ya boba batambulanga lwito lwa kwenda mūlu. (Tanga 1 Yoano 2:20, 27.) Na bubine, bene Kidishitu bashingwe māni basakilwa kufundijibwa na Yehova ku kipwilo pamo bwa bantu bakwabo bonso. Inoko kebasakilwapo muntu ebalombole amba abashingwa māni. Yehova wingidijanga bukomo butabukile bonso mūlu ne pano pa nshi, mushipiditu wandi ujila, mwanda wa kwibakulupija’mba abashingwa māni!

9. Shi muntu washingwa māni, le ushintanga namani na mokilombwedilwe mu Bene Efisesa 1:18?

⁹ Bengidi bavule ba Leza dyalelo babwanya kukomenwa kwimvwanija bine bilongekanga shi Leza washinga muntu māni. Kino i kyendele’mo, mwanda kebashingilwe’o kashā. Leza wāpangile bantu mwanda wa kwikala nyeke pano pa ntanda, ke mūlupo. (Ngo. 1:28; Ñim. 37:29) Inoko Yehova i mutonge bantu bamo bakekale momwa mūlu. Nanshi shi Leza webashinga māni, lukulupilo ne mulangilo wabo bishintanga bininge, mwanda kebatengēle būmi bwa momwa mūlu.—Tanga Bene Efisesa 1:18.

10. Lelo ‘kubutulwa monka’ kushintulula bika? (Tala ne kunshi kwa dyani.)

¹⁰ Shi bene Kidishitu abashingwa māni na mushipiditu ujila, ‘babutulwanga monka,’ nansha ‘kubutulwa kutamba mūlu.’ * Kadi Yesu wālombwele amba i bikomo kushintulwila senene muntu kashingilwepo māni mwiivwaninanga muntu ‘ubutwilwe monka’ nansha “ubutwilwe ku mushipiditu.”—Yoa. 3:3-8; kunshi kwa dyani.

11. Lombola mushintyilanga mulangilo wa muntu shi washingwa māni.

¹¹ Lelo mulangilo wa bene Kidishitu ushintanga  namani shi abashingwa māni? Kumeso kwa Yehova kushinga bano bene Kidishitu māni, badi basenswe lukulupilo lwabo lwa kwikala na būmi bwa nyeke pano pa ntanda. Badi batengēle na kipyupyu kitatyi kikatalula’ko Yehova bibi byonso ne kwalamuna ntanda ke paladisa. Padi badi bafwatakanya muswelo obakatundaila muntu wa mu kisaka nansha mulunda ukasangulwa mu lufu. Ino pa kushingwa māni, bashilula kulanga muswelo mukwabo. Mwanda waka bidi uno muswelo? Ke kunenapo amba kebadipo basangedile lukulupilo lwa kwikala pano pa ntanda. Kebashintyilepo milangwe yabo pa mwanda wa masusu. Kadi kebalangilepo amba kukekala na būmi bwa nyeke pano pa ntanda kukapungijana. Ino Yehova waingidije mushipiditu wandi mwanda wa kushinta mulangilo wabo ne lukulupilo lobadi basenswe.

12. Mungya 1 Petelo 1:3, 4, le bene Kidishitu bashingwe māni beivwananga namani pa lukulupilo lwabo?

¹² Muntu washingwa māni ubwanya kwimona bu kafwaninwepo dino dyese dilēme. Inoko katatanangapo nansha mu munite umo amba Yehova kamutongelepo. Mutyima wandi uyulanga nsangaji ne kufwija’ko kitatyi kyalangulukila pa lukulupilo lwandi lwa kumeso.—Tanga 1 Petelo 1:3, 4.

13. Le bashingwe māni beivwananga namani pa būmi bwabo bwa pano pa ntanda?

¹³ Penepo le kino kishintulula’mba bashingwe māni basakanga kufwa? Mutumibwa Polo ulondolola kino kipangujo. Wādingakenye imbidi yabo ya bu muntu na pema, wānena’mba: “Na bubine, batwe badi mu uno pema tubinzanga, tulēmenwe, mwanda ketusakilepo kuvūla uno’u, ino tusakanga kuvwala kikwabo, amba kyokya kya lufu kiminwe na būmi kubyu.” (2 Ko. 5:4) Bano bene Kidishitu kebatondelwepo buno būmi, kebasake kufwa bukidibukidi. Ino basangelanga būmi kadi basakanga kwingidila Yehova difuku ne difuku pamo na bisaka byabo ne balunda. Nansha balonge bika, bavulukanga nyeke lukulupilo lwa ntumbo lobadi nalo lwa mu mafuku a kumeso.​—1 Ko. 15:53; 2 Pe. 1:4; 1 Yo. 3:2, 3; Kus. 20:6.

14. Le i bika kebilombolapo amba muntu washingwa māni na mushipiditu ujila?

¹⁴ Padi wiipangulanga shi wi mushingwe māni na mushipiditu ujila. Shi i amo, langulukila pa bino bipangujo bya mvubu: Le udi na mutyima wa kulonga kiswa-mutyima kya Yehova? Le wimonanga bu mupyasakane bininge mu mwingilo wa busapudi? Lelo wifundanga bya binebine Kinenwa kya Leza kadi usenswe kwifunda “bintu bya mushike bya Leza”? (1 Ko. 2:10) Lelo umonanga’mba Yehova i mukukwashe ulupule bipa biyampe mu mwingilo wa busapudi? Le wimonanga bu udi na kiselwa kya kukwasha bakwenu ku mushipiditu? Le wimwenanga bukamoni bulombola’mba Yehova ukukwashanga mu miswelo mivule mu būmi bobe? Shi ubalondolola na kikulupiji amba en-en ku bipangujo byonso, le ko kunena’mba wi mwitwe kwenda mūlu? Aa, ke amopo. Mwanda waka? Mwanda bengidi bonso ba Leza babwanya kwiimvwana uno muswelo, bekale bashingwe māni nansha bampikwa kushingwa māni. Kadi Yehova ubwanya kupa mwingidi wandi e-ense buno bukomo kupityila ku mushipiditu wandi ujila, nansha shi udi na lukulupilo’ka. Na bubine, shi utatananga kushingwa māni kobe na mushipiditu ujila, nabya kushingilwe’opo. Boba betyilwe na Yehova kebatatanangapo shi i bashingwe māni nansha  kebashingilwe’opo! Bayukile amba i bashingwe māni!

15. Le tubayuka namani amba ke bonsopo batambwile mushipiditu wa Leza batongelwe kwenda mūlu?

¹⁵ Mu Bible, mudi bimfwa bivule bya bantu ba kikōkeji bātambwile mushipiditu ujila; ino kebādipo na lukulupilo lwa kwenda mūlu. Davida wāludikilwe na mushipiditu ujila. (1 Sa. 16:13) Mushipiditu ujila wāmukweshe evwanije bintu bya mushike bya Yehova ne kumuludika asoneke bipindi bimo bya mu Bible. (Mako 12:36) Nansha nabya, mutumibwa Petelo wānenene amba Davida “kākandilepo mūlu.” (Bil. 2:34) Yoano Mubatyiji nandi ‘wāyudilwe mushipiditu ujila.’ (Luka 1:13-16) Yesu wānenene amba kekudipo muntu utabukile Yoano bukata, ino wānenene kadi amba Yoano kakabikalapo bu mulopwe mūlu. (Mat. 11:10, 11) Yehova wāingidije mushipiditu wandi ujila mwanda wa kupa bano bantu bukomo bwa kulonga bintu bitulumukwa, ino kāingidijepo uno mushipiditu mwanda wa kwibatonga bakekale mūlu. Le kino kishintulula’mba bādi na kikōkeji kityetye kutabuka kya boba batongelwe kukabikala mūlu? Aa. Kishintulula’tu amba Yehova ukebajokejeja ku būmi mu Paladisa pano pa ntanda.​—Yoa. 5:28, 29; Bil. 24:15.

16. Le i mpalo’ka itengēle bengidi bavule ba Leza dyalelo?

¹⁶ Bengidi bavule ba Leza dyalelo pano pa ntanda kebadipo na lukulupilo lwa kwenda mūlu. Pamo bwa Abalahama, Davida, Yoano Mubatyiji, ne bana-balume ne bana-bakaji bakwabo ba mu kitatyi kyāsonekelwe Bible, nabo batengēle kukekala na būmi pano pa ntanda kitatyi kikebaludika Bulopwe bwa Leza.​—Bah. 11:10.

17. Le i bipangujo’ka byotukalondolola mu kishinte kilonda’ko?

¹⁷ Bashingwe māni bamo byobakidi mu bantu ba Leza dyalelo, i byendele’mo kwiipangula bipangujo bimobimo. (Kus. 12:17) Kimfwa, le bashingwe māni bafwaninwe kwimona namani? Shi muntu mu kyenu kipwilo washilula kudya ku mukate ne kutoma vinyu ku Kivulukilo, le ufwaninwe kumumona namani? Ne le ukalonga namani shi kibalwa kya boba betela bu bashingwe māni kyenda kivudila’ko? Le ufwaninwe kulangalanga? Tukalondolola bino bipangujo mu kishinte kilonda’ko.